शरद पवारांनी लोकसभेला माझं तिकीट फायनल केलं होतं, पण...; लक्ष्मण हाकेंचा गौप्यस्फोट
राजकारणात आणि सभागृहात सामाजिक समतोल साधायचा असेल तर प्रतिनिधीत्व एखाद-दुसरं तरी पुढे यायला पाहिजे. पण, त्या प्रतिनिधींना देखील टार्गेट केलं जातंय, असे लक्ष्मण हाके यांनी म्हटलं
पुणे : राज्यात मराठा आरक्षणाचा मुद्दा चांगलाच तापला असून मराठा आंदोलक मनोज जरांगे पाटील यांनी आजपासून शांतता रॅलीला हिंगोलीतून (Hingoli) सुरुवात केली आहे. या रॅलीच्या माध्यमातून ते मराठा समाजाची संवाद साधून सरकारवर दबाव आणण्याचा प्रयत्न करत आहेत. दुसरीकडे मराठा समाजाला ओबीसीतून आरक्षण देण्यास विरोध करणारे ओबीसी आंदोलक लक्ष्मण हाके (Laxman Hake) यांनीही पत्रकार परिषद घेऊन पुन्हा एकदा ओबीसी समाजाच्या भावना मांडताना आरक्षणावर भाष्य केले. तर, लोकसभा निवडणुकीत शरद पवारांकडून (Sharad pawar) आपलं तिकीट फायनल झालं होतं, असा गौप्यस्फोटही त्यांनी केला. माढा लोकसभा मतदारसंघातून लक्ष्मण हाके निवडणूक लढविण्यास इच्छुक होते. अखेर, त्यांनी माढा मतदारसंघातून अपक्ष निवडणूक लढवली.
राजकारणात आणि सभागृहात सामाजिक समतोल साधायचा असेल तर प्रतिनिधीत्व एखाद-दुसरं तरी पुढे यायला पाहिजे. पण, त्या प्रतिनिधींना देखील टार्गेट केलं जातंय, ही महाराष्ट्रातील जनसामान्यांची भावना आहे, असे लक्ष्मण हाके यांनी म्हटलं होतं. यावेळी, तुम्हीही लोकसभा निवडणूक लढवली पण, जनतेनं तुम्हाला नाकारलं, तेव्हा तुम्ही उमेदवारी मागायला शरद पवारांकडे गेला होतात का? असा प्रश्न हाकेंना विचारला असता, त्यावरही त्यांनी उत्तर दिलं.
शरद पवारांनी उमेदवारी जाहीर केली होती
होय, निश्चितच मी शरद पवारांकडे उमेदवारी मागायला गेलो होतो, त्यावेळी पवारसाहेबांनी मानसिकता केली होती आणि उमेदवारीही डिक्लेर केली होती. मात्र, पुन्हा काय झालं त्याचं त्यांनाच माहिती.. असा गौप्यस्फोटही लक्ष्मण हाकेंनी पत्रकार परिषेदतून केला. दरम्यान, माढा लोकसभा मतदारसंघातून हाके यांनी निवडणूक लढविण्याची इच्छा शरद पवारांकडे मांडली होती. तसेच, मी ज्या लोकसभा मतदारसंघातून निवडणूक लढवली, त्या मतदारसंघात मला 5 हजार मतं पडली. कारण, आपला ओबीसी समाजाचा प्रतिनिधी त्या सभागृहात गेला पाहिजे ही भावनाच अद्यापही तेथील समाजात नाही. धनगराने कुठं खासदार व्हायचं असतं का, त्याने कुठं तिकीट मागायचं असतं का, गावातल्या तेल्याने, रामोश्याने कुठं लोकसभेचं तिकीट मागायचं असतं का, असे प्रश्न विचारले जातात ही समाजातील फॅक्ट आहे, असे स्पष्टीकरण लक्ष्मण हाकेंनी दिले.
सामाजिक न्याय कसा मिळणार?
मी शिक्षित आहे, लोकसभा निवडणुकांसाठी काय मेरीट लागतं हे मला चांगलं माहिती आहे. पण, मी निवडणूकच लढवू नये असं नाही. आज संसदेत धनगर समाजाचा एकही खासदार नाही, एवढी मोठी धनगरांची संख्या असूनही एक खासदार नाही. मग, गावगाड्यातील छोट्या-छोट्या समाजाचं प्रतिनिधित्व किंवा प्रतिबिंब देशाच्या आणि महाराष्ट्राच्या संसदेत कसं उमटणार, या माणसांना सामाजिक न्याय मिळणार कसा? असा सवाल लक्ष्मण हाके यांनी केला.
महापुरूषांचाही पराभव झालाय
महात्मा ज्योतिबा फुले आणि डॉ. बाबासाहेब आंबेडकर यांनीही निवडणुका लढवल्या आहेत. त्यांनाही पराभव पत्कारावा लागला आहे. महात्मा फुले यांनी दोनवेळा निवडणूक लढवली होती, तर एकदा त्यांना केवळ 2 मते पडली होती. डॉ. बाबासाहेब आंबेडकर यांचा देखील पराभव याच देशात झाला होता. मी तुलना करत नाही पण उदाहरण देत आहे, कारण माझ्याकडे प्रचाराला पैसे देखील नव्हते, असे लक्ष्मण हाकेंनी सांगितलं.
लक्ष्मण हाकेंना केवळ 5134 मतं
लक्ष्मण हाके यांनी माढा लोकसभा मतदारसंघातून अपक्ष निवडणूक लढवली असून या निवडणुकीत त्यांचं डिपॉझिट जप्त झालं आहे. लक्ष्मण हाकेंना केवळ 5134 मतं मिळाली. माढा लोकसभा मतदारसंघातून निवडणूक लढवलेल्या 32 उमेदवारांपैकी त्यांना 6 व्या क्रमांकांची मतं मिळाली आहेत. येथील मतदारसंघात तिसऱ्या क्रमांकाच्या उमेदवाराला 58,421 मतं मिळाली असून चौथ्या क्रमांकाच्या उमेदवारास 20,604 मतं पडली आहेत. पाचव्या क्रमांकावर बहुजन समाज पक्षाचे स्वरुप जानकर उमेदवार होते, त्यांना 7094 मतं मिळाली. तर, सहाव्या क्रमांकावरील लक्ष्मण हाके यांना 5134 मतं पडली.
महत्त्वाच्या बातम्या
