Pune navale bridge: पुण्यातील नवले ब्रीजवरच वारंवार अपघात का? पुणे वाहतूक CP मनोज पाटलांनी सांगितलं कारण

Pune navale bridge: कात्रज बोगद्यापासून ते नवले पुलापर्यंत तीव्र उतार आहे, त्यामुळे या रस्त्यावर यापूर्वी देखील अनेक अपघात घडलेले आहेत.

Pune navale bridge accidetn manoj patil

Source : Abp

पुणे : पुण्यातील (Pune) नवले ब्रीजवर झालेल्या भीषण अपघाताच्या घटनेनंतर प्रशासन आणि सरकारला प्रश्न विचारले जात आहेत. वारंवार याच ठिकाणी अपघात होऊन निष्पाप लोकांचे जीव जात आहेत. मात्र, प्रशासनाकडून कुठलीही ठोस उपायोजना केली जात नाही. आमदार रोहित पवार आणि माजी नगरसेवक वसंत मोरे यांनीही याबाबत भाष्य केलं आहे. त्यामुळे, पुणेकरांकडून या अपघाताच्या (Accident) घटनेनंतर तीव्र संताप व्यक्त होत आहे. पुणे-बंगळुरु महामार्गावरील नवले पूल हा अपघाताचा हॉट स्पॉट बनला असून आज सायंकाळी साडे पाचच्या सुमारास झालेल्या अपघातात जणांचा मृत्यू झाला आहे. साताराहून मुंबईच्या दिशेनं जाणाऱ्या मार्गिकेवर हा अपघात झाला. अपघातानंतर ट्रक पेटल्यानं भडका उडाला, त्यामुळे मृतांची संख्या वाढली, अपघाताची मिळताच अग्निशमन दलाचे जवान इथं दाखल झाले आहेत. तर, पुणे वाहतूक पोलीस (Police) आयुक्त मनोज पाटील यांनी अपघाताचे कारण सांगितले.

कात्रज बोगद्यापासून ते नवले पुलापर्यंत तीव्र उतार आहे, त्यामुळे या रस्त्यावर यापूर्वी देखील अनेक अपघात घडलेले आहेत. पुणे महानगरपालिका असेल, नॅशनल हायवे ऑथॉरिटी असेल वेळोवेळी प्रयत्न करतात, ह्या रस्त्यात सुधारणा आणण्यासाठी काम केलं जातय. या रस्त्यावर यापूर्वी अनेक अपघात याच भागात घडले आहेत हेही अगदी खरं आहे. याच परिसरात अनेक अपघातांमध्ये आतापर्यंत निष्पाप लोकांनी आपलं जीव गमावलं आहे. उतारामुळे गाड्यांचा वेग देखील अचानक वाढतो आणि गाड्या कंट्रोल होत नाहीत.या तीव्र उताराबद्दल प्रशासनासोबत आम्ही दुरुस्तीसाठी पत्रव्यवहार करू, असे पुणे वाहतुकीचे अतिरिक्त पोलीस आयुक्त मनोज पाटील यांनी एबीपी माझाशी बोलताना म्हटले. तसेच, याअगोदर देखील या रस्त्यावर स्पीड ब्रेकर्स, स्पीड गन्स वेगवेगळ्या उपयोजना करण्यात आल्या होत्या, अशी माहितीही त्यांनी दिली.

दरम्यान, पुणे महानगरपालिकेकडून नवले ब्रिज येथे झालेल्या अपघातस्थळी मदतकार्य करण्यात येत आहे. अग्निशमन विभागाकडून आपत्ती व्यवस्थापनास नवले ब्रिज येथे अपघाताची माहिती मिळताच तात्काळ फायर ब्रिगेडच्या तीन फायर इंजिन एक ब्राउझर दोन रेस्क्यू व्हॅन तसेच पीएमआरडीएचे तीन फायर गाड्या व एक ब्राऊजर दोन रेस्क्यू व्हॅन अपघाताच्या ठिकाणी रवाना होऊन तात्काळ रेस्क्यूचे काम सुरू करण्यात आले. सदर रेस्क्यूच्या दरम्यान आवश्यक असणारी यंत्रसामुग्री जसे की क्रेन्स, जेसीबी व ॲम्बुलन्सेस याची तात्काळ व्यवस्था करून घटनास्थळी रवाना करून त्या ठिकाणी सर्च अंडर रेस्क्यू चे काम सुरू करण्यात आल्याची माहिती अग्निशमन विभागाने दिली.

अग्निशमनचे 30 ते 35 जवान घटनास्थळी

सदर ठिकाणी लायगुडे दवाखाना व कमला नेहरू दावाखाना या ठिकाणावरील ॲम्बुलन्स व डॉक्टर्सच्या टीम्स घटनास्थळी काम करत असून 108 क्रमांकाचे तीन ॲम्बुलन्स, पुणे मनपाच्या पाच ॲम्बुलन्सस कार्यरत आहेत. घटनास्थळावर पुणे महापालिकेचे मा.अतिरिक्त महापालिका आयुक्त (विशेष) श्री.ओमप्रकाश दिवटे तसेच क्षेत्रीय स्तरावरील उपायुक्त व महापालिका सहाय्यक आयुक्त अभियंते व व सहाय्यक मनुष्यबळ कर्मचारी घटनेच्या ठिकाणी मदतकार्य करत आहेत. अग्निशमन दलाचे 35 ते 40 जवान तसेच क्षेत्रीय स्तरावरील 100 ते 110 अधिकारी व कर्मचारी घटनास्थळी मदत कार्यामध्ये सहभागी आहेत.

अपघातातील जखमींवर विविध रुग्णालयात उपचार

अपघातात ज्या व्यक्ती जखमी झाल्या आहेत त्यांना Plus हॉस्पिटल, Silver Breach हॉस्पिटल, नवले हॉस्पिटल या ठिकाणी उपचार सुरु आहेत. सदर हॉस्पिटलमध्ये अतिरिक्त महापालिका आयुक्त(इस्टेट) पृथ्वीराज बी.पी.,सहायक आरोग्य प्रमुख संजीव वावरे यांच्या समवेत सर्व वैद्यकीय अधिकारी उपस्थित आहेत. अतिरिक्त महापालिका आयुक्त (जनरल) परमित कौर यांच्या मार्गदर्शनाखाली सर्व नियोजन करण्यात येत असून या घटनेची माहिती महापालिका आयुक्त नवल किशोर राम यांना देण्यात येत असून त्यांनी याबाबत दिलेल्या आदेशानुसार सर्व कामकाज करण्यात येत आहे. याप्रसंगी पुणे महानगरपालिकेची आपत्ती व्यवस्थापन ची संपूर्ण टीम कार्यरत आहे. या ठिकाणी मोठ्या प्रमाणात अपघात ग्रस्त वाहने आहेत ती वाहने क्रेनने उचलण्याचे काम सुरू आहे. सफाई कर्मचारी यांच्या मार्फत ऑईली रस्ता झालेला असल्याने फायर फियटर लावून रोड स्वछ करण्यात येत आहे. रस्त्यावर वाहतूक सुरू असल्याने कामकाज करण्यात अडथळे येत आहेत.

हेही वाचा