भाजप उमेदवारासाठी मतदारांना 3 हजारांचं पाकीट, शिवसेना कार्यकर्त्यांची धाड; डोंबिवलीतील धक्कादायक प्रकार

भाजपने सर्वाधिक बिनविरोध जागा जिंकल्या त्या भाजप प्रदेशाध्यक्ष रवींद्र चव्हाण यांच्या कल्याण डोंबिवली महापालिकेत. येथे भाजपने 15 जागा बिनविरोध निवडून आणल्या आहेत.

BJP dombivali distribute money to voter

भाजपने सर्वाधिक बिनविरोध जागा जिंकल्या त्या भाजप प्रदेशाध्यक्ष रवींद्र चव्हाण यांच्या कल्याण डोंबिवली महापालिकेत. येथे भाजपने 15 जागा बिनविरोध निवडून आणल्या आहेत. तरीही येथे भाजप उमेदवारासाठी पैसे वाटप होत असल्याचे समोर आले.

निवडणूक प्रचारादरम्यान पांढऱ्या पाकिटात 3000 रुपये म्हणजे 500 रुपयांच्या 6 नोटा टाकून हे पैसे वाटप केले जात असल्याचे आढळून आल्याने येथे चांगलाच गोंधळ उडाला आहे.

डोंबिवलीच्या तुकाराम नगर परिसरातील दशरथ भुवन परिसरात भाजपकडून तीन हजार रुपयांची पाकीटे नागरिकांच्या घरी पोहोचवण्यात येत आहेत. येथील शिवसेनेचे उमेदवार नितीन पाटील आणि त्यांच्या कार्यकर्त्यांनी पैसे वाटणाऱ्याना रंगेहाथ हात पकडल्याने हे उघडकीस आलं.

येथील प्रभागात भाजप आणि शिवसेना यांच्यात मैत्रिपूर्ण लढत होत आहे. त्यामुळे, भाजप उमेदवाराविरुद्ध शिवसेना उमेदवार येथे निवडणुकीच्या मैदानात आहे. त्यामुळे, येथे महायुतीतील दोन पक्षांतच थेट लढत होत असल्याने मोठी रस्सीखेंच पाहायला मिळते.

या घटनेनंतर निवडणूक आयोगाचे पथक व पोलीसही घटनास्थळी दाखल झाले आहेत. मात्र, भाजपने सर्वाधिक जागा बिनविरोध केलेल्या महापालिकेतही भाजप उमेदवाराकडून पैशांचं अशाप्रकारे होत असलेलं वाटप चर्चेत आहे.

पैसे वाटपावेळी पकडलेले लोक विशू पेडणेकर यांचे कार्यकर्ते असल्याचं समोर आलं आहे, विशेष म्हणजे शिवसेना शिंदे गटाचे कार्यकर्ते व्हिडिओ बनवून हा पैसे वाटपाचा डाव उधळत आहेत. हेही व्हिडिओत दिसत आहे.

भाजप आणि शिवसेना पक्षाचे कार्यकर्ते आणि पोलीसही येथील घरात एकमेकांशी भिडताना दिसून येतात. एका महिला हे पैसे माझे असल्याचे सांगते. मात्र, तिथे भाजप उमेदवाराच्या प्रचाराचे पत्रकंही आढळून येतात.

दरम्यान, यावेळी दोन्ही पक्षाच्या कार्यकर्त्यांमध्ये शाब्दिक चकमक झाली असून पोलिसांनी मध्यस्थी केल्याचंही पाहायला मिळालं.