Pune Crime Pooja Khedkar Family : पूजा खेडकरच्या बंगल्यात दोन तास झाडाझडती, पोलिसांच्या हाती काय लागलं? समोर आली मोठी अपडेट
Pune Crime Pooja Khedkar Family : मनोरमा खेडकर यांचा ठावठिकाणा शोधण्यासाठी चतुश्रुंगी पोलिसांची टीम खेडकरांच्या बंगल्यावर पोहोचली होती.
Pune Crime Pooja Khedkar Family : नवी मुंबईत घडलेल्या एका अपघातानंतर ट्रक हेल्परच्या अपहरणाने राज्यात खळबळ उडाली. या प्रकरणाचा धागा थेट बडतर्फ IAS अधिकारी पूजा खेडकरच्या (Pooja Khedkar)कुटुंबाशी जोडला गेला आहे. अपहरण झालेला ट्रक हेल्पर प्रल्हाद कुमार पुण्यातील बाणेर येथील दिलीप खेडकर (Dilip Khedkar) यांच्या बंगल्यात आढळून आला. याप्रकरणी दिलीप खेडकर यांच्यावर अपहरणात थेट सहभागाचा आरोप करण्यात आला आहे. तसेच, दिलीप खेडकर यांना पळून जाण्यास मदत केल्याचा आणि सरकारी कामात अडथळा आणल्याचा आरोप त्यांची पत्नी मनोरमा खेडकर (Manorama Khedkar) यांच्यावर ठेवण्यात आला असून, त्यांनी पोलिसांवर कुत्रे सोडल्याचंही पोलिसांनी नमूद केलं आहे. या पार्श्वभूमीवर चतुश्रुंगी पोलीस ठाण्यात मनोरमा खेडकर यांच्याविरुद्ध गुन्हा दाखल करण्यात आला आहे.
पोलिसांचा छापा, पण मनोरमा खेडकर गायब
मनोरमा खेडकर यांचा ठावठिकाणा शोधण्यासाठी चतुश्रुंगी पोलिसांची टीम पुण्यातील खेडकरांच्या बंगल्यावर पोहोचली. पोलिसांनी बंगल्यातील कर्मचार्यांची सखोल चौकशी केली. मात्र, तपासासाठी आलेल्या पोलिसांना मनोरमा खेडकर या घरात आढळल्या नाहीत. त्या घरातून गायब असल्याचं समोर आलं आहे. पोलिसांनी सुमारे सव्वा दोन तास खेडकर यांच्या बंगल्यावर थांबून संपूर्ण परिसराची झडती घेतली.
पोलिसांच्या हाती काय लागलं?
दिलीप आणि मनोरमा खेडकर हे त्यांचे फोन पुण्यातील बंगल्यात ठेऊन गायब झाले आहेत. रबाळे आणि पुण्यातील चतुश्रुंगी पोलिसांनी दोघांच्या मोबाईल लोकेशनचा शोध घेतला असता त्यांचं अखेरचं लोकेशन त्यांच्या बंगल्यातच आढळलं आहे. पोलिसांनी आतमध्ये जाऊन तपास केला असता दोघांच्या मोबाईलचे लोकेशन आढळणे बंद झाले. पोलिसांनी घरातून पूजा खेडकरचा एक जुना मोबाईल ताब्यात घेतलाय. मात्र, दिलीप आणि मनोरमा खेडकर यांचे मोबाईल मात्र सापडलेले नाहीत. दिलीप आणि मनोरमा खेडकर यांच्या रबाळे इथल्या अपघातातील 5000 क्रमांकाची लॅन्ड क्रुझर गाडी वगळता सर्व गाड्या बंगल्यातच आहेत. तर मनोरमा खेडकर या कॅबमधून पळाल्याचं पोलिसांचं म्हणणं आहे.
नेमकं प्रकरण काय?
शनिवारी सायंकाळी सुमारे सव्वा सातच्या सुमारास मुलुंड-ऐरोली मार्गावर सिमेंट मिक्सर ट्रक आणि MH 12 RP 5000 क्रमांकाच्या लँड क्रूझर गाडीचा अपघात झाला. अपघातानंतर गाडीतून उतरलेल्या दोन अज्ञात व्यक्तींनी ट्रकचा हेल्पर प्रल्हाद कुमार याला जबरदस्तीने गाडीत बसवून नेले, असा आरोप करण्यात आला. यानंतर ट्रक चालकाने ही घटना तात्काळ मालक विलास ढेंगरे यांना कळवली आणि रबाळे पोलीस ठाण्यात अपहरणाची तक्रार दाखल करण्यात आली. तक्रार प्राप्त होताच पोलिसांनी संबंधित लँड क्रूझरचा शोध घेण्यास सुरुवात केली. तपासादरम्यान, MH 12 RP 5000 क्रमांकाची गाडी पुण्यातील बाणेर परिसरात एका बंगल्यासमोर उभी असल्याचे निदर्शनास आले. सदर बंगला बडतर्फ IAS अधिकारी पूजा खेडकर यांचे वडील दिलीप खेडकर यांच्या मालकीचा असल्याचे तपासात स्पष्ट झाले होते. या प्रकारांच्या चौकशीसाठी पोलीस खेडकर कुटुंबियांच्या बंगल्यावर गेले असता दिलीप खेडकर आणि मनोरमा खेडकर फरार झाल्याचे निष्पन्न झाले आहे. पोलिसांकडून दोघांचाही शोध घेतला जात आहे.
आणखी वाचा
महत्त्वाच्या बातम्या
