माळशिरसमध्ये वेगळाच पॅटर्न, मारकडवाडीतील ग्रामस्थ पुन्हा एकदा बॅलेट पेपरवर निवडणूक घेण्यावर ठाम, गावातील विरोधकांचा मतदानावर बहिष्कार
Uttam Jankar VS Ram Satpute, सोलापूर : माळशिरस तालुक्यातील मारकडवाडी गावातील ग्रामस्थ बॅलेट पेपरवर निवडणूक घेण्यास ठाम आहेत.
Uttam Jankar VS Ram Satpute, सोलापूर : ईव्हीएम मशीनवर शंका घेत माळशिरस तालुक्यातील मारकडवाडी येथील ग्रामस्थांनी मंगळवारी 3 डिसेंबर रोजी बॅलेट पेपरवर मतदान घेण्याचा निर्णय घेतला आहे. मात्र प्रशासनाने त्यांची मागणी फेटाळून लावल्यानंतरही आता आमदार उत्तम जानकर यांच्या गटाचे ग्रामस्थ कोणत्याही परिस्थितीत तीन डिसेंबर रोजी मतदान घेण्यावर ठाम आहेत . यासाठी त्यांनी गावात प्रचाराला ही सुरुवात केली असून घरोघरी जाऊन मतपत्रिका दाखवत आपण वीस तारखेला ज्याला मतदान केले होते त्यालाच मतदान करण्याचे आवाहन करताना दिसत आहेत. तहसीलदार किंवा प्रांताधिकारी यांनी कितीही प्रेशर आणलं तरी आम्ही लोक वर्गणीतून ही निवडणूक प्रक्रिया बॅलेट पेपरवर पार पाडणार अशी जानकर गटाची भूमिका आहे.
मात्र आता प्रशासनाने मागणी फेटाळून लावल्यानंतर गावातील दुसरा विरोधी गट आक्रमक झाला असून गावातील जानकर गटाच्या चार पुढार्यांनी गावकऱ्यांना विश्वासात न घेता हा मतदानाचा निर्णय घेतला आहे. आम्ही यात सहभागी होणार नसून आमचा या मतदानावर बहिष्कार असल्याची भूमिका घेतल्याने या प्रकरणाला नवीन ट्वीस्ट मिळाला आहे . या मतदानामुळे गावातील वातावरण खराब झाल्यास किंवा गोरगरिबांना त्रास झाल्यास हे चार पुढारी जबाबदार असतील, असा इशाराही विरोधी गटाने दिला आहे. त्यामुळे आता प्रशासनाने मतदानाची मागणी फेटाळून लावली असली तरी गावात कायदा व सुव्यवस्था बिघडू नये, यासाठी पोलीस प्रशासनावर ताण वाढू शकणार आहे.
माळशिरस विधानसभा मतदारसंघाच्या निवडणूक निर्णय अधिकारी विजया पांगारकर यांनी ग्रामस्थांची मागणी फेटाळून लावली होती. आता निवडणूक प्रक्रिया संपली असून ग्रामस्थांनी किंवा त्यांच्या निवडणूक प्रतिनिधींनी निवडणूक प्रक्रियेत मतदान व मतमोजणी सुरू असताना कोणताही आक्षेप घेतला नसल्याचे निदर्शनास आणले. त्यामुळे आता होत असलेली ही चाचणी निवडणूक प्रक्रिया बेकायदेशीर असून बॅलेट वर होणारे मतदान कायद्याला धरून नसल्याचे निवडणूक निर्णय अधिकारी विजया पांगारकर यांनी सांगितले आहे.
येत्या मंगळवारी म्हणजे 3 डिसेंबरला गावात मतदान होणार असून गावात एकूण तीन मतदान केंद्र होती. यात आता हे मतदान प्रक्रिया माध्यमांच्या मार्गदर्शनाखाली पार पाडणार असल्याची गावकऱ्यांची भूमिका आहे. त्यानुसार मतदानासाठी लागणाऱ्या मतपत्रिका छापून तयार झाल्या असून आता यास प्रशासनाचा विरोध असल्याने नेमकी किती ग्रामस्थ मतदान करतात हेही पाहणे औत्सुक्याचे ठरणार आहे.
इतर महत्त्वाच्या बातम्या
महत्त्वाच्या बातम्या
