लग्नापूर्वीच तरुणावर काळाचा घाला, फोटो काढण्याच्या नादात 350 खोल दरीत कोसळला, लोहगडावर धक्कादायक घटना

 पुणे जिल्ह्यातील लोहगड किल्ल्यावर धक्कादायक घटना घडली आहे. मित्रांसोबत लोहगड किल्ल्यावर गेलेल्या एका 24 वर्षीय तरुणाचा मृत्यू झाला आहे.

Pune Lohagad Accident News

Source : Getty Images

Pune Lohagad Accident News :  पुणे जिल्ह्यातील लोहगड किल्ल्यावर धक्कादायक घटना घडली आहे. मित्रांसोबत लोहगड किल्ल्यावर गेलेल्या एका 24 वर्षीय तरुणाचा मृत्यू झाला आहे. केतन विशाल अग्रवाल वय 24 असं मृत्यू झालेल्या तरुणाचं नाव आहे. केतन हा आपल्या होणाऱ्या पत्नीचा वाढदिवसाचा आनंद साजरा करण्यासाठी मित्रांसोबत लोहगड किल्ल्यावर आला होता. केतन याच्या होणाऱ्या पत्नीचा वाढदिवस उद्या 19 जून रोजी असल्याने केतनने महाबळेश्वर येथे त्याची जय्यत तयारी केली होती. पण त्यापूर्वीच दुर्दैवी घटना घडली आहे. 

नेमकी कशी घडली दुर्घटना?

केतन हा कुटुंबीय आणि मित्रपरिवारासोबत लोहगड किल्ल्यावर फिरत होता. यावेळी फोटो काढण्याच्या मोहात खोल दरीजवळ गेला अन् त्याचा तोल गेला. त्यानंतर तो 350  फूट खोल दरीत कोसळला. या भीषण अपघातात त्याच्या डोक्याला गंभीर दुखापत झाली. त्यातच त्याचा मृत्यू झाला आहे. केतनचा विवाह पुढील महिन्यात होणार होता. लग्नाची जय्यत तयारी करण्यात आली होती. पुढील महिन्यात होणाऱ्या लग्नासाठी त्याच्या कुटुंबीयांनी जयपूर येथे 17 कोटी रुपये खर्च करुन पॅलेस बुक केले होते. तर पाहुण्यांना जयपूर येथे घेऊन जाण्यासाठी दोन विशेष विमानांची सोय देखील केली होती अशी माहिती मिळाली आहे.

दरम्यान, केतन अग्रवाल हा तरुण त्याच्या होणाऱ्या बायकोच्या वाढदिवसाचे औचित्य साधून ट्रेकिंगला गेला होता. तो होणाऱ्या बायकोचा वाढदिवस साजरा करण्यासाठी गुरुवारी सकाळी त्याच्या कारने लोहगड येथे आला होता. केतन होणाऱ्या बायकोसोबत ट्रेकिंगला आला होता. त्यामुळे तो प्रचंड आनंदात होता. पण गडावरील कड्यावरुन अचानक तोल गेल्याने त्याचा दरीत पडून मृत्यू झाला.

केतनच्या मृत्यूनं परिसरात हळहळ

दरम्यान, या घटनेची माहिती मिळताच शिवदुर्ग मित्र लोणावळा, वनजीव रक्षक संस्था, ट्रेकर्स तसेच पोलिसांनी तातडीने घटनास्थळी धाव घेत बचावकार्य सुरु केले. अथक प्रयत्नांनंतर केतनला दरीतून बाहेर काढून उपचारासाठी रुग्णालयात दाखल करण्यात आले. मात्र डॉक्टरांनी उपचारापूर्वीच त्याला मृत घोषित केले. केतन  हा प्रसिद्ध बांधकाम व्यावसायिक विशाल अग्रवाल यांचा मुलगा आहे. आनंदाच्या क्षणांना गालबोट लावणाऱ्या या घटनेने परिसरात हळहळ व्यक्त होत असून सर्वत्र शोककळा पसरली आहे. लोहगड परिसरातील घनदाट झाडीतून मार्ग शोधत खोल दरीतून बाहेर काढून गडाच्या पायथ्याशी आणण्यात आला. त्यानंतर त्याचा मृतदेह उत्तरीय तपासणीसाठी तळेगाव दाभाडे येथील शासकीय रुग्णालयात आणले. या घटनेचा पुढील तपास लोणावळा ग्रामीण पोलीस करत आहेत.