Jasprit Bumrah : बुमराह टी20 विश्वचषक स्पर्धेत खेळण्याची शक्यता, कोच राहुल द्रविडनं दिली महत्त्वाची माहिती
Jasprit Bumrah in Team India : जसप्रीत बुमराह पाठीच्या दुखापतीमुळे दक्षिण आफ्रिकेविरुद्धच्या टी20 मालिकेतून बाहेर झाला आहे.ज्यानंतर आता तो विश्वचषक खेळणार का? हा मोठा प्रश्न सर्वांसमोर आहे.
Jasprit Bumrah in T20 World Cup : भारताचा आघाडीचा गोलंदाज जसप्रीत बुमराह (Jasprit Bumrah) दुखापतीमुळे दक्षिण आफ्रिकेविरुद्धच्या टी20 मालिकेतून बाहेर झाला आहे. आता तो टी-20 विश्वचषकात (T20 World Cup 2022) तरी संघात खेळेल का हा प्रश्न सर्व भारतीय क्रिकेट चाहत्यांसमोर आहे. बऱ्याच ठिकाणहून समोर येणाऱ्या माहितीनुसार बुमराह टी-20 विश्वचषकातही नसल्याचं समोर येत असताना आता भारतीय संघाचे मुख्य प्रशिक्षक राहुल द्रविड (Rahul Dravid) यांनी महत्त्वाची माहिती दिली आहे. बुमराह अजूनतरी विश्वचषकात नसल्याचं अधिकृतपणे समोर आलं नसून नुकतीच सौरव गांगुलीनेही बुमराहच्या पुनरागमनाची आशा व्यक्त केली होती.
दक्षिण आफ्रिकेविरुद्धच्या दुसऱ्या T20 सामन्यापूर्वी पत्रकारांशी बोलताना राहुल द्रविड म्हणाला, "मी वैद्यकीय अहवाल फार डिटेलमध्ये पाहिलेले नाहीत. त्याबद्दल तज्ज्ञ पाहत आहेत. सध्या बुमराह संघाबाहेर आहे आणि त्याची काळजी घेतली जात आहे. भविष्यात काय होते ते आम्हाला लवकरच कळेल. जोपर्यंत तो विश्वचषकाबाहेर आहे हे मला अधिकृतपणे कळत नाही तोपर्यंत मी आशा सोडणार नाही."
बुमराहला पाठीची दुखापत
गुरुवारी (29 सप्टेंबर) समोर आलेल्या माहितीनुसार जसप्रीत बुमराहच्या पाठीला दुखापत झाली असून ऑस्ट्रेलियात पुढच्या महिन्यापासून खेळल्या जाणाऱ्या टी-20 विश्वचषकात तो खेळणार नसल्याचं पीटीआयनं बीसीसीआयच्या सुत्रांच्या हवाल्यानं सांगितलं. बुमराह इंग्लंड दौऱ्यात दुखापतग्रस्त झाल्यानंतर आशिया कप सामन्यांनाही मुकला. त्यानंतर विश्वचषकाची तयारी म्हणून बुमराहला संघात पुन्हा बोलवण्यात आलं त्यानंतर ऑस्ट्रेलियाविरुद्ध अखेरचे दोन सामने तो खेळला पण आता दक्षिण आफ्रिकेविरुद्धही तो दुखापतीमुळे बाहेर गेला आहे. दरम्यान बुमराहला दुखापतीतून सावरण्यासाठी योग्य वेळ दिला न गेल्याने तो आता पुढील काही महिने सामने खेळू शकणार नाही असं दिसून येत असल्याने भारतीय क्रिकेट फॅन्स बीसीसीआयवर प्रश्न उपस्थित करत आहेत.
बुमराहचीऐवजी कोणाला संधी?
टी-20 विश्वचषकातील राखीव खेळाडूंमध्ये दीपक चाहर आणि मोहम्मद शामी दोन वेगवान गोलंदाजांचा समावेश आहे. महत्वाचं म्हणजे, संघातील महत्वाचा खेळाडूला दुखापत झाल्यास राखीव खेळाडूला प्लेईंग इलेव्हनमध्ये खेळवलं जातं. ऑस्ट्रेलिया आणि दक्षिण आफ्रिकेविरुद्ध टी-20 मालिकेत दीपक चाहरनं चांगली गोलंदाजी केलीय. दक्षिण आफ्रिकेविरुद्ध पहिल्या टी-20 सामन्यात दीपक चाहरनं चार षटकात 24 धावा देऊन दोन विकेट्स घेतल्या. परंतु, जसप्रीत बुमराहऐवजी कोणला भारतीय संघात संधी मिळेल? हा प्रश्न उपस्थित होत आहे. दीपक चाहर, मोहम्मद शामी किंवा अन्य कोण? हे येत्या काही दिवसांत स्पष्ट होईल.
हे देखील वाचा -
महत्त्वाच्या बातम्या
