RBI Repo Rate : आरबीआयच्या निर्णयाकडे लक्ष, रेपो रेट किती घटवणार? गृहकर्जाचा व्याज दर 8 टक्क्यांच्या खाली येणार?

RBI Repo Rate : रिझर्व्ह बँक ऑफ इंडियाच्या पतधोरण समितीची बैठक सुरु आहे. आरबीआयचे गव्हर्नर संजय म्हलोत्रा पतधोरण उद्या सकाळी 10 वाजता जाहीर करतील.

आरबीआय

आर्थिक वर्ष 2025-26 मधील पहिलं पतधोरण आरबीआयकडून जाहीर केलं जाणार आहे. आरबीआयच्या पतधोरण विषयक समितीची बैठक सुरु आहे. या बैठकीत काय निर्णय होतो, याकडे सर्वांचं लक्ष लागलं आहे.

बाजार आणि अर्थशास्त्रज्ञांच्या अंदाजानुसार आरबीआयकडून रेपो रेट 25 बेसिस पॉईंटची कपात केली जाऊ शकते. जर, रेपो रेट 6 टक्क्यांवर आला तर गृहकर्जाचे व्याज दर 8 टक्क्यांच्या खाली येऊ शकतात. सध्या बँक आणि हाऊसिंग फायनान्स कंपन्या 8.10 टक्के ते 8.75 टक्के व्याजदरावर कर्ज देत आहेत.

महागाई कमी असते किंवा विकासाच्या वाढीचा वेग मंदावतो तेव्हा रेपो रेट घटवण्याचा निर्णय आरबीआयकडून घेतला जातो. सध्या दोन्ही गोष्टी सकारात्मक असल्यानं आरबीआयकडून 25 बेसिस पॉईंटची कपात केली जाऊ शकते. म्हणजेच रेपो रेट 6 टक्क्यांवर येईल.

जानेवारी ते एप्रिल दरम्यान अनेक सरकारी आणि खासगी बँकांनी त्यांच्या गृहकर्जात 5-25 बेसिस पॉईंटची कपात केली आहे. आबीआयच्या नियमानुसार 1 ऑक्टोबर 2019 नंतर ज्यांनी फ्लोटिंग व्याजदरावर कर्ज घेतलं आहे त्यांना बाहेरच्या बेंचमार्कशी जोडणं गरजचं आहे.त्यामुळं आरबीआयनं रेपो रेट घटवल्यास बँकांना देखील गृह कर्जावरील व्याज घटवावं लागू शकतं.

जर आरबीआयनं रेपो रेटमध्ये कपात केली तर गृहकर्ज देखील स्वस्त होऊ शकतं. याचा फायदा नवं गृहकर्ज घेणाऱ्यांना आणि फ्लोटिंग इंटरेस्ट रेट असणाऱ्यांना फायदा होईल.