Dhananjay Munde Resignation: ...तर देवेंद्र फडणवीस धनंजय मुंडेंना राजीनामा द्यायला लावतील; चंद्रकांत पाटलांचं सूचक वक्तव्य
Beed Crime: मस्साजोग प्रकरणात तथ्य असल्यास धनंजय मुंडे यांना मुख्यमंत्री राजीनामा द्यायला लावतील , असे वक्तव्य मंत्री चंद्रकांत पाटील यांनी केले. राजकीय वर्तुळात चर्चांना उधाण
सांगली: मस्साजोग गावचे सरपंच संतोष देशमुख हत्याप्रकरणात चौकशी सुरू आहे. प्रत्येक गोष्ट वेगळी आहे. राज्याचे प्रमुख म्हणून देवेंद्र फडणवीस निर्णय घेण्यास समर्थ आहेत. त्यांना जर वाटलं की या प्रकरणात काही तथ्य आहे, तर ते ताबडतोब धनंजय मुंडे (Dhananjay Munde) यांना राजीनामा द्यायला सांगतील, असे वक्तव्य राज्याचे उच्च व तंत्रशिक्षण मंत्री चंद्रकांत पाटील (Chandrakant Patil) यांनी केले. संतोष देशमुख हत्याप्रकरणात अद्याप पोलीस यंत्रणा चौकशी करत आहेत. एसआयटी नेमण्यात आली आहे. निवृत्त न्यायाधीशांची समिती नेमण्यात आली आहे. वाल्मिक कराड (Walmik Karad) याच्यासह आरोपींना मकोका लावण्यापर्यंत तसेच वाल्मिक कराड याची संपत्ती जप्त करण्यात पर्यंतची प्रक्रिया टप्प्याटप्प्याने सुरु आहे. वाल्मिक कराड याला देखील 302च्या गुन्ह्यात घेतील, असे चंद्रकांत पाटील यांनी म्हटले. ते रविवारी सांगलीत प्रसारमाध्यमांशी बोलत होते.
यावेळी चंद्रकांत पाटील यांनी मनोज जरांगे पाटील यांनी आंतरवाली सराटी येथे मराठा आरक्षणासाठी सुरु केलेल्या उपोषण आंदोलनाविषयी भाष्य केले. उपोषण करणं, धरणे आंदोलन करणं हे लोकशाहीमध्ये प्रत्येकाला अधिकार आहे. परंतु मनोज जरांगे पाटील यांनी ज्या ज्या वेळी मागण्या मागितले आहेत. त्या पूर्ण केल्या आहेत. १८०० विद्यार्थ्यांनी केंद्राच्या ईडब्ल्यूएस सर्टिफिकेटवर प्रवेश घेतला आहे. केंद्रात ईडब्ल्यूएस आहे. पण महाराष्ट्रात मराठा समाजाला वेगळं आरक्षण दिल्यानंतर ईडब्ल्यूएस मध्ये राहता येत नाही. परंतु असं असलं तरी त्या विद्यार्थ्यांना या वर्षापुर्ता केंद्राचं ईडब्ल्यूएस सर्टिफिकेट मान्य करून प्रवेश दिलं आहे. त्यामुळे आता मागणी मांडा, चर्चा करा मार्ग निघेल. मनोज जरांगे पाटील यांनी आता मुंबईत येणं सुरू केलं पाहिजे. तसेच शिष्टमंडळासह निवेदन घेऊन चर्चेला आलं पाहिजे व येताना कायदेशीर बाजू माहिती असणारीच लोक आणली पाहिजेत, असा सल्ला चंद्रकांत पाटील यांनी मनोज जरागेंना दिला.
पालकमंत्रीपदावरुन महायुतीत नाराजी, चंद्रकांत पाटील म्हणाले...
जिवंत माणसांनाच एखादी गोष्ट आवडते आणि नावडते. त्यामुळे जिवंत माणसांमध्ये रुसवे फुगवे असतात. कुटुंब प्रमुख रुसवे फुगवे संपवतात. तसे आमचे कुटुंब प्रमुख दाओसला गेले होते. ते आता परतले आहेत. ते रुसवे फुगवे काढतील, असे चंद्रकांत पाटील यांनी म्हटले.
सांगली पोलिसांनी काही दिवसापूर्वी फार मोठा ड्रग्जचा साठा जप्त केला आहे. जे लोक ड्रगसंबंधी माहिती देतील. त्या माहितीच्या आधारे मुद्देमाल जप्त केला गेला तर माझ्या सॅलरी अकाउंट मधून दहा हजार रुपयांचं बक्षीस देण्यात येईल. ड्रग्जची कारवाई केली जातेच. नाही झाली तरी मी रस्त्यावर उतरेन, असा इशाराही चंद्रकांत पाटील यांनी दिला.
दुष्काळामुळे जत तालुक्यात पिण्याचे आणि शेतीचे पाणी पुरेसे मिळत नव्हते. त्यामुळे दोन वर्षांपूर्वी तेथील नागरिक कर्नाटकामध्ये जाण्यास इच्छुक होते. परंतु आता टेंभू योजनेतून जत तालुक्याला प्रत्येक कानाकोपऱ्यात तलावत पाणी पोहोचण्याचे काम जवळजवळ 60% पूर्ण झाले आहे. लवकरात लवकर ते पूर्ण होईल, त्यामुळे जत तालुक्यातील दुष्काळाचा प्रश्न मिटल्याचा दावा चंद्रकांत पाटील यांनी केला.
आणखी वाचा
महत्त्वाच्या बातम्या
ट्रेंडिंग न्यूज
