Solapur Crime News : झोपेतून उठवल्याचा राग, बिहारी साथिदाराला हातोड्याने वार करुन संपवलं, करमाळ्यातील धक्कादायक घटना
Karmala Case Solapur : सोलापुरातील करमाळ्यामधील एका कंपनीत बिहारच्या कामगाराला संपवून आरोपी फरार झाला आहे. या प्रकरणी करमाळा पोलिसांत गुन्हा दाखल करण्यात आला आहे.
सोलापूर : करमाळा तालुक्यातील झरे फाटा येथील 'स्वराज्य सिमेंट पाईप कंपनी'च्या खोलीत एका कामगाराला लोखंडी हातोड्याने डोक्यात प्रहार करून निर्घृणपणे संपवलं. केवळ झोपेतून उठवल्याच्या क्षुल्लक कारणावरून झालेल्या वादातून हा थरार घडला आहे. याप्रकरणी करमाळा पोलीस ठाण्यात हत्येचा गुन्हा दाखल करण्यात आला आहे. महादेवकुमार मनोज शर्मा (मूळचा बिहारी, सध्या रा. झरे फाटा, करमाळा) असं मृत कामगाराचे नाव असून, आरोपी जयंतकुमार उमेश शर्मा हा घटनेनंतर पसार झाला आहे.
Karmala Incident Details : दरवाजा बंद करून झोपल्याने वाद
पोलीस सूत्रांनी दिलेल्या माहितीनुसार, 11 ऑगस्ट रोजी रात्री 9.30 च्या सुमारास आरोपी जयंतकुमार शर्मा खोलीचा दरवाजा बंद करून झोपला होता. मयत महादेवकुमार शर्मा याला त्याच खोलीत झोपायचे असल्याने त्याने खिडकीतून दगड मारून जयंतकुमारला झोपेतून उठवले. यावरून दोघांमध्ये जोरदार भांडण झाले.
या भांडणाचा राग मनात धरून रात्री 11.40 च्या सुमारास महादेवकुमार गाढ झोपेत असताना, जयंतकुमारने लोखंडी हातोड्याने त्याच्या डोक्यात सपासप वार केले. अत्यंत गंभीर दुखापत झाल्याने महादेवकुमारचा जागीच मृत्यू झाला, तर आरोपी जयंतकुमार तिथेच हातोडा टाकून पसार झाला.
Solapur Police Action : करमाळा पोलिसांत गुन्हा दाखल
घटनेची माहिती मिळताच सहाय्यक पोलीस अधीक्षक अंजना कृष्णा व्ही. एस. आणि करमाळा पोलीस ठाण्याचे पोलीस निरीक्षक रणजीत माने यांनी घटनास्थळी धाव घेऊन पाहणी केली. याप्रकरणी आरोपी जयंतकुमार उमेश शर्मा याच्या विरोधात भारतीय न्याय संहिता (BNS) 2023 च्या कलम 103(1) आणि 352 नुसार गुन्हा दाखल करण्यात आला आहे. तपासी पोलीस अधिकारी ढोरे या प्रकरणाचा पुढील तपास करत असून फरार आरोपीच्या शोधासाठी पोलीस पथके रवाना करण्यात आली आहेत.
ही बातमी वाचा:
महत्त्वाच्या बातम्या
