deenanath mangeshkar hospital: पेशंट साडेपाच तास रुग्णालयात, रक्तस्राव सुरुच होता, तनिषा भिसेंचा धीर खचला; रुपाली चाकणकरांनी स्टार्ट टू एंड सगळंच सांगितलं
Tanisha Bhise Death Case: रूग्णालयाने रूग्णाच्या खासगी माहिती अहवालातून दिल्याने चाकणकरांनी निषेध व्यक्त काल असून याबाबत त्यांनी दीनानाथ रूग्णालयाला समज देण्यात येईल असंही त्यांनी सांगितलं आहे.
पुणे: पुण्यातील दीनानाथ मंगेशकर रुग्णालयामध्ये पैशांमुळे योग्य वेळेत उपचार न मिळाल्याने गर्भवती महिला तनिषा भिसे यांच्या मृत्यूप्रकरणी शहरात संतापाची लाट उसळली. या प्रकरणी शासकीय समितीच्या आधारे रूग्णालयाची चौकशी करण्यात येत आहे. या प्रकरणास रुग्णालय जबाबदार असल्याचा आरोप झाल्यानंतर रुग्णालयाने देखील एक चौकशी समिती नेमली. या समितीचा अहवाल समोर आला, त्यानंतर आज शासकीय समितीच्या अहवालाची माहिती राज्य शासनाला आणि महिला आयोगाला देण्यात येत आहे. दरम्यान भिसे कुटुंबीयांकडून महिला आयोगाच्या अध्यक्षा रूपाली चाकणकरांची भेट घेतली आणि त्यांनी एक लेखी पत्र देखील दिलं आहे. आज यासंदर्भात बैठक पार पडली. या बैठकीनंतर राज्य महिला आयोगाच्या अध्यक्षा रूपाली चाकणकर यांनी या प्रकरणाची संपूर्ण माहिती दिली आहे. यावेळी दीनानाथ रूग्णालयावरती ठपका ठेवण्यात आला आहे. तनिषा भिसे यांच्या मृत्यूला दीनानाथ रूग्णालय जबाबादार असल्याचंही त्यांनी म्हटलं आहे. यावेळी त्यांनी रूग्णालयाने रूग्णाच्या खासगी माहिती अहवालातून दिल्याने चाकणकरांनी निषेध व्यक्त काल असून याबाबत त्यांनी दीनानाथ रूग्णालयाला समज देण्यात येईल असंही त्यांनी सांगितलं आहे.
यावेळी बोलताना राज्य महिला आयोगाच्या अध्यक्षा रूपाली चाकणकर म्हणाल्या, दीनानाथ मंगेशकर रुग्णालयाने स्वतःला वाचवण्यासाठी तनिषा भिसे यांच्या आजारा बाबतच्या गोपनीय गोष्टी सार्वजनिक केल्या. रुग्ण आणि नातेवाईक 28 मार्चला नऊ वाजता रुग्णालयात गेल्यावर दहा लाख रुपयांची मागणी केली. अडीच वाजता रुग्ण मंगेशकर रुग्णालयातून बाहेर पडला. साडेपाच तासात रूग्णालयाने तनिषा भिसे यांच्यावर कोणतीही उपचार केले नाहीत त्याउलट त्यांना त्यांच्याजवळ असलेली गोळी घेण्याचा सल्ला दिला होता. रूग्णांच्या नातेवाईकांचा दावा आहे की, मंगेशकर रुग्णालयाने आमच्यावर उपचार करायला तयार असल्याचं सांगितलं. शस्त्रक्रिया करण्याची सर्व तयारी झालेली असताना मात्र, पैसे वेळेत भरु न शकल्याने उपचार केले नाहीत. त्यामुळे रूग्णालयावरची ठपका ठेवण्यात आला आहे. तब्बल साडेपाच तास पेशंट रुग्णालयात होता, रक्तस्त्राव सुरूच होता, रुग्णाचं मानसिक खच्चीकरण झालं, रूग्णालयाने त्यांना प्रतिसाद देणं आवश्यक होतं, त्यांनी उपचार करणं गरजेचं होतं, पण त्यांनी काहीही प्रतिसाद न दिल्याने त्यांच्यावर ठपका ठेवण्यात आला असल्याची माहिती चाकणकरांनी दिली आहे.
गर्भवती महिला तनिषा भिसे मृत्यू हा माता मृत्यू असल्याने याबाबतचा अंतीम अहवाल माता मृत्यू अन्वेशन विभागाकडून आज संध्याकाळपर्यंत सादर होईल. तर आणखी एक अहवाल धर्मादायक विभागाकडून उद्या सादर होईल. या दोन्ही विभागांचे अहवाल आल्याशिवाय कारवाई करण्यात येणार नाही. उद्या तिन्ही अहवालांचे निष्कर्ष पाहिल्यावर कारवाई काय करायचे हे ठरेल, पेशंटला योग्य उपचार मिळाले नाहीत असा शासनाचा अहवाल आल्याचं त्यांनी म्हटलं आहे. साडेपाच तास गर्भवती महिला ही रुग्णालयातच होती. त्या तासाच रुग्णालयाने योग्य ते उपचार केले नाहीत. त्वरित उपचार मिळाले असते तर रुग्ण वाचला असता. पण मंगेशकर रुग्णालयाने कोणतीही नियमावली पाळली नाही. त्यामुळे रुग्णालयावर कायदेशीर कारवाई होणार असं चाकणकर यांनी म्हटलं आहे. दरम्यान शासनाच्या अहवालात दीनानाथ रुग्णालयावर ठपका ठेवण्यात आला आहे, अशी माहिती देखील यावेळी रूपाली चाकणकर यांनी दिली आहे.
धर्मदायी संस्थांनी चांगल्या पद्धतीची आरोग्य सुविधा देणे हे अपेक्षित
आरोग्य सुविधा हे अतिशय मूलभूत अशी गरज आहे. आणि नागरिकांना धर्मदायी संस्थांनी चांगल्या पद्धतीची आरोग्य सुविधा देणे हे अपेक्षित आहे. आणि तशी नियमावली असताना रुग्णाला हे उपचार देण्यासाठी त्यांनी टाळाटाळ केली. त्याच्यासाठी मागितलेली डिपॉझिटची रक्कम आणि एकंदरीत या सगळ्या घटनेमुळे यामध्ये रुग्णाचा मृत्यू झालाय. खरेतर प्रत्येक एक स्वप्न असते आणि एक मातृत्व मिळत असताना आपल्या मुलांसोबत आपले आयुष्य असावे. यामुळे आईचेच नाहीतर कुटुंबाचे स्वप्न भंग पावले, असंही पुढे चाकणकर यांनी म्हटलं आहे.
दोषींवर कडक कारवाई केली जाणार
रुग्णालयात धर्मदाय नाव असावे. तसेच आयोग जेव्हा कारवाई करत असते तेव्हा कोणत्या पक्षाचा आहे, ते पाहिले जात नाही. कोणी कोणत्याही पक्षाचा असला तरी चुकीचा असेल तर कारवाई होणार. सर्व दोषींवर कायदेशीर कारवाई करणार. या प्रकरणात कोणालाही सोडले जाणार नाही, असे आश्वासन रूपाली चाकणकर यांनी दिले.
चाकणकरांनी मांडलेले महत्त्वाचे मुद्दे
- पेशंटला योग्य उपचार मिळाले नाहीत असा ठपका दीनानाथ मंगेशकर रुग्णालयावर अहवालात ठेवण्यात आला आहे. दीनानाथ मंगेशकर, सूर्या हॉस्पिटल आणि ससून रुग्णालयाचा अहवाल दिला आहे.
- या प्रकरणाची सखोल चौकशी होणार आहे. त्यांचाही अहवाल समोर येणार आहे. अंतिम अहवाल आज संध्याकाळी येईल त्यात सविस्तर माहिती मिळेल. तर धर्मादाय आयुक्तांचा अहवाल उद्या येणार आहे.
- हॉस्पिटलमध्ये रुग्ण सकाळी 9 वाजून 1 मिनिटांनी गेले होते. डॉक्टर यांच्याशी संपर्क झाला आणि सर्जरीसाठी स्टाफकडे सूचना दिल्या. ऑपरेशन थिएटरमध्ये जाण्यापूर्वी 10 लाख रुपयांची मागणी केली. 3 लाख रुपये आहेत असं कुटुंबियांनी हॉस्पिटलला सांगितले. 2.30 वाजता रुग्ण बाहेर पडला, 5 तास रुग्णावर प्राथमिक उपचार रुग्णालयाने रुग्णावर केलेले नाहीत.
- रुग्णासमोरच 10 लाख रुपयांची मागणी केल्यामुळे रुग्णाची मानसिकता खचली. रुग्णाच्या नातेवाईकांनी त्यानंतर रुग्णाला ससून मध्ये नेलं. तिथून 15 मिनिटात ते बाहेर आले आणि तिथून सुर्या हॉस्पिटल मध्ये नेलं. दुसऱ्या दिवशी डिलिव्हरी झाली, रक्तस्त्राव झाला आणि रुग्णाचा मृत्यू झाला.
- रुग्णालयाने रुग्णावर उपचार करणे अपेक्षित होतं ते उपचार मिळाले नाहीत. हा ठपका रुग्णालयावर ठेवण्यात आलेला असून रुग्णालय दोषी आहे. रुग्णालयाने हलगर्जीपण केला आहे. रुग्णाला त्वरित उपचार दिले असते तर रुग्ण वाचला असता.
- राज्य समितीचा अहवाल आलेला आहे. तिन्ही समितीचे एकत्रित अहवाल आणि नातेवाईकांनी केलेली तक्रार यावर अंतिम निष्कर्ष होईल. आरोग्य मंत्री प्रकाश आबिटकर यांच्याशी सुद्धा याप्रकरणाचा बाबत बोलणे झालं आहे.
- रुग्णाला मोठ्या प्रमाणात रक्तस्त्राव होत असताना रुग्णालयाकडून कुठलेही उपचार करण्यात आले नाहीत. तसेच रुग्णाच्या नातेवाईकांनाच तुमच्याकडे कुठलेही औषध असेल तर ते रक्तस्त्राव थांबण्यासाठी द्या असे सांगण्यात आले.
- गर्भवती तनिषाच्या मृत्यूला दिनानाथ मंगेशकर रुग्णालय जबाबदार आहे. उपचार मिळाले असते तर तनिषा वाचू शकली असती. दोषींना पाठीशी घातले जाणार नाही त्यांच्या कठोर कारवाई केली जाईल.
- रुग्णालयात धर्मदाय नाव असावे. तसेच आयोग जेव्हा कारवाई करत असते तेव्हा कोणत्या पक्षाचा आहे, ते पाहिले जात नाही. कोणी कोणत्याही पक्षाचा असला तरी चुकीचा असेल तर कारवाई होणार. सर्व दोषींवर कायदेशीर कारवाई करणार. या प्रकरणात कोणालाही सोडले जाणार नाही.
महत्त्वाच्या बातम्या
