Meloni vs Trump : ट्रम्प म्हणाले, मेलोनींनी माझ्यासोबत फोटो काढण्यासाठी भीक मागितली; जॉर्जिया मेलोनी भडकल्या, खोट्यालाही काही मर्यादा असतात...

Meloni vs Trump Controversy: अमेरिकेचे राष्ट्राध्यक्ष डोनाल्ड ट्रम्प यांनी जी-7 शिखर परिषदेतील फोटोवरून केलेल्या दाव्यावर इटलीच्या पंतप्रधान जॉर्जिया मेलोनी यांनी तीव्र संताप व्यक्त केला आहे. 

Giorgia Meloni Donald Trump Clash

Source : abp majha

मुंबई : आपल्या वादग्रस्त वक्तव्यांसाठी प्रसिद्ध असलेले अमेरिकेचे अध्यक्ष डोनाल्ड ट्रम्प (Donald Trump) यांनी नुकत्याच केलेल्या एका वक्तव्यावरून अमेरिका आणि इटलीमधील संबंध ताणले आहेत. जॉर्जिया मेलोनी(Giorgia Meloni)  यांनी आपल्यासोबत एक फोटो काढण्यासाठी गयावया केली, मला त्यांची कीव आली, असं वक्तव्य ट्रम्प यांनी केलं होतं. त्यावर आता मेलोनी यांनी प्रत्युत्तर दिलं. खोट्यालाही काही मर्यादा असतात, इटली कुणासमोर भीक मागत नाही, अशा शब्दात मेलोनी यांनी त्यांचा संताप व्यक्त केला. डोनाल्ड ट्रम्प यांच्या वक्तव्यानंतर इटलीने त्यांचा अमेरिकाचा दौराही रद्द करत नाराजी व्यक्त केली आहे. 

अमेरिकेचे राष्ट्राध्यक्ष आपल्याच मित्र देशांसोबत अशा प्रकारचे वर्तन करतात, हे पाहून आपल्याला अत्यंत आश्चर्य आणि दुःख झाल्याचं मेलोनी यांनी म्हटलं आहे. त्यांची वक्तव्य म्हणजे निव्वळ थापा असतात, असंही मेलोनी म्हणाल्या. 

Giorgia Meloni Statement On Trump : खोट्यालाही काही मर्यादा असते

पंतप्रधान मेलोनी यांनी स्पष्ट शब्दांत सांगितलं की, "ट्रम्प यांचं वक्तव्य तथ्यांपासून कोसो दूर आहे. असं घडण्याची ही पहिलीच वेळ नाही, परंतु हे अत्यंत लज्जास्पद आहे. काही गोष्टींना तात्काळ उत्तर देणं अत्यंत गरजेचं असतं. डोनाल्ड ट्रम्प यांचं विधान पूर्णपणे खोटं आहे. जेवढी सक्ती आणि कठोरपणा ट्रम्प आपल्या मित्र देशांच्या विरोधात दाखवतात, तेवढीच ठाम भूमिका ते पाश्चात्य देशांचे विरोधक आणि अमेरिकेच्या मुख्य प्रतिस्पर्ध्यांसमोर का दाखवत नाहीत? ट्रम्प हे अशा जागतिक नेत्यांबद्दल मवाळ भूमिका घेतात, ज्यांची धोरणे पाश्चात्य देशांच्या हिताच्या पूर्णपणे विरोधात आहेत."

आपल्या भाषणाच्या शेवटी त्यांनी ट्रम्प यांना सर्वात कडक इशारा दिला. त्या म्हणाल्या, "एक गोष्ट त्यांनी नीट लक्षात ठेवावी, मी आणि इटली देश कधीही कोणाकडे भीक मागत नाही."

Io e l’Italia non imploriamo mai. pic.twitter.com/sTpKlqWB67

— Giorgia Meloni (@GiorgiaMeloni) June 19, 2026

Donald Trump On Giorgia Meloni : ट्रम्प यांनी नेमका काय दावा केला होता?

अमेरिकेचे राष्ट्राध्यक्ष डोनाल्ड ट्रम्प यांनी एका टीव्ही चॅनेलला दिलेल्या मुलाखतीत जी-7 शिखर परिषदेतील (G7 Summit) एका फोटोचा संदर्भ देत मेलोनी यांच्यावर टिप्पणी केली होती. ट्रम्प म्हणाले होते की, "जॉर्जिया मेलोनी यांनी जी-7 शिखर परिषदेत माझ्यासोबत फोटो काढण्यासाठी अक्षरशः गयावया केली होती. मला त्यांची दया आली, म्हणून मी त्यांच्यासोबत फोटो काढू दिला. मी तसे करण्यास नकारही देऊ शकलो असतो, पण मला त्यांची कीव आली. माझ्याशी बोलून कदाचित त्यांना खूप आनंद झाला असेल, वास्तविक मला त्यांच्याशी बोलण्याची कोणतीही गरज नव्हती." 

डोनाल्ड ट्रम्प यांच्या याच विधानानंतर आंतरराष्ट्रीय राजकारणात मोठी खळबळ उडाली आहे. 

Italy Cancels US Trip : इटलीच्या उपपंतप्रधानांचा अमेरिका दौरा रद्द

ट्रम्प यांच्या या विधानाचे पडसाद आता दोन्ही देशांमधील राजनैतिक संबंधांवर उमटू लागले आहेत. इटलीचे उपपंतप्रधान आणि परराष्ट्र मंत्री अँटोनियो तजानी यांनी ट्रम्प यांच्या विधानाचा तीव्र निषेध केला आहे. तजानी यांनी स्पष्ट केलं की, "राष्ट्राध्यक्ष ट्रम्प यांनी पंतप्रधान जॉर्जिया मेलोनी यांच्या विरोधात केलेले वक्तव्य अत्यंत गंभीर आणि अपमानास्पद आहे. हा केवळ मेलोनी यांचा नाही, तर संपूर्ण इटली देशाचा अपमान आहे. याच कारणामुळे मी 21 आणि 21 जून रोजी असणारा माझा अधिकृत अमेरिका दौरा तात्काळ रद्द करत आहे."

ही बातमी वाचा: