एक्स्प्लोर

मुंबईकर निवडणार टीम इंडियाचा संघ, अजित आगरकर निवड समितीचा नवा अध्यक्ष

Ajit Agarkar: भारताचा माजी अष्टपैलू खेळाडू अजित आगरकर याची भारतीय क्रिकेट संघाच्या निवड समितीचा अध्यक्ष म्हणून निवड झाली आहे.

By : एबीपी माझा ब्युरो | Updated at : 04 Jul 2023 09:50 PM (IST)

Ajit Agarkar

Source : Getty Images

Ajit Agarkar: भारताचा माजी अष्टपैलू खेळाडू अजित आगरकर याची भारतीय क्रिकेट संघाच्या निवड समितीचा अध्यक्ष म्हणून निवड झाली आहे. बीसीसीआयने ट्वीट करत याबाबतची माहिती दिली आहे. अजित आगरकर याने याआधी मुंबई संघाच्या निवड समितीचे अध्यक्षपदही भूषावले आहे. त्याशिवाय तो आयपीएलमध्ये दिल्ली संघाचा गोलंदाजी कोच होता. निवड समितीसाठी आलेल्या अर्जदारामध्ये अजित आगरकर याचा अनुभव सर्वात जास्त होता. त्यामुळे त्याची निवड करण्यात आल्याचे बीसीसीआयने सांगितले.

जतिन परांजपे, अशोक मल्होत्रा आणि सुलक्षणा नायक या सीएसी समितीने निवड समितीच्या अध्यक्षासाठी मुंबईत मुलाखती घेतल्या. यामध्ये त्यांनी अजित आगरकर याची मुख्य निवड समितीचा अध्यक्ष म्हणून निवड केली. देशांतर्गत क्रिकेटमध्ये अजित आगरकर 11 फर्स्ट क्लास सामने, 270 लिस्ट ए सामने आणि 62 टी 20 सामने खेळला आहे. दक्षिण आफ्रिका येथे 2007 मध्ये धोनीच्या नेतृत्वात भारताने टी 20 विश्वचषकावर नाव कोरले होते, त्या संघाचा अजित आगरकर सदस्य होता. एकदिवसीय सामन्यात सर्वात वेगवान अर्धशतक झळकावण्याचा विक्रम अद्यापही अजित आगरकर याच्या नावावर आहे. त्याने 21 चेंडूत अर्धशशतक झळकावले आहे. त्याशिवाय वनडेमध्ये सर्वात वेगवान 50 विकेट घेण्याचा विक्रमही त्याच्याच नावावर आहे. 23 एकदिवसीय सामन्यात आगरकर याने 50 विकेट घेतल्या आहेत.

अजित आगरकर निवड समितीचा अध्यक्ष म्हणून काम पाहणार आहे. तर शिवसुंदर दास, सुब्रतो बॅनर्जी, सलील अंकोला श्रीधरन श्रीनाथ हे निवड समितीचे सदस्य असतील. अजित आगरकर याने आतापर्यंत 26 कसोटी, 191 वनडे आणि 4 टी 20 सामन्यात भारतीय संघाचं प्रतिनिधित्व केलेय. त्याशिवाय 42 आयपीएलचे सामने खेळले आहेत. 2021 मध्येही निवड समितीच्या अध्यक्षपदासाठी अजित आगरकर याच्या नावाची चर्चा होती. अजित आकरगर याने त्यावेळीही मुलाखत दिली होती, पण चेतन शर्मा यांच्याकडे ही जबाबदारी सोपवण्यात आली होती.

अजित आगरकरचं करिअर...

45 वर्षीय अजित आगरकर हा रमाकांत आचरेकर यांचा शिष्य राहिला आहे. अजित आगरकर याने 26 कसोटी सामन्यात 59 विकेट घेतल्या आहेत. तर 191 एकदिवसीय सामन्यात 288 विकेट घेतल्या आहेत. त्यासइवाय 4 टी 20 सामन्यात तीन विकेट घेतल्या आहेत. 42 आयपीएल सामन्यात 29 विकेट घेतल्या आहेत. त्याशइवाय कसोटीमध्ये अजित आगरकर याने 571 धावा केल्या आहेत. 191 वनडेमध्ये 1269 धावा चोपल्या आहेत. आयपीएलमध्ये दिल्ली कॅपिटल्स संघासोबत गोलंदाजी प्रशिक्षक म्हणून काम पाहिले आहे.