Confidence Vote Result : ब्रिटनचे पंतप्रधान बोरिस जॉन्सन 148 विरुद्ध 211 मतांनी विजयी

Boris Johnson Confidence Vote Results : वादाच्या भोवऱ्यात सापडलेले ब्रिटनचे पंतप्रधान (UK PM Confidence Vote) बोरिस जॉन्सन (Boris johnson) यांच्याविरोधातील अविश्वास प्रस्ताव त्यांनी जिंकला आहे.

Written By : एबीपी माझा वेब टीम | Edited By: श्रद्धा भालेराव | Updated at : 07 Jun 2022 06:28 AM (IST)

Boris Johnson Confidence Vote Results

Boris Johnson Confidence Vote Results : ब्रिटनच्या पंतप्रधानपदी अखेरीस बोरीस जॉन्सन कायम राहणार आहेत. काल (सोमवारी) ब्रिटिश सभागृहात आणलेला अविश्वास ठराव बोरीस जॉन्सन यांनी 211 मतं घेत जिंकला. ब्रिटनमध्ये कोरोना काळात झालेलं पार्टीगेट प्रकरण, वाढती महागाई यामुळे बोरीस जॉन्सन यांच्या सरकारवर टीकेची झोड उठलेली होती. ब्रिटनच्या 40 हून अधिक खासदारांनी जॉन्सन यांच्या राजीनाम्याची मागणी केली होती. मात्र अविश्वास ठराव जिंकल्यानं आता पुढील वर्षभर ब्रिटनच्या पंतप्रधान पदी बोरीस जॉन्सन कायम राहणार आहेत.

'पार्टीगेट' (Partygate) प्रकरणात वादात सापडलेले ब्रिटनचे (Britain) पंतप्रधान बोरिस जॉन्सन (Boris Johnson) यांनी त्यांच्याविरोधात आणलेला अविश्वास प्रस्ताव (No Confidence Motion) जिंकला आहे. विरोधकांच्या 148 मतांच्या विरोधात त्यांना 211 मतं मिळाली. हा अविश्वास प्रस्ताव जॉन्सनच्या कंझर्व्हेटिव्ह पक्षाच्या (Conservative Party) खासदारांनी आणला होता. जॉन्सन यांना पक्षाचे नेते आणि पंतप्रधानपदावरून हटवण्यासाठी बंडखोर खासदारांना 180 मतांची गरज होती.

विशेष म्हणजे, जून 2020 मध्ये डाऊनिंग स्ट्रीट (पंतप्रधानांचे निवासस्थान) येथे आयोजित एका वाढदिवसाच्या पार्टीत 40 हून अधिक खासदारांनी कोविड-19 लॉकडाऊनशी संबंधित नियमांचं उल्लंघन केल्याच्या आरोपावरून जॉन्सन यांच्या राजीनाम्याची मागणी केली होती. हे प्रकरण बर्‍याच काळापासून चर्चेत आहे आणि सर्वोच्च नागरी सेवक स्यू ग्रे यांच्या नेतृत्वाखालील तपासातील अपयशाबद्दलही अनेक प्रश्न उपस्थित केले गेले आहेत.

स्कॉटलंड यार्डच्या तपासणीनंतर प्रसिद्ध झालेल्या अहवालात म्हटलं आहे की, कोरोना व्हायरसचा प्रसार रोखण्यासाठी 2020-2021 लॉकडाऊन दरम्यान, सरकारी कार्यालयांमधील पक्षांनी नियमांचं उल्लंघन केलं. जॉन्सन आणि त्यांच्या पत्नी कॅरी यांच्यावर जून 2020 मध्ये डाऊनिंग स्ट्रीटच्या कॅबिनेट रुममध्ये लॉकडाऊन नियमांचं उल्लंघन करुन वाढदिवसाच्या पार्टीचं आयोजन केल्याप्रकरणी दंड आकारण्यात आला होता.

सध्याच्या कंझर्व्हेटिव्ह पक्षाच्या (Conservative Party) नियमांनुसार, बोरिस जॉन्सन (Boris Johnson) यांना या विजयानंतर किमान 12 महिन्यांपर्यंत अशा प्रकारच्या अविश्वास प्रस्तावाला (No Confidence Motion) सामोरं जावं लागणार नाही.

इतर महत्वाच्या बातम्या: