Pune University Flyover: पुणे विद्यापीठ चौकातील पूल पाडण्याची घाई; नव्या पुलाचं काय?

मेट्रो मार्गात व्यत्यय आल्याने सावित्रीबाई फुले पुणे विद्यापीठ चौकातील उड्डाणपूल पाडण्यात आला होता. मात्र अजूनही या पुलाचं काम ठप्प असल्याने नागरिकांना वाहतूक कोंडीचा सामना करावा लागत आहे.

sppu flyover

Pune University Flyover: पुणे महानगर प्रदेश विकास प्राधिकरणाच्या (पीएमआरडीए) (pune)प्रस्तावित मेट्रो मार्गात व्यत्यय आल्याने सावित्रीबाई फुले पुणे विद्यापीठ चौकातील उड्डाणपूल पाडण्यात आला होता. मात्र, आठ महिने उलटूनही उड्डाणपुलाचे काम सुरू होऊ शकले नसल्याचं चित्र आहे. उड्डाणपुलाचे काम सुरू करण्यापूर्वी पालिकेने छोटी-मोठी पस्तीस कामे तातडीने करावीत. हे काम झाल्यानंतरच उड्डाणपुलाचे काम सुरू होईल, अशी भूमिका पुणे महानगर प्रदेश विकास प्राधिकरणाने घेतली आहे. महापालिकेकडून काम मार्गी लावण्यासाठी प्रयत्न सुरू असल्याने उड्डाणपुलाचे काम कधी सुरू होणार?, असा सवाल वाहनचालक करत आहेत.

पीएमआरडीएच्या शिवाजीनगर-हिंजवडी मेट्रो मार्गातील अडथळे असलेले पूल मेट्रोच्या उड्डाणपुलाला अडथळा ठरत असल्याने ते पाडण्याचा निर्णय घेण्यात आला. कोरोना संसर्गाच्या लॉकडाऊनच्या काळात ४५ कोटी रुपये खर्चून बांधलेला उड्डाणपूल पाडण्यात आला. उड्डाणपूल पाडल्यानंतर वाहतूक व्यवस्था सुधारण्यासाठी संयुक्त बैठकीत नियोजन करण्यात आले. मात्र उड्डाणपुलाचे काम सुरू न झाल्याने वाहनचालकांना वाहतूक कोंडीचा सामना करावा लागत आहे.

उड्डाणपुलाच्या कामाबाबत पीएमआरडीए आणि पालिका यांच्यात नियमित बैठक सुरू आहे. काही दिवसांपूर्वी महापालिकेत संयुक्त बैठकही झाली होती. त्यावेळी पीएमआरडीएकडून 35 कामांची यादी पालिकेला देण्यात आली होती. ही कामे तातडीने पूर्ण होऊ शकली नसल्याचा दावा पालिका प्रशासनाने केला आहे. पालिकेकडून काम पूर्ण करण्याची जबाबदारी पीएमआरडीएने घेतली असून, पालिकेकडून काम पूर्ण झाल्यानंतर कामाला सुरुवात होणार आहे. त्यामुळे उड्डाणपुलाच्या कामात सातत्याने अडचणी येत असल्याचे चित्र समोर येत आहे.

यामध्ये रस्ता रुंदीकरण, पदपथाची रुंदी कमी करणे, रस्ता क्रॉसिंग हटवणे, पर्यायी रस्त्यांची तरतूद करणे यांचा समावेश आहे. मात्र यातील काही कामे पालिकेशी संबंधित नाहीत. अशा स्थितीत उड्डाणपुलाचे काम रखडले आहे. सावित्रीबाई फुले पुणे विद्यापीठ चौकात वाहतूक सुधारणा योजना राबविण्यात येणार आहे. हे पाहता मेट्रो मार्गासह उड्डाणपूल, भुयारी मार्ग, ग्रेड सेपरेटर बांधण्यात येणार असून त्यासाठी अंदाजे 426 कोटी रुपये खर्च करण्यात येणार आहे.

मेट्रो मार्गाव्यतिरिक्त इतर कामे टप्प्याटप्प्याने पालिकेकडून केली जाणार आहेत. या चौकावर दुमजली पूल बांधण्यात येणार असून वरून मेट्रो आणि खालच्या भागातून इतर वाहने ये-जा करण्यासाठी उड्डाणपूल बांधण्यात येणार आहे. या प्रस्तावाला महापालिकेच्या स्थायी समितीनेही मंजुरी दिली आहे.