अखेर मुन्नाचा जंगलात पुन्हा मुक्त संचार, टिपेश्वर अभयारण्यात आढळलेल्या जखमी अस्वलावर उपचार

Wardha News Update : वर्धा जिल्ह्यातील टिपेश्वर अभयारण्याच्या वनपरिक्षेत्रात जखमी अवस्थेत आढळलेल्या अस्वलावर उपचार करून त्याला नैसर्गिक अधिवासात सोडण्यात आले.

bear

वर्धा : टिपेश्वर अभयारण्याच्या वनपरिक्षेत्रात जखमी अवस्थेत आढळलेल्या अस्वलावर उपचार करून त्याला नैसर्गिक अधिवासात सोडण्यात आले. करुणाश्रमातील कर्मचाऱ्यांनी लाडाने 'मुन्ना' असं त्याचं नाव ठेवलं. यवतमाळ जिल्ह्यातील पंढरकवड्यातील पारवा वनक्षेत्रात एक अस्वल जखमी असल्याचे दिसून आले. वर्ध्याच्या करुणाश्रमातील पीपल फॉर एनिमल्सच्या वन्यप्राणी बचाव पथकाला रात्री एक वाजता पाचारण करण्यात आले. 20 दिवसांच्या उपचारानंतर आणि जखम पूर्णपणे बरी झाल्यानंतर अस्वलाला त्याच्या नैसर्गिक अधिवासात मुक्त करण्यात आले. 

5 ऑगस्ट रोजी यवतमाळ जिल्ह्यातील पंढरकवड्यातील पारवा वनक्षेत्रात एक अस्वल जखमी असल्याचे दिसून आले. जखमी असलेल्या व वेदनेने विव्हळत असलेल्या अस्वलाला लवकरात लवकर बंदिस्त करणे आवश्यक होते. कारण जंगलालगतच्या गावकऱ्यांना यापासून धोका निर्माण झाला असता. गावात भीतीदायक वातावरण निर्माण झाले होते आणि मानव वन्यजीव संघर्षाने सुद्धा पेट घेतला असता. अशातच पांढरकवडा वनविभागाचे उपवनसंरक्षक किरण जगताप यांच्या नेतृत्वाखाली या अस्वलाला उपचारासाठी पिंजऱ्यात बंदीस्त करण्याची मोहीम सुरू झाली. 
 
यानंतर अस्वलाला योग्य पद्धतीने उपचार व बचाव मोहीम राबविण्यात यावीसाठी वर्धा करुणाश्रमातील पीपल फॉर एनिमल्स च्या वन्यप्राणी बचाव पथकाला रात्री एक वाजता पाचारण करण्यात आले. या अवाढव्य अस्वलाचा वावर नाल्याजवळ असल्याने वनविभागाने रात्री तिथेच पिंजरा लावला. पण रात्र असल्याने जंगलात जोखीम पत्करून  बऱ्याच अडचणींचा सामना करावा लागत होता. वनविभाग व करुणाश्रमातील चमू मार्फत संयुक्त रित्या राबविण्यात आलेल्या या बचाव मोहिमेला तीन तासाच्या अथक प्रयत्नांनंतर सकाळी अस्वलाला बंदीस्त करण्यात यश आले.

डोक्याला ठिक ठिकाणी जखमा झाल्या होत्या व जखम जुनी असल्याने त्यात जंतू देखील पडले होते. करुणाश्रमातील पथकाने त्याच ठिकाणी प्राथमिक उपचार करून अस्वलाला पुढील उपचारासाठी करुणाश्रम पीपल फॉर एनिमल्स संचालित वन्यप्राणी बचाव केंद्रात हलविले. या अस्वलाचे वय अंदाजे 13 ते 14 वर्ष असल्याचे समजले व जखमांमध्ये जंतू पडल्यामुळे अस्वलाची वर्तवणूक आक्रमक होती. उपचरादारम्यान 3 ते 4 दिवस त्याने अन्न सुद्धा खाल्ले नाही. जखम भरत गेली तसे अस्वलाच्या वर्तनातही बदल होत गेला. 20 दिवसांच्या उपचारानंतर आणि जखम पूर्णपणे बरी झाल्यानंतर अस्वलाला त्याच्या नैसर्गिक अधिवासात मुक्त करण्यात आले.

ही संपूर्ण मोहीम पांढरकवडा उपवनसंरक्षक किरण जगताप यांच्या मार्गदर्शनाखाली सहाय्यक वनसंरक्षक एस. आर. दुमरे, रवींद्र कोंडावार, वनपरिक्षेत्र अधिकारी मयूर सुरवसे, मनीष पवार, मंगेश बाळापुरे तसेच करुणाश्रमातील चमू कौस्तुभ गावंडे, पीयूष धोबे, डॉ संदीप जोगे, सुमित जैन ऋषिकेश गोडसे यांनी राबवली.