Nepal Protest: नेपाळ हिंसाचारात मृत्युमुखी पडलेल्यांना शहीद दर्जा; पीडितांना 10 लाखांची भरपाई, अंतरिम पंतप्रधान म्हणाले सहा महिन्यांत निवडणूक घेत सत्ता सोडणार
Nepal Protest: हिंसाचारानंतर, नेपाळचे तीन माजी पंतप्रधान केपी शर्मा ओली, शेर बहादूर देउबा आणि पुष्प कमल दहल प्रचंड बेघर झाले आहेत. 9 सप्टेंबर रोजी आंदोलकांनी त्यांची घरे जाळली आहेत.
Nepal Protest: जनरेशन झेड चळवळीत मृत्युमुखी पडलेल्यांना शहीद दर्जा तसेच पीडितांच्या कुटुंबियांना प्रत्येकी 10 लाख नेपाळी रुपये भरपाई देखील दिली जाईल, अशी घोषणा पदभार स्वीकारल्यानंतर, नेपाळच्या अंतरिम पंतप्रधान सुशीला कार्की यांनी केली आहे. या हिंसाचारात 51 जणांचा मृत्यू झाला, ज्यामध्ये एका भारतीय महिलेचा समावेश आहे. कार्की यांनी भ्रष्टाचार संपवण्याची शपथही घेतली. त्या म्हणाल्या की, 'नेपाळमध्ये पहिल्यांदाच 27 तास सतत आंदोलन झाले.'
मी सहा महिन्यांपेक्षा जास्त काळ सत्तेत राहणार नाही
कार्की यांनी सांगितले की, 'मी ६ महिन्यांपेक्षा जास्त काळ सत्तेत राहणार नाही आणि नवनिर्वाचित संसदेकडे सत्ता सोपवीन.' 12 सप्टेंबर रोजी पंतप्रधानपद स्वीकारल्यानंतर, कार्की यांना 5 मार्च 2026 रोजी नेपाळमध्ये सार्वत्रिक निवडणुका घेण्याची जबाबदारी देण्यात आली.
नेपाळ हिंसाचारात 3 माजी पंतप्रधान बेघर
हिंसाचारानंतर, नेपाळचे तीन माजी पंतप्रधान केपी शर्मा ओली, शेर बहादूर देउबा आणि पुष्प कमल दहल प्रचंड बेघर झाले आहेत. 9 सप्टेंबर रोजी आंदोलकांनी त्यांची घरे जाळली आहेत. सध्या हे सर्वजण लष्कराच्या छावण्यांमध्ये आहेत. त्यांचे समर्थक त्यांच्या नेत्यांसाठी भाड्याने घरे शोधण्यात व्यस्त आहेत. हे नेते काही दिवस काठमांडूबाहेरील पोखरासारख्या शहरात राहू इच्छितात, जेणेकरून त्यांना पुन्हा जनरल-झेडच्या रोषाचा सामना करावा लागू नये.
15 मंत्र्यांची नावे विचारात घेतली जात आहेत
पंतप्रधान झाल्यानंतर सुशीला कार्की मंत्रिमंडळ स्थापनेवर काम करत आहेत. काठमांडू पोस्टनुसार, कार्की 15 पेक्षा जास्त मंत्र्यांसह मंत्रिमंडळ स्थापन करू शकतात. मंत्रीपदांसाठी विचारात घेतलेल्या नावांमध्ये कायदेतज्ज्ञ ओम प्रकाश अर्याल, माजी लष्करी अधिकारी बालानंद शर्मा, निवृत्त न्यायमूर्ती आनंद मोहन भट्टराई, माधव सुंदर खडका, आशिम मान सिंह बसन्यात आणि ऊर्जातज्ज्ञ कुलमन घिसिंग यांचा समावेश आहे. यासोबतच डॉ. भगवान कोइराला, डॉ. संदुक रुईत, डॉ. जगदीश अग्रवाल आणि डॉ. पुकार चंद्र श्रेष्ठा यासारख्या लोकांची नावे विचारात घेतली जात आहेत. जनरल-झेडचे सदस्यही या निर्णयात सहभागी होत आहेत. यासाठी ते ऑनलाइन मतदानाचा आधार घेत आहेत. जर या नावांवर एकमत झाले तर मंत्रिमंडळ रविवारी संध्याकाळपर्यंत शपथ घेऊ शकते. तथापि, ते सोमवारपर्यंत पुढे ढकलले जाऊ शकते.
इतर महत्वाच्या बातम्या
महत्त्वाच्या बातम्या
