Eknath Shinde: एकनाथ शिंदे आपल्याच शिलेदारांमुळे चक्रव्यूहात अडकले; भुमरे, खोतकर, शिरसाटांसह गायकवाडही अडचणीत, नेमकं प्रकरण काय?
Eknath Shinde: एकनाथ शिंदे यांचे शिलेदार अडचणीत आले आहेत तर दुसरीकडे एकनाथ शिंदे यांनी अचानक दिल्लीचा दौरा केल्याने नेत्यांच्या भुवया उंचावल्या आहेत.
मुंबई: उपमुख्यमंत्री एकनाथ शिंदे (Eknath Shinde) यांच्या शिवसेनेच्या नेत्यांच्या अडचणी सध्या मोठ्या प्रमाणावर वाढल्याचे चित्र आहे. संजय गायकवाड संजय शिरसाट, अर्जुन खोतकर आणि संदिपान भुमरे यांची एका मागून एक प्रकरण समोर आल्यामुळे राजकीय वर्तुळात खळबळ उडाली आहे, तर एकीकडे एकनाथ शिंदे (Eknath Shinde) यांच्या शिलेदार अडचणीत आले आहेत तर दुसरीकडे एकनाथ शिंदे यांनी अचानक केलेला दिल्लीचा दौरा यामुळे नेत्यांच्या भुवया उंचावल्या आहेत. एकीकडे राज्यातील घडामोडी, शिलेदारांवर आलेली संक्रात आणि अचानक केलेली दिल्लीवारी यामुळे एकनाथ शिंदे चांगलेच चर्चेत आले आहेत. या सर्व आरोपांमुळे एकनाथ शिंदे यांचा पक्ष अडचणीत आला आहे. (Eknath Shinde)
संजय शिरसाट
विट्स हॉटेल प्रकरणी मुख्यमंत्री देवेंद्र फडणवीस यांच्याकडून उच्चस्तरीय चौकशीच्या आदेश देण्यात आले आहेत. त्यानंतर दुसऱ्याच दिवशी संजय शिरसाठ यांना आयकर विभागाची नोटीस आली त्यानंतर त्यांचा नोटांनी भरलेल्या बॅंगचा एक व्हिडिओ सोशल मीडियावरती व्हायरल झाला. त्यानंतर शिरसाट यांच्यावर गंभीर स्वरूपाचे आरोप झाले. संजय शिरसाट यांचा पैशांच्या बॅगेचा शेजारी बसलेला व्हिडीओ समोर आला. या व्हिडीओमध्ये संजय शिरसाट बेडवर बसून सिगारेट ओढत फोनवर बोलत आहेत आणि या बेडखाली पैशांची मोठी बॅग असल्याचं दिसत आहे. तर एक बॅग ठेवलेली आहे. एवढी मोठी बॅग जर पैशाची ठेवायची असेल तर अलमाऱ्या काय मेल्यात का? या बॅगमध्ये पैसे नाहीत तर कपडे आहेत, असा दावाही संजय शिरसाट यांनी केला आहे.
अर्जुन खोतकर
अर्जुन खोतकर यांचे स्वीय सहाय्यक थांबलेल्या विश्रामगृहात कोट्यावधी रुपये आढळल्याने खळबळ उडाली. त्यानंतर माजी आमदार अनिल गोटे यांनी धुळ्याच्या जिल्हा न्यायालयात धाव घेतली. त्यानंतर खोतकर यांच्यावर खंडणीचा गुन्हा दाखल करण्याचे आदेश देण्यात आले आहेत.
संजय गायकवाड
कायमच आपल्या वादग्रस्त वक्तव्याने आणि कृतीने चर्चेत येणारे आमदार संजय गायकवाड यांनी मुंबईमध्ये आकाशवाणी आमदार निवास मधील कॅन्टीनच्या कर्मचाऱ्यांना मारहाण केली. या मारहाणीचा व्हिडिओ सोशल मीडियावर व्हायरल झाला, त्याचबरोबर अधिवेशनामध्ये देखील हा मुद्दा चांगलाच चर्चेत आला. मोठ्या गदारोळ्यानंतर गायकवाड यांच्यावरती गुन्हा दाखल करण्यात आला आहे, मात्र मी केलं ते योग्यच केलं किती गुन्हे दाखल झाले तरी आय डोन्ट केअर असं म्हणत गायकवाड यांनी आपल्या वागण्यावरती स्पष्टीकरण दिलं आहे.
आमदार गायकवाड यांनी आमदार निवास कॅन्टीनमध्ये जेवणं मागवलं होतं. वरण आणि भाताचा पहिला घास खाल्यावरच त्यांना ते खराब असल्याचं लक्षात आलं. त्याच संतापत त्यांनी खाली कॅन्टिनमध्ये जात 'मला विष खायला घालतो का' असं विचारलं आणि कॅन्टिनच्या कर्मचाऱ्याला बेदम मारहाण केली. प्लास्टिकच्या पिशवीत पार्सल केलेल्या डाळीला वास येत असल्याचा दावा करत त्यांनी कर्मचाऱ्याला त्याचा वास घ्यायला लावला आणि संजय गायकवाड यांनी त्याला बुक्क्यांनी मारहाण केली.
संदिपान भुमरे
शिंदे गटाचे शिलेदार संदिपान भुमरे यांच्यावरती मंत्रिपदाचा गैरवापर केल्याचा ठपका ठेवण्यात आला आहे. आपल्या भाऊजयीला दारू परवाना मिळवून दिल्याचा त्यांच्यावर आरोप आहे. या दारू परवाना प्रकरणी छत्रपती संभाजी नगर खंडपीठात याचिका दाखल करण्यात आली आहे. खंडपीठाकडून संबंधित अधिकाऱ्यांना नोटीसा देखील पाठवण्यात आली आहेत.
शिंदेंनी संजय शिरसाट अन् संजय गायकवाडांना कडक शब्दात सांगितले
सदर प्रकरणानंतर उपमुख्यमंत्री एकनाथ शिंदे (Eknath Shinde) संजय गायकवाड आणि संजय शिरसाट यांच्यावर तीव्र नाराज असल्याची चर्चा आहे. संजय गायकवाड आणि संजय शिरसाट यांचे एकनाथ शिंदेंनी कडक शब्दात कान टोचल्याची माहिती समोर येत आहे. मंत्री आणि आमदारांच्या वेशिस्त वक्तव्य आणि वागणुकीमुळे पक्षाची प्रतिमा डागाळत आहे. त्यामुळे असा बेशिस्तपणा खपवून घेणार नसल्याची ताकीद एकनाथ शिंदेंनी दिली आहे.
एकनाथ शिंदे आपल्याच शिलेदारांमुळे चक्रव्यूहात अडकले
उपमुख्यमंत्री एकनाथ शिंदे आपल्याच शिलेदारांमुळे चक्रव्यूहात सापडलेत. गेल्या तीन दिवसांत शिंदेंच्या तीन मंत्र्यांनी आपल्या कारनाम्यांनी सरकारमध्ये शिंदेंची कोंडी केलीय. संजय गाकवाडांनी आमदार निवासातल्या कॅन्टिनमध्ये गुंडगिरी केली. त्यानंतर शंभूराज देसाईंनी भर सभागृहात शिवराळ भाषा वापरत ठाकरेंच्या शिवसेनेचे आमदार अनिल परबांना धमकी दिली. आणि त्याचवेळी आधी आयकर विभागाच्या नोटीशीमुळे आणि दुसऱ्या दिवशी नोटांच्या बंडलाच्या व्हिडीओमुळे संजय शिरसाट अडचणीत आलेत.
महत्त्वाच्या बातम्या
