Video: बच्चू कडू आक्रमक, वादाचा नेमका ट्रिगर पाँईट काय; अमित शाहांच्या सभेपूर्वीची A टू Z कहाणी
अमरावती येथील सायन्सकोर मैदानात केंद्रीय गृहमंत्री अमित शाह यांची सभा होत असून याच मैदानावर आमदार बच्चू कडू यांनीही सभेसाठी मैदान मिळावे म्हणून अर्ज केला होता
अमरावती - विदर्भातील हाय व्होल्टेज लढत मानलं जात असलेल्या अमरावती (Amravati) मतदारसंघाकडे राज्याचे लक्ष लागले आहे. महायुतीच्या उमेदवार खासदार नवनीत राणा यांना भाजपाने तिकीट दिल्याने येथील संघर्ष अधिकच चिघळला असून प्रहार संघटनेचे अध्यक्ष बच्चू कडू (Bachhu Kadu) यांनी राणांविरुद्ध लोकसभेचा उमेदवार दिला आहे. तर, आनंदराज आंबेडकर हेही येथून निवडणूक लढवत आहेत. त्यामुळे, अमरावती लोकसभा मतदारसंघाची निवडणूक चौरंगी होत असून आमदार कडू मतदारसंघात राणा दाम्पत्यांविरुद्ध चांगलेच आक्रमक झाले आहेत. केंद्रीय गृहमंत्री अमित शाह (Amit Shah) यांची अमरावतीमधील सायन्सकोर मैदानात सभा होत असून या सभेची तयारी सुरू असतानाच आमदार बच्चू कडू थेट मैदानावर पोहोचले. यावेळी, पोलिसांसोबत त्यांची बाचाबाची झाल्याचं दिसून आलं.
अमरावती येथील सायन्सकोर मैदानात केंद्रीय गृहमंत्री अमित शाह यांची सभा होत असून याच मैदानावर आमदार बच्चू कडू यांनीही सभेसाठी मैदान मिळावे म्हणून अर्ज केला होता. मात्र, पोलिसांनी बच्चू कडूंचा अर्ज अगोदर मंजूर केला होता. मात्र, अमित शाह यांच्या सभेमुळे पोलिसांनी त्यांच्या सभेसाठीची परवानगी नाकारली. त्यामुळे, बच्चू कडू आक्रमक होऊन सायन्सकोर मैदानावर कार्यकर्त्यांसह हजर झाले. यावेळी, पोलिसांनी त्यांना अडविण्याचा प्रयत्न केला. मात्र, पोलिसांना न जुमानता बच्चू कडू आक्रमक होत मैदानात शिरले. यावेळी, चांगलाच राडा झाल्याचे पाहायला मिळाले.
पोलिसांनी नवनीत राणांच्या प्रचारासाठी येत असेल्या केंद्रीय गृहमंत्री अमित शाह यांच्या सभेला मंजुरी दिली. त्यामुळे, बच्चू कडू आक्रमक झाले होते. गृहमंत्र्यांनी तुम्हाला नियम मोडायला सांगितले का, गृहमंत्र्यांच्या सभेला परवानगी कशी दिली, पोलिसांनी नियम का धाब्यावर बसवले? अशा प्रश्नांची सरबत्ती करत पोलिसांना धारेवर धरले. तसेच, गृहमंत्रीच कायदा मोडून सभा घेत असतील तर आता काहीच उरले नाही, असेही बच्चू कडू यांनी म्हटले.
काय आहे नेमका वाद
आमदार बच्चू कडूंच्या प्रहार जनशक्ती पक्षाने दिनेश बूब यांना लोकसभेच्या मैदानात उतरवले आहे. त्यांच्या प्रचारासाठी सायन्सकोर मैदान आरक्षित करण्यात आले होते. नवनीत राणा यांच्याकडे याच मैदानासाठी 21 व 22 एप्रिलपर्यंत परवानगी होती. तर, आम्हाला 23 व 24 तारखेची परवानगी मिळाली असतानाही आम्हाला मैदान न देता गृहमंत्र्यांच्या सभेसाठी हे मैदान दिल्याने आमदार कडू चांगलेच संतापले होते. 23 आणि 24 एप्रिलसाठी प्रहारने हे मैदान आरक्षित केले होते. त्यासाठी रीतसर पैसे भरुन पावती घेतल्याचा दावा प्रहार संघटनेच्यावतीने करण्यात आला आहे. मात्र, याच मैदानावर नवनीत राणा यांच्या प्रचारासाठी अमित शाह यांची सभा आयोजित करण्यात आली आहे. विशेष म्हणजे ही सभा बुधवारी 24 एप्रिल रोजी होत असून त्यासाठीची जय्यत तयारी सुरु असतानाच आज बच्चू कडूंनी मैदान गाठून पोलिसांना जाब विचारला. यावेळी, आमदार कडू चांगलेच आक्रमक झाले होते.
बच्चू कडू पोलिसांवर संतापले
येथील सायन्सकोर मैदानावर कार्यकर्त्यांसह पोहोचलेल्या बच्चू कडूंनी आक्रमक बाणा दाखवत पोलिसांना सवाल केला. तसेच तुम्ही निपक्ष आणि सर्वांना समान न्याय देणार असल्याची शपथ घेता, त्या शपथेचा अपमान केला. आपण घेतलेल्या शपथेची आठवण ठेवा, असे म्हणत बच्चू कडूंनी पोलिसांना जाब विचारला. यावेळी, प्रहारच्या कार्यकर्त्यांनी पोलिसांचे पाय धरुन गांधीगिरी करण्याचाही प्रयत्न केल्याचं दिसून आलं. तर, आमची परवानगी असतानाही आम्हालाच मैदाना मिळत नसेल तर, सलाम तुमच्या वर्दीला अशी उपरोधात्मक टीकाही बच्चू कडूंनी केली.
महत्त्वाच्या बातम्या
