शरद पवारांना चॅलेंज, बाळासाहेबांची आठवण, व्होट जिहाद; शिवाजी पार्कवरुन मोदींचा ठाकरेंवर घणाघात
इंडी आघाडीकडे काय आहे, जेवढी माणसं तेवढ्या घोषणा. इंडिया आघाडीची नजर आपल्या मंदिरांवर आहे, महिलांच्या मंगळसुत्रावर आहे.
मुंबई : पंतप्रधान नरेंद्र मोदींच्या उपस्थितीत मुंबईतील शिवाजी पार्कवर महायुतीची (Mahayuti) सांगता सभा संपन्न झाली. राज्यातील दिग्गज नेत्यांच्या उपस्थितीत मोठ्या उत्साहात आणि गर्दीच्या वातावरणात ही सभा पार पडली. मनसे अध्यक्ष राज ठाकरे आणि नरेंद्र मोदी (Narendra Modi) या सभेच्या प्रथमच जाहीर सभांमधील व्यासपीठावर एकत्र आले होते. राज ठाकरेंनी आपल्या भाषणातून पंतप्रधान मोदींकडे काही महत्त्वाच्या मागण्या केल्या, त्यामध्ये मराठी भाषेला अभिजात भाषेचा दर्जा देण्याची आपली पहिली मागणी असल्याचं राज यांनी म्हटलं. राज ठाकरेंनंतर पंतप्रधान मोदींनी नेहमीप्रमाणे मराठीतून भाषणाला सुरुवात केली. मोदींनी आपल्या भाषणात विकासाकामांचा उल्लेख करत, पुढील 2047 पर्यंतच्या भारताचे स्वप्न दाखवले. तर, नाव न घेता उद्धव ठाकरे(Uddhav Thackeray) व शरद पवार यांच्यावरही हल्लाबोल केला. मुंबईतील शिवाजी पार्कवरुन पुन्हा एकदा नकली शिवसेना म्हणत उद्धव ठाकरेंना लक्ष्य केलं. तसेच, काँग्रेससह इंडि आघाडी म्हणत इंडिया आघाडीवर हल्लाबोल केला.
इंडी आघाडीकडे काय आहे, जेवढी माणसं तेवढ्या घोषणा. इंडिया आघाडीची नजर आपल्या मंदिरांवर आहे, महिलांच्या मंगळसुत्रावर आहे. काँग्रेसच्या जाहीरनाम्यानुसार तुम्ही तुमच्या मुलांना तुमची संपत्ती देऊ शकणार नाहीत, तुमच्या संपत्तीतील निम्मा हिस्सा त्यांचं सरकार घेणार आहे. व्होट जिहाद वाल्यांना ती संपत्ती देण्याचं काम ते करणार आहेत. काँग्रेसला अस्तित्व वाचवण्यासाठी ही निवडणूक लढवायची आहे. देशातील लाखो गुंतवणूकदार आज मार्केटसोबत जोडले आहेत. पण, इंडी आघाडीवाले जे कट रचत आहेत, त्यांचा उद्देश देशातील गुंतवणूकदारांचा हा विश्वास तोडण्याचं काम करत आहे, असे म्हणत इंडिया आघाडीच्या धोरणांवर व जाहिरनाम्यावर मोदींनी हल्लाबोल केला.
बाळासाहेबांची आठवण
मुंबई चैत्यभूमीतून प्रेरणा घेते, हे आमचं सरकार आहे ज्यांनी देश व जगभरात डॉ. बाबासाहेबांचे पंचतिर्थ विकसित केले आहेत. शिवतिर्थच्या या भूमीत कधीकाळी बाळासाहेब ठाकरे व वीर सावकरांचा आवाज घुमत होता. मात्र, आज विश्वासघाती आघाडीला पाहून त्यांच्या आत्म्याला किती दु:ख झालं असेल. नकली शिवसेनावाल्यांनी शिवसैनिकांच्या बलिदानाला धोका दिला, सत्तेसाठी ते राम मंदिराला विरोध करणाऱ्यांसोबत गेले. सत्तेसाठी हे मुंबई हल्ल्यानंतर पार्टी करणाऱ्या लोकांसोबत गेले, असे म्हणत नरेंद्र मोदींनी नाव न घेता उद्धव ठाकरेंनाही आपल्या भाषणातून लक्ष्य केलं.
शरद पवारांना चॅलेंज
मी राष्ट्रवादीच्या नेत्याला चॅलेंज देतो, राहुल गांधी वीर सावरकर यांच्याबद्दल अपशब्द बोलणार नाहीत, असा शब्द घेऊन दाखवा, असे आव्हानच मोदींनी जाहीर सभेतून शरद पवारांना दिले. मी राष्ट्रवादीच्या नेत्यांना चॅलेंज करतो, राहुल गांधींकडून एक स्टेटमेंट असं घेऊन दाखवा, ते आयुष्यभर वीर सावरकर यांच्याबद्दल अवमानजनक शब्द बोलणार नाहीत. मला माहितीय तो शब्द राहुल गांधी देणार नाहीत, कारण निवडणुका संपताच ते पुन्हा वीर सावरकर यांच्याबद्दल अपशब्द बोलणार आहेत, असेही मोदींनी म्हटले. मोदींनी आपल्या भाषणातून नकली शिवसेना म्हणत उद्धव ठाकरेंवर हल्लाबोल केला. नकली शिवसेनेचं जेवढं परिवर्तन झालंय, तेवढा बदल देशातील कुठल्याच पक्षात आजपर्यंत झाला नाही, असेही मोदींनी म्हटले.
हा मोदीच संविधानाचा मोठा रक्षक
आर्टीकल 370 हटवणारा मोदीच संविधानाचा सर्वात मोठा रक्षक आहे, जे आज संविधान डोक्यावर घेऊन नाचत आहेत, त्यांनी संविधानाला अपंगत्व केल्याची टीका मोदींनी केली. पंडित नेहरुंनी चित्रवाले संविधान ठेऊन टाकले, आता हे लोक संविधानच्या पाठित खंजीर खुपसण्याचं काम करत आहेत. दलित, मागास वर्गाचं आरक्षण मी कधीच हटवू देणार नाही, असे मोदींनी म्हटले.
महत्त्वाच्या बातम्या
ट्रेंडिंग न्यूज
