कामाचा ताण...? सहाय्यक पोलीस निरीक्षकाची स्वतःवर गोळी झाडून आत्महत्या; सोलापुरातील धक्कादायक घटना
Solapur News: सोलापुरात सहाय्यक पोलीस निरीक्षकाच्या आत्महत्येनं खळबळ उडाली आहे.
Solapur News Updates: सोलापुरात (Solapur News) एका सहाय्यक पोलीस निरीक्षकानं स्वतःवर गोळी झाडून आत्महत्या (Committed Suicide) केल्याची धक्कादायक घटना घडली आहे. आनंद मळाळे असं आत्महत्या केलेल्या सहाय्यक पोलीस निरीक्षकाचं नाव आहे. आनंद मळाळे यांनी आत्महत्या का केली? याचं कारण अद्याप अस्पष्ट आहे. मात्र कामाचा ताण असल्यामुळे त्यांनी टोकाचं पाऊल उचलल्याचं बोललं जात आहे. मळाळे हे सध्या नांदेड (Nanded News) येथे सेवा बजावत होते. मात्र, मागच्या महिन्यात ते आजारी असल्यामुळे रजा घेऊन सोलापुरातील घरी आले होते.
आज (शनिवारी) पहाटे चारच्या सुमारास ते घराबाहेरील अंगणात गेले. यावेळी आपल्या सर्विस रिवाल्वरमधून डोक्यात गोळी झाडून त्यांनी स्वतःचं आयुष्य संपवलं. घटनेच्यावेळी त्यांच्या पत्नी या घरातच होत्या. बाहेर येऊन त्यांनी पहिल्यानंतर आनंद मळाळे हे रक्ताच्या थारोळ्यात पडले होते. घटनेची माहिती मिळताच सोलापूरचे पोलीस उपायुक्त विजय कबाडे, सहायक पोलीस आयुक्त राजू मोरे आणि इतर अधिकाऱ्यांनी घटनास्थळी जाऊन पाहणी केली. तसेच मृतदेह शवविच्छेदनासाठी सोलापूरच्या शासकीय रुग्णालयात रवाना करण्यात आले.
मूळचे धाराशिव जिल्ह्यातील आनंद मळाळे हे सोलापूर शहर पोलीस आयुक्तालयमध्ये अनेक वर्ष पोलीस कॉन्स्टेबल म्हणून कार्यरत होते. परीक्षा देऊन ते पोलीस उपनिरीक्षक झाले. त्यांनी सोलापूर शहर वाहतूक शाखा तसेच, सदर बाजार पोलीस ठाणे या ठिकाणी सेवा बजावली. त्यानंतर पुणे येथे पोलीस उपनिरीक्षक म्हणून सेवा बजावल्यानंतर सहाय्यक पोलीस निरीक्षक म्हणून नांदेड येथे त्यांची पदोन्नती झाली होती. मृत आनंद मळाळे यांच्या मागे पत्नी, मुलगा असा परिवार आहे. या घटनेची नोंद सदर बाजार पोलिस ठाण्यात झाली असून अधिक तपास सुरू आहे. मळाळे यांच्या मृत्यूची बातमी कळताच सर्वत्र हळहळ व्यक्त होत आहे.
महत्त्वाच्या इतर बातम्या :
महत्त्वाच्या बातम्या
ट्रेंडिंग न्यूज
