ICC Injury Rules : ऋषभ पंतमुळे कसोटी क्रिकेटमध्ये होणार 'क्रांतिकारी' बदल; नव्या नियमाबाबत चर्चा सुरू; महत्त्वाची अपडेट आली समोर
मँचेस्टर कसोटीच्या पहिल्याच दिवशी भारताचा यष्टीरक्षक ऋषभ पंतला गंभीर दुखापत झाली.
ICC may approve replacements for external injuries in Test Cricket : मँचेस्टर कसोटीच्या पहिल्याच दिवशी भारताचा यष्टीरक्षक ऋषभ पंतला गंभीर दुखापत झाली. दुखापत इतकी होती की त्याला तात्काळ मैदानाबाहेर न्यावं लागलं. यानंतर क्रिकेटमध्ये ‘लाइक-टू-लाइक’ रिप्लेसमेंटचा मुद्दा जोरात चर्चेत आला आहे. अनेक तज्ज्ञ आणि चाहत्यांचं मत आहे की, मैदानावर झालेल्या गंभीर दुखापतीसाठी संघाला दुसरा खेळाडू मिळाला पाहिजे. विशेष म्हणजे आता आयसीसीदेखील या सूचनेवर विचार करत असल्याची माहिती समोर येते आहे.
दुसऱ्या दिवशी ऋषभ पंतने दुखापतीसह फलंदाजी केली. चाहत्यांनी त्याच्या जिद्दीचं कौतुक केलं, पण खरंतर भारताला ही जोखीम घेणं भाग पडलं. कारण सध्याच्या नियमानुसार, सबस्टिट्यूट खेळाडूंना केवळ क्षेत्ररक्षणाची परवानगी आहे, ते फलंदाजी किंवा गोलंदाजी करू शकत नाहीत.
नियमात लवकरच होणार बदल
मीडिया रिपोर्ट्सनुसार, वर्षाअखेरीस आयसीसी हा नियम बदलू शकते. नव्या प्रस्तावित नियमांनुसार, ज्या प्रकारचा खेळाडू दुखापतग्रस्त झाला आहे, त्याच प्रकारच्या खेळाडूला रिप्लेसमेंट म्हणून मैदानात उतरवण्याची परवानगी दिली जाऊ शकते. याबद्दल एका सूत्राने सांगितले की, “संभावना आहे की गंभीर दुखापतीसाठी संघांना तत्काळ रिप्लेसमेंट देण्याची परवानगी दिली जाईल. ही बाब सध्या चर्चेत आहे आणि आगामी आयसीसी क्रिकेट कमिटीच्या बैठकीत यावर निर्णय होऊ शकतो.”
A standing ovation for Rishabh Pant at Old Trafford after he came out to bat despite an injury 👏#WTC27 | #ENGvIND pic.twitter.com/W1W2gwuY48
— ICC (@ICC) July 24, 2025
आधीच ट्रायलची घोषणा
याआधी जूनमध्येच आयसीसीने ‘रिप्लेसमेंट प्लेयर’ कंडिशनचा ट्रायल केला जाईल असं जाहीर केलं होतं. त्यात असं स्पष्ट करण्यात आलं की, “सामना सुरू झाल्यानंतर (प्री-मॅच वॉर्मअपसहित) जर एखाद्या खेळाडूला गंभीर दुखापत झाली, तर उर्वरित सामन्यासाठी त्याच दर्जाचा दुसरा खेळाडू त्याच्या जागी येऊ शकतो.”
माइकल वॉनचा पाठिंबा
इंग्लंडचा माजी कर्णधार मायकेल वॉन याबाबतीत नेहमीच स्पष्ट भूमिका घेत आला आहे. दोन महिन्यांपूर्वी बीबीसीशी बोलताना तो म्हणाला होता, “जर पहिल्या डावात एखाद्या खेळाडूला खरी दुखापत झाली, तर त्याचा रिप्लेसमेंट मिळाला पाहिजे. प्रेक्षक पैसे देऊन सामना पाहायला येतात, तेव्हा त्यांना संपूर्ण अनुभव मिळायला हवा. त्यामुळे पहिला डाव हे एक योग्य कटऑफ ठरू शकतो.”
थोडक्यात, ऋषभ पंतच्या दुखापतीमुळे क्रिकेटच्या जुन्या नियमांवर प्रश्न उपस्थित झाले आहेत, आणि आता आयसीसीकडून बदलाची शक्यता निर्माण झाली आहे. जर हे नियम बदलले, तर भविष्यात कोणत्याही संघाला दुखापतीच्या प्रसंगी चांगला पर्याय मिळू शकतो.
हे ही वाचा -
महत्त्वाच्या बातम्या
