S Jaishankar Pakistan Visit : मोदी सरकारमधील मंत्री तब्बल 9 वर्षांनी पाकिस्तानात जाणार, इम्रान खान यांच्या पक्षाने घेतला वेगळाच निर्णय!
S Jaishankar Pakistan Visit : परराष्ट्र मंत्री जयशंकर 15-16 ऑक्टोबरला पाकिस्तानला भेट देणार आहेत. येथे ते SCO च्या सरकार प्रमुखांच्या (CHG) बैठकीला उपस्थित राहतील.
S Jaishankar Pakistan Visit : पाकिस्तानचे माजी पंतप्रधान इम्रान खान यांचा पक्ष पाकिस्तान तहरीक-ए-इन्साफ (पीटीआय) ने म्हटले आहे की ते त्यांच्या निषेधासाठी भारताचे परराष्ट्र मंत्री एस जयशंकर यांना आमंत्रित करणार आहेत. पाकिस्तानी मीडिया 'द न्यूज इंटरनॅशनल'नुसार, पीटीआयचे माहिती सल्लागार बॅरिस्टर अली सैफ यांनी ही माहिती दिली. जिओ न्यूज चॅनलच्या शोमध्ये सैफ म्हणाले की, भारत हा जगातील सर्वात मोठा लोकशाही असल्याचा दावा करतो. पाकिस्तान सरकार त्यांना दाखवत आहे की इथे निषेधाला जागा नाही. त्यांनी इस्लामाबादच्या बाहेर 10 हजार कंटेनर उभे केले आहेत.
जयशंकर यांनी आमच्या रॅलीला संबोधित करावे
पीटीआय नेत्याने सांगितले की, "जयशंकर यांनी आमच्या रॅलीला संबोधित करावे अशी आमची इच्छा आहे, जेणेकरुन भारताला कळेल की पाकिस्तान देखील एक मजबूत लोकशाही देश आहे. येथील लोक निश्चितच गरज असेल तेव्हा निषेध करण्याचा त्यांचा अधिकार वापरतात." पाकिस्तानमध्ये माजी पंतप्रधान इम्रान खान यांच्या आवाहनावर एहरीक-ए-इन्साफ पक्षाचे कार्यकर्ते निदर्शने करत आहेत. हे कार्यकर्ते इम्रान खान यांच्या सुटकेची मागणी करत आहेत. शनिवारी शेकडो कार्यकर्ते आंदोलनासाठी डी चौकाकडे जात होते, त्यांना रोखण्यासाठी पोलिसांनी अश्रुधुराच्या नळकांड्या फोडल्या. यावेळी पीटीआय कार्यकर्त्यांनी पोलिसांवर दगडफेकही केली. राजधानी इस्लामाबादमध्ये पोलिसांनी मोबाईल सेवा आणि इंटरनेटवर बंदी घातली आहे. इस्लामाबाद आणि लाहोरसह अनेक शहरांमध्ये सुरक्षा सुधारण्यासाठी लष्कराला पाचारण करण्यात आले आहे. SCO बैठक होईपर्यंत लष्कराचे जवान शहराच्या सुरक्षेत राहतील.
जयशंकर एससीओ बैठकीसाठी पाकिस्तानला जाणार
परराष्ट्र मंत्री जयशंकर 15-16 ऑक्टोबरला पाकिस्तानला भेट देणार आहेत. येथे ते SCO च्या सरकार प्रमुखांच्या (CHG) बैठकीला उपस्थित राहतील. परराष्ट्र मंत्रालयाने शुक्रवारी ही माहिती दिली. 2015 मध्ये सुषमा स्वराज नंतर भारतीय मंत्र्याची ही पहिलीच पाकिस्तान भेट असेल. 8 फेब्रुवारी रोजी पाकिस्तानमध्ये निवडणूक निकाल जाहीर झाल्यानंतर, इम्रान खान यांच्या पक्षाने 7 सप्टेंबर रोजी पहिली रॅली काढली. न्यायालयाने घातलेल्या बंदीमुळे इम्रानच्या पक्षाला निवडणूक लढवता आली नाही, त्यांच्या उमेदवारांनी अपक्ष म्हणून निवडणूक लढवली. रॅलीदरम्यान, नॅशनल असेंब्लीमधील पीटीआय नेते उमर अयुब खान म्हणाले होते की, इम्रान खानची सुटका होईपर्यंत पक्ष गप्प बसणार नाही. आम्ही इम्रान खानचे सैनिक आहोत आणि जोपर्यंत त्यांची सुटका होत नाही तोपर्यंत बसणार नाही, असे ते म्हणाले होते.
इम्रान गेल्या वर्षी ऑगस्टपासून तुरुंगात
तोशाखान्याशी संबंधित भ्रष्टाचार प्रकरणात दोषी ठरल्यानंतर इम्रान खान यांना गेल्यावर्षी 5 ऑगस्टला अटक करण्यात आली होती. तेव्हापासून तो अनेक गुन्ह्यांमध्ये तुरुंगात आहे. रविवारी इम्रानने तुरुंगात 400 दिवस पूर्ण केले. 13 जुलै रोजी इस्लामाबाद कोर्टाने इमरान खान आणि त्यांची पत्नी बुशरा बीबी यांची बनावट निकाह प्रकरणात निर्दोष मुक्तता केली होती. त्यांना तातडीने सोडण्यात यावे, असे न्यायालयाने म्हटले होते. न्यायालयाच्या आदेशानंतर अवघ्या 5 तासांनंतर नॅशनल अकाउंटेबिलिटी ब्युरो (NAB) च्या टीमने त्याला तोशाखान्याशी संबंधित आणखी एका प्रकरणात अटक केली.
इतर महत्वाच्या बातम्या
महत्त्वाच्या बातम्या
ट्रेंडिंग न्यूज
