Manikrao Kokate : माणिकराव कोकाटेंच्या बॅनरवरून भुजबळांचा फोटो गायब, थेट कट्टर विरोधक कांदेंची एन्ट्री; कृषीमंत्र्यांची जोरदार चर्चा!
Manikrao Kokate : मंत्रिपदाची शपथ घेतल्यानंतर माणिकराव कोकाटे पहिल्यांदाच नाशिक दौऱ्यावर आले आहेत. माणिकराव कोकाटे यांच्या स्वागतासाठी त्यांच्या समर्थकांकडून जोरदार बॅनरबाजी करण्यात आलेली आहे.
नाशिक : सिन्नर विधानसभेचे राष्ट्रवादी अजित पवार गटाचे आमदार माणिकराव कोकाटे (Manikrao Kokate) यांना मंत्रिमंडळात मोठी जबाबदारी देण्यात आली आहे. माणिकराव कोकाटे यांची कृषीमंत्रीपदी वर्णी लागली आहे. मंत्री झाल्यानंतर ते पहिल्यांदाच नाशिकमध्ये (Nashik) दाखल झाले. यावेळी त्यांच्या कार्यकर्त्यांकडून नाशिकमध्ये जोरदार बॅनरबाजी करण्यात आली आहे. मात्र हेच बॅनर आता चर्चेचा विषय ठरले आहे. कारण माणिकराव कोकाटे यांच्या स्वागताच्या बॅनरवर राष्ट्रवादी अजित पवार गटाचे ज्येष्ठ नेते छगन भुजबळ (Chhagan Bhujbal) यांचा फोटो गायब आहे. तर भुजबळांचे कट्टर विरोधक असलेले आमदार सुहास कांदे (Suhas Kande) यांचा फोटो बॅनरवर झळकला आहे. यामुळे राजकीय वर्तुळात चर्चांना उधाण आले आहे.
मुख्यमंत्री देवेंद्र फडणवीस (Devendra Fadnavis) यांच्या नेतृत्वाखालील महायुती सरकारचा शपथविधी (Mahayuti Cabinet Expansion) सोहळा रविवारी (दि. 15) पार पडला. यामध्ये 33 कॅबिनेट तर 6 राज्यमंत्र्यांचा समावेश आहेत. विशेष म्हणजे या मंत्रिमंडळात राष्ट्रवादी अजित पवार गटाचे ज्येष्ठ नेते छगन भुजबळांना डावलण्यात आल्याने ते कमालीचे नाराज झाले आहेत. तर छगन भुजबळ यांना डच्चू देऊन माणिकराव कोकाटे यांना मंत्रिमंडळात संधी देण्यात आल्याची चर्चा सध्या रंगली आहे. त्यातच नाशिकमध्ये लागलेल्या बॅनरने सर्वांच्याच भुवया उंचावल्या आहेत.
कोकाटे, भुजबळ यांच्यातील मतभेद पुन्हा चर्चेत
मंत्रिपदाची शपथ घेतल्यानंतर माणिकराव कोकाटे पहिल्यांदाच नाशिक दौऱ्यावर आले आहेत. माणिकराव कोकाटे यांच्या स्वागतासाठी शहरात त्यांच्या समर्थकांकडून जोरदार बॅनरबाजी करण्यात आलेली आहे. माणिकराव कोकाटे यांच्या निवासस्थानाबाहेर लावलेल्या बॅनरवर ज्येष्ठ नेते छगन भुजबळ यांचा फोटो नसल्याचा पाहायला मिळत आहे. तर दुसरीकडे छगन भुजबळ यांचे कट्टर राजकीय विरोधक सुहास कांदे यांचा फोटो मात्र बॅनरवर दिसून येत आहे. मंत्रिमंडळात स्थान न मिळाल्यामुळे छगन भुजबळ हे नाराज आहेत. तर माणिकराव कोकाटे आणि छगन भुजबळ यांच्यातील संघर्ष मात्र या बॅनरबाजीमुळे पुन्हा एकदा चर्चेत आला आहे.
मला विचारून बॅनर लावलेले नाही
दरम्यान, या बॅनरबाबत माणिकराव कोकाटे यांना विचारले असता ते म्हणाले की, माझे आणि त्यांचे काही मतभेद असतील मात्र वैर नाही. जे बॅनर लावले आहेत ते कार्यकर्त्यांनी लावले आहेत. त्यांनी कोणाचे फोटो टाकायचे आणि कुणाचे नाही टाकायचे हा त्यांचा अधिकार आहे. त्यांनी मला विचारून बॅनर लावलेले नाही. मला विचारले असते तर मी त्यांना सांगितले असते भुजबळांचा फोटो टाका, अशी प्रतिक्रिया त्यांनी दिली आहे. तर भुजबळांचे कट्टर विरोधक समजले जाणारे सुहास कांदे यांचा फोटो बॅनरवर दिसला. याबाबत विचारले असता मला माहित नाही बॅनर कोणी लावलेले आहे. कार्यकर्त्यांना जे योग्य वाटते ते कार्यकर्ते करतात, असे माणिकराव कोकाटे म्हणाले.
आणखी वाचा
महत्त्वाच्या बातम्या
