मुंबईत जागावाटपाची चर्चा असतानाच नाशिकमध्ये महायुतीत मिठाचा खडा; भाजपचा शिंदे गटाला कडक इशारा

Maharashtra Assembly Election 2024 : काही दिवसांपूर्वी शिवसेना शिंदे गटाने नाशिक मध्य विधानसभा मतदारसंघावर दावा केला होता. यावरून महायुतीत जुंपल्याचे दिसून येत आहे.

Shiv Sena and BJP

Source : ABP Majha

नाशिक : लोकसभा निवडणुकीनंतर (Lok Sabha Election 2024) आता विधानसभा निवडणुकीचे (Maharashtra Assembly Election 2024) वारे वाहू लागले आहे. राज्यात महायुती (Mahayuti) विरुद्ध महाविकास आघाडीत (Mahavikas Aghadi) सामना रंगणार आहे. महायुती आणि महाविकास आघाडीत सध्या जागा वाटपावरून चर्चा सुरु आहे. त्यातच आता नाशिकमध्ये महायुतीत तणाव वाढल्याचे चित्र आहे.  

आगामी विधानसभा निवडणुकीच्या पार्श्वभूमीवर राजकीय नेत्यांकडून विविध जागांवर दावेदारी सुरु आहे. काही दिवसांपूर्वी शिवसेना शिंदे गटाने नाशिक मध्य विधानसभा मतदारसंघावर (Nashik Central Assembly Constituency) दावा केला. शिंदे गटाचे प्रवक्ते संजय शिरसाट यांनी थेट उमेदवाराचे नाव जाहीर केले. संजय शिरसाट यांच्या नाशिक दौऱ्यानंतर महायुतीतील मिठाचा खडा पडल्याचे बोलले जात आहे. 

संजय शिरसाटांकडून अजित बोरस्तेंच्या नावाची घोषणा 

संजय शिरसाट यांनी शिवसेनेचे उपनेते अजय बोरस्ते (Ajay Boraste) यांनी आयोजित केलेल्या ढोलताशा महोत्सवाच्या कार्यक्रमाला हजेरी लावली होती. यावेळी माध्यमांशी बोलताना संजय शिरसाट यांनी नाशिक मध्य विधानसभा मतदारसंघाच्या उमेदवाराबाबत मोठं वक्तव्य केलं होतं. अजय बोरस्ते आमच्यासोबत विधानसभेत दिसतील, असे त्यांनी म्हटले होते. 

भाजपचा शिवसेनेला इशारा 

नाशिक मध्य विधानसभा मतदारसंघावर शिवसेनेने दावा ठोकल्यानंतर जिल्ह्यातील सर्वच जागांवर तयारी असल्याचा इशाराच भाजपने शिवसेनेला दिला आहे. वर्षानुवर्ष कार्यकर्ते काम करत आहेत. त्यामुळे आमची सर्वच जागांवर निवडणूक लढण्याची तयारी असल्याचा दावा भाजपचे प्रदेश प्रवक्ते प्रदीप पेशकार यांनी केला आहे.

दोन्ही पक्षातील संघर्ष वाढला

संजय शिरसाट यांच्या दौऱ्यानंतर शिवसेना उपनेते अजय बोरस्ते यांनी नाशिक जिल्ह्यातील सात जागांवर लढण्याची तयारी असल्याचा दावा करत वादाला आणखी फोडणी दिल्यानं दोन्ही पक्षातील संघर्ष वाढला आहे. मुंबईत जागा वाटपाच्या चर्चा होत असताना नाशिकमध्ये मात्र दोन्ही पक्षाचे नेते एकमेकांना आव्हान-प्रतिआव्हान देत असल्याचे चित्र आहे. 

...तर नाशिक मध्य विधानसभेतून निवडणूक लढवणार : अजय बोरस्ते 

दरम्यान, नाशिक मध्य विधानसभा मतदारसंघात भाजपच्या देवयानी फरांदे (Devyani Pharande) या सलग दोन टर्मपासून आमदार आहेत. मात्र संजय शिरसाट यांनी अजय बोरस्ते यांचे नाव जाहीर केले. याआधी अजय बोरस्ते हे लोकसभा निवडणुकीसाठी इच्छुक होते. मात्र मुख्यमंत्री एकनाथ शिंदे यांच्यासोबत झालेल्या चर्चेनंतर अजय बोरस्ते यांनी लोकसभा निवडणुकीतून माघार घेतली होती. पक्षाने संधी दिल्यास नाशिक मध्य विधानसभेतून निवडणूक लढवण्यास तयार असल्याचे अजय बोरस्ते यांनी म्हटले होते. आता नाशिक मध्य विधानसभा मतदारसंघातून नक्की कोणाला उमेदवारी मिळणार? हे पाहणे महत्त्वाचे ठरणार आहे. 

आणखी वाचा