Suryakumar Yadav Ranji Trophy : रोहितनंतर सूर्याच्या बॅटलाही ग्रहण; नॉकआऊट सामन्यात मुंबईची अवस्था बिकट, रणजीत मोठा उलटफेर
रणजी ट्रॉफी सध्या भारतीय स्थानिक क्रिकेटमध्ये खेळली जात आहे. गट फेरीनंतर आता उपांत्यपूर्व फेरीचे सामने सुरू झाले आहेत.
Mumbai vs Haryana Ranji Trophy quarter Final : रणजी ट्रॉफी सध्या भारतीय स्थानिक क्रिकेटमध्ये खेळली जात आहे. गट फेरीनंतर आता उपांत्यपूर्व फेरीचे सामने सुरू झाले आहेत. मुंबई संघाचा सामना क्वार्टर फायनलमध्ये हरियाणाशी खेळत आहे. दोन्ही संघांमधील हा सामना कोलकात्यातील ईडन गार्डन्स स्टेडियमवर खेळला जात आहे. मुंबईचा कर्णधार अजिंक्य रहाणेने नाणेफेक जिंकून प्रथम फलंदाजी करण्याचा निर्णय घेतला. पण संघाची सुरुवात खूपच खराब झाली आणि अवघ्या काही षटकांतच मुंबईचे स्टार फलंदाज पॅव्हेलियनमध्ये परतले. त्यामुळे रणजीत मोठा उलटफेर पाहिला मिळत आहे.
भारताचा टी-20 कर्णधार सूर्यकुमार यादव एकदिवसीय संघातून बाहेर आहे. त्याने 2023 मध्ये टीम इंडियासाठी शेवटचा एकदिवसीय सामना खेळला. त्याच वेळी, तो टी-20 स्वरूपात काही खास कामगिरी करू शकला नाही. आता सूर्या मुंबईकडून रणजी ट्रॉफी 2025 चा क्वार्टर फायनल सामना खेळण्यासाठी मैदानात उतरला.
पण सूर्यकुमार यादव या सामन्याच्या पहिल्या डावात पूर्णपणे अपयशी ठरला. सामन्याच्या पहिल्याच चेंडूवर मुंबईने या डावातील पहिली विकेट गमावली. आयुष म्हात्रे खाते न उघडताच पॅव्हेलियनमध्ये परतला. यानंतर, दुसरा सलामीवीर आकाश आनंद जास्त काळ क्रीजवर टिकू शकला नाही, त्याने 21 चेंडूत 10 धावा काढल्यानंतर आपली विकेट गमावली.
यानंतर मुंबई संघाला सिद्धेश लाडच्या रूपाने चौथा धक्का बसला. सिद्धेश लाडनेही 15 चेंडूंचा सामना केला आणि त्याला फक्त 4 धावा करता आल्या. त्यानंतर सूर्यकुमार यादव फलंदाजीला आला, पण सूर्यालाही काही खास करता आले नाही. तो फक्त 9 धावा काढून पॅव्हेलियनमध्ये परतला. यादरम्यान त्याने 2 चौकार मारले. मुंबई संघाने मोठ्या सामन्यात आपले पहिले 4 विकेट फक्त 25 धावांत गमावले.
गेल्या 10 डावांमध्ये सूर्या ठरला अपयशी
सूर्यकुमार यादवच्या गेल्या 10 डावांवर नजर टाकली तर, तो सतत अपयशी ठरत आहे. सूर्याने भारतासाठी पाच टी-20 सामने खेळले. या काळात तो दोनदा शून्यावर बाद झाला. एकदा तो 2 धावा काढून बाद झाला होता. राजकोटमध्ये 14 आणि चेन्नईमध्ये 12 धावा केल्यानंतर तो बाद झाला. गेल्या पाच सामन्यांमध्ये सूर्याने मुंबईसाठी काही खास कामगिरी केलेली नाही. गेल्या वर्षी 21 डिसेंबर रोजी कर्नाटकविरुद्ध 20 धावा केल्यानंतर तो बाद झाला होता. यानंतर, 23 डिसेंबर रोजी, हैदराबादविरुद्ध 18 धावा करून तो बाद झाला. पंजाब आणि पुद्दुचेरीविरुद्ध खातेही उघडू शकले नाही.
सूर्याने आतापर्यंत त्याच्या कारकिर्दीत 81 टी-20 आंतरराष्ट्रीय सामने खेळले आहेत. या सामन्यांच्या 77 डावांमध्ये त्याने 39.33 च्या सरासरीने आणि 167.70 च्या स्ट्राईक रेटने 2596 धावा केल्या आहेत. या काळात त्याने 4 शतके आणि 21 अर्धशतके झळकावली आहेत.
हे ही वाचा -
महत्त्वाच्या बातम्या
