पुणे रेल्वे स्टेशनवरील संशयास्पद वस्तू स्फोटक नाही, पोलिसांच्या तपासातील प्राथमिक निष्कर्ष

पुणे रेल्वे स्टेशनवर आढळलेली संशयास्पद वस्तू ही स्फोटक नसल्याचा प्राथमिक अंदाज व्यक्त केला जात आहे. शिवाय रेल्वे स्टेशनवरील वाहतूकही आता सुरु झाली आहे.

Pune Station Suspicious Object

पुणे : पुणे रेल्वे स्टेशनवर आढळलेली संशयास्पद वस्तू ही स्फोटक नसल्याचा प्राथमिक अंदाज व्यक्त केला जात आहे. तासाभराने पुणे रेल्वे स्टेशवरील वाहतूक पुन्हा सुरु झाली आहे. काही वेळापूर्वी पुणे रेल्वे स्टेशन परिसरात बॉम्बसदृश वस्तू सापडल्याचा संशय व्यक्त केला जात होता. त्यानंतर ही वस्तू रेल्वे स्टेशनबाहेरच्या परिसरात नेण्यात आली. बॉम्ब शोधक नाशक पथकाने तपासणी केली असता ही संशयास्पद वस्तू स्फोटक नसल्याचा प्राथमिक अंदाज वर्तवण्यात आला आहे.  

रेल्वे स्टेशनमध्ये बॉम्बसदृश वस्तू आढळल्याने परिसरात खळबळ माजली होती. खबरदारी म्हणून प्लॅटफॉर्म क्रमांक 1 आणि 2 पूर्णपणे रिकामे करण्यात आले होते. इतकंच नाही तर काही काळासाठी रेल्वे वाहतूकही थांबवण्यात आली होती. ही वस्तू नेमकी काय आहे याबाबत अद्याप समजू शकलेलं नाही. 

"सापडलेली वस्तू ही जिलेटीन नव्हती. कोणीतरी जाता जाता ती वस्तू सोडून गेले असावेत. ही वस्तू फटाक्यांसारखी होती, पण ती मोकळी त्यात फक्त वायर होत्या," अशी माहिती जीआरपीएफच्या गुप्तचर विभागात काम करणाऱ्या अधिकाऱ्याने दिली. 

सापडलेली वस्तू जिलेटीन किंवा डिटोनेटर नाही : पुणे पोलीस आयुक्त
यानंतर पुण्याचे पोलीस आयुक्त अमिताभ गुप्ता रेल्वे स्थानकात दाखल झाले असून त्यांनी परिसराची पाहणी केली. यानंतर माध्यमांशी बोलताना पोलीस आयुक्त म्हणाले की, "आज सकाळी साडेदहा वाजता रेल्वे पोलीस स्टेशनवर बॉम्बसदृश वस्तू आढळल्याची माहिती पोलिसांना मिळाली. प्राथमिक माहितीनुसार संबंधित वस्तू जिलेटीन किंवा डिटोनेटर नाही. ते स्फोटक नाही किंवा स्फोटकांसारखं मटेरियल देखील नाही. रेल्वे पुढील तपास करत आहोत. कोणीही घाबरण्याचं कारण नाही."

काय झालं पुणे रेल्वे स्टेशनवर? 
पुणे रेल्वे स्थानक परिसरात बॉम्बसदृश वस्तू असल्याची माहिती पोलिसांना सकाळी साडेदहाच्या सुमारास मिळाली. त्यानंतर बॉम्ब शोधक पथक आणि डॉग स्क्वॉड पथकही घटनास्थळी दाखल झालं. खबरदारी म्हणून पुणे स्टेशनवरील प्लॅटफॉर्म क्रमांक 1 आणि 2  रिकामे करण्यात आले. तसंच येणाऱ्या गाड्यांना यार्डमध्ये थांबवण्यात आलं होतं. संबंधित संशयास्पद वस्तू रेल्वे स्टेशनमधून बाहेर मैदानावर नेली आणि त्याची तपासणी केली. 

दरम्यान चार ते पाच दिवसांपूर्वी पुणे नियंत्रण कक्षात निनावी कॉल आला होता, ज्यात पुणे रेल्वे परिसरात बॉम्ब ठेवण्यात आल्याची धमकी देण्यात आली होती. तपास केला असता तो फेक कॉल असल्याचं समोर आलं होतं. त्यानंतर आज पुणे रेल्वे स्टेशन परिसरात संशयास्पद वस्तू आढळली. सुदैवाने ही वस्तू स्फोटक नसल्याने सगळ्यांचाच जीव भांड्यात पडला आहे.