Vijay Shivtare VIDEO : मुख्यमंत्र्यांच्या भेटीनंतर शिवतारेंचा पुन्हा रुद्रावतार, माझी लायकी किती, माझा आवाका काय हे अजित पवारांना दाखवणारच!
Vijay Shivtare Vs Ajit Pawar : कोण शिवतारे, त्याची लायकी काय असं म्हणणारे अजित पवार आता का घाबरत आहेत, माझ्या उमेदवारीवरून ते मुख्यमंत्र्यांशी चर्चा का करत आहेत असा सवाल विजय शिवतारे यांनी विचारला.
मुंबई : कोण विजय शिवतारे, त्याची लायकी काय असं विचारणारे अजित पवार (Ajit Pawar) आता का घाबरले आहेत, माझी लायकी काय आणि अवाका किती हे अजित पवारांना दाखवणारच असा ठाम पवित्रा शिंदे गटाचे नेते आणि माजी मंत्री विजय शिवतारे (Vijay Shivtare) यांनी घेतला. बारामतीच्या उमेदवारीवरून मुख्यमंत्री एकनाथ शिंदे यांची भेट घेतल्यानंतर शिवतारे यांनी हे वक्तव्य केलं. विजय शिवतारे यांनी सुनेत्रा पवार यांच्याविरोधात स्वतःची उमेदवारी जाहीर केली आहे.
मी मुख्यमंत्र्यांना कल्पना दिलीय, मी नसलो तरी अजित पवार निवडून येत नाहीत, असा दावा शिवसेनेचे नेते आणि माजी मंत्री विजय शिवतारे यांनी केला. विजय शिवतारे यांनी दुसऱ्यांदा मुख्यमंत्री एकनाथ शिंदे यांची भेट घेतली. विजय शिवतारे यांनी बारामती लोकसभा निवडणूक लढवण्याचा निर्धार केला आहे. तसंच अजित पवार किंवा त्यांच्या पत्नी सुनेत्रा पवार यांच्याविरोधात उभं राहण्याचा पवित्रा शिवतारेंनी घेतला आहे.
विजय शिवतारेचा आवाका दाखवतो
अजित पवारांवर टीका करताना विजय शिवतारे म्हणाले की, अजित पवार म्हणाले होते विजय शिवतारे तुझा आवाका किती? तू करतोय काय? तुला बघतोच. अजित पवारांना माझा आवाका किती हे सांगतो. मी एवढा लहान आहे, माझी लायकी काय हे पण सांगतो. अशी टीका करणारे अजित पवार आता एवढे का तडपडतात.
दरम्यान, विजय शिवतारेंनी आज मुख्यमंत्र्यांच्या भेटीत आपली भूमिका नव्याने स्पष्ट केली. या भेटीनंतर शिवतारे म्हणाले, "मी मुख्यमंत्र्यांना कल्पना दिलीय. त्यांना मला युतीधर्म पाळण्याचे संकेत दिलेत. जनतेची इच्छा आहे, ही अराजकता थांबवण्याची गरज आहे. मी नसलो तरी अजित पवार निवडून येत नाहीत. युतीची सीट जाणार. ही लढाई पवार विरूद्ध जनता आहे."
युतीधर्म पाळावा लागेल, मुख्यमंत्र्यांची सूचना
बारामतीमध्ये युतीधर्म पाळा असे संकेत मुख्यमंत्र्यांना आपल्याला दिले असल्याचं विजय शिवतारे म्हणाले. ते म्हणाले की, गेल्या 40 वर्षांमध्ये अजित पवारांना विरोध करणारा निर्माण झाला आहे. त्यामुळे सर्वच लोकांना माझ्या उमेदवारीची उत्सुकता आहे. अजित पवार निवडून येणार नाहीत. मुख्यमंत्री म्हणाले की त्यांचं काहीही होवो, आपण त्यामध्ये पडू नये.
ही बातमी वाचा:
महत्त्वाच्या बातम्या
