पुण्यातील सावकाराच्या हत्येप्रकरणी तिघांना अटक

पुण्यात काही दिवसांपूर्वी पप्पू पडवळ नावाच्या सावकाराची कोयत्याने निर्घृण हत्या करण्यात आली होती. त्या प्रकरणी आता तिघांना अटक करण्यात आली आहे. महत्त्वाचं म्हणजे पप्पू पडवळ हा सुद्धा सराईत गुन्हेगार होता.

पुणे : पुण्यात 9 जुलै रोजी झालेल्या सावकाराच्या हत्येप्रकरणी तिघांना अटक करण्यात आली आहे. घनश्याम उर्फ पप्पू पडवळ असे खून झालेल्या नाव आहे. पोलिसांनी याप्रकरणी लतिफ बाबू शेख, शुभम प्रमोद कासवेकर आणि शुभम संतोष उबाळे अशी अटक केलेल्या आरोपींची नावं आहेत. या प्रकरणातील मृत व्यक्ती देखील सराईत गुन्हेगार असून त्याच्यावर 12 गंभीर गुन्ह्याची नोंद आहे.

50 लाखाच्या मोबदल्यात दोन कोटी देऊनही आणखी 80 लाख रुपयांची मागणी केल्याने सावकाराची निर्घृण हत्या करण्यात आली होती. पुण्यातील कोंढवा परिसरात 11 जुलै रोजी हा प्रकार उघडकीस आला होता. मुख्य आरोपी लतीफ शेख याने पप्पू पडवळ याच्याकडून चार वर्षापूर्वी व्याजाने 50 लाख रुपये घेतले होते. त्याबदल्यात त्याला आतापर्यंत दोन कोटी रुपये दिले होते. परंतु पप्पू पडवळ त्याच्याकडे आणखी 80 लाख रुपये मागत होता आणि पैसे न दिल्यास ठार मारण्याची धमकी देत होता. त्यामुळे लतीफने पप्पू पडवळची हत्या करण्याचा कट रचला.

लतीफ शेख याची आई आजारी असताना एका मौलवीने दिलेल्या औषधामुळे ती बरी झाली होती. ही माहिती त्याने पप्पू पडवळ त्याला दिली होती. पडवळ सुद्धा आजारी पडत असल्यामुळे त्याने मौलवीला घेऊन लतीफला घरी बोलवले होते. हीच संधी साधून लतीफने पप्पू पडवळला मारण्याचा कट रचला. त्यासाठी त्याने इतर दोन आरोपींना दहा लाख रुपयांचं आमिष दाखवून आपल्या सोबत घेतलं. नऊ जुलैच्या रात्री लतीफ शेखने इतर दोघांना मौलवी असल्याचं भासवून पडवळच्या फ्लॅटमध्ये नेलं. त्यानंतर तिघांनी मिळून पडवळवर कोयत्याने 50 ते 55 कोयत्याने वार करत त्याची निर्घृण हत्या केली होती. आरोपींनी कुठलाही पुरावा मागे ठेवला नव्हता. पडवळाच्या घरातील सीसीटीव्ही कॅमेऱ्याचा डीव्हीआरही ते घेऊन गेले होते.

दोन दिवसांनी हा प्रकार उघडकीस आला. पोलिसांनी गुन्हा दाखल करुन तपासाला सुरुवात केली. तपासादरम्यान पोलिसांना लतीफने पप्पू पडवळकडून पन्नास लाख रुपयाचं कर्ज घेतल्याचं समजलं. पोलिसांनी त्याला विचारणा केली असता त्याच्या माहितीत विसंगती आढळली. त्यानंतर पोलिसांनी त्याला ताब्यात घेऊन कसून चौकशी केली असता, त्याने खून केल्याची कबुली दिली. लतीफने पडवळला पन्नास लाखाच्या बदल्यात दोन कोटी देऊनही तो आणखी 80 लाख मागत होता. तसंच लतीफ राहत असलेला फ्लॅट स्वतःच्या नावावर करुन घेण्यासाठी दबाव टाकत होता. लतीफ शेख यांच्या घरातील महिलांविषयी वाईट बोलत होता. त्यामुळे हा खून केल्याचं त्याने सांगितलं. या प्रकरणी कोंढवा पोलिसांनी अतिशय शिताफीने गुन्ह्याचा तपास करत आरोपींना अटक केली.