Rohit Pawar : भाजपच्या गडात घुसून भाजपलाच पाणी पाजल्याबद्दल प्रशांत किशोर यांचं मनःपूर्वक अभिनंदन!, रोहित पवार यांची सूचक पोस्ट
Rohit Pawar : रोहित पवार यांनी प्रशांत किशोर यांचं अभिनंदन करणारी पोस्ट लिहिताना भाजपवर हल्लाबोल केला आहे. प्रशांत किशोर बांकीपूरमधून भाजप उमेदवाराचा पराभव करत आमदार झालेत.
मुंबई : राष्ट्रवादी काँग्रेस शरदचंद्र पवार पार्टीचे (NCPSP) आमदार रोहित पवार (Rohit Pawar) यांनी जन सुराजचे नेते प्रशांत किशोर यांचं बांकीपूर मधील विजयाबद्दल अभिनंदन केलं आहे. रोहित पवार यांनी प्रशांत किशोर (Prashant Kishor) यांचं अभिनंदन करताना एक सूचक संदेश पक्षातील सहकाऱ्यांना देखील दिल्याचं दिसून येतं. बांकीपूरच्या मतदारांनी प्रशांत किशोर यांना विजयी करत भाजपचं (BJP) नाक कापल्याचं रोहित पवार म्हणाले. रोहित पवार यांनी यासंदर्भात एक फेसबुक पोस्ट केली आहे.
रोहित पवार यांची फेसबुक पोस्ट
भाजपाचे राष्ट्रीय अध्यक्ष नितीन नबीन यांच्या पारंपरिक मतदारसंघात झालेल्या पोटनिवडणुकीत मतदारांनी जनसुराज पक्षाचे प्रशांत किशोर यांना विजयी करुन भाजपाचं नाक कापलं. प्रत्येक गोष्टीला एक 'डेडलाईन' असते आणि भाजपाची ती डेडलाईन आता जवळ आली आहे, हेच या निकालाने दाखवून दिलं आहे.
भाजपच्या गडात घुसून भाजपलाच पाणी पाजल्याबद्दल प्रशांत किशोर यांचं मनःपूर्वक अभिनंदन!
आता पूर्वीसारखं ‘अपना टाईम आएगा’ असं नाही तर ‘अपना टाईम आ गया..’
त्यामुळं थोडा धीर धरा…. विजय आपलाच आहे..!
आता मला वाटतंय डिलिमिटेशन बिल काही पास होणार नाही.
दिल्लीत जंतरमंतरवर झालेलं तरुणाईचं आंदोलन आणि बांकीपूरमध्ये झालेला दारूण पराभव बघितला तर संसदेत डिलीमिटेशन बील मंजूर होणार नाही असंच दिसतंय… आणि निश्चितच हा लोकशाहीचा विजय असेल!
रोहित पवार यांचा भाजपवर हल्लाबोल
आमदार रोहित पवार यांनी या माध्यमातून भाजपची डेडलाईन या निकालानं जवळ आली आहे, असं निकालानं दाखवून दिल्याचं म्हटलं. तर, अपना टाईम आ गया, थोडा धीर धरा, विजय आपलाच आहे, असा उल्लेख देखील केला आहे. जंतर मंतरवरील आंदोलन, बांकीपूरमधील भाजपचा पराभव पाहता संसदेत डिलीमिटेशन बील मंजूर होणार नाही, असं दिसत असल्याचं रोहित पवार म्हणाले.
प्रशांत किशोर यांचा 18 हजार मतांनी विजय
बिहार विधानसभेच्या बांकीपूर मतदारसंघात प्रशांत किशोर यांनी भाजप उमेदवार नीरज कुमार यांचा 18953 मतांनी पराभव केला. प्रशांत किशोर यांना 63203 तर नीरज कुमार यांना 44250 मतं मिळाली. राजदच्या उमेदवार रेखा गुप्ता या पोटनिवडणुकीत तिसऱ्या स्थानावर राहिल्या, त्यांना 14085 मतं मिळाली. गेल्या तीन दशकांपासून बांकीपूरच्या जागेवर भाजपचं वर्चस्व होतं. या पोटनिवडणुकीत भाजपच्या हातून ही जागा निसटली आहे. तर, मध्य प्रदेशातील दतिया विधानसभा मतदारसंघातील पोटनिवडणूक काँग्रेसनं जिंकली आहे.
Before You Go
Maharashtra Weather Rain Updates: पावसाचं पॅटर्न बदललं? जुलैमध्ये धो धो कोसळला, ऑगस्टमध्ये गायब; पुढे काय, हवामान विभागाची A टू Z माहिती
महत्त्वाच्या बातम्या
