Nagpur Crime : रेशनचे 15 टन धान्य जप्त, काळाबाजार करणाऱ्या चौघांना अटक

मुलगा शासकीय रेशनिंग दुकान चालवतो, तर वडील कळमना येथे धान्याचा ठोक व्यवसाय करतात. या प्रकरणात पोलिसांनी 4 आरोपींना अटक करून जप्त धान्य अन्न पुरवठा विभागाच्या स्वाधिन केले आहे.

symbolic image

नागपूर: परिमंडळ 3 चे डीसीपी गजानन राजमाने यांच्या 'क्राइम इंटेलिजन्स युनिट'ने शासकीय रेशनचा (Ration black market racket) काळाबाजार करणाऱ्या टोळीचा पर्दाफाश केला. बापलेक मिळून शासकीय धान्याची (Government supply grains) खुल्या बाजारात विक्री करून लाखो रुपयांचा नफा कमवत होते. मुलगा शासकीय रेशनिंग दुकान चालवतो, तर वडील कळमना येथे धान्याचा ठोक व्यवसाय करतात. या प्रकरणात पोलिसांनी 4 आरोपींना अटक करून जप्त धान्य अन्न पुरवठा विभागाच्या स्वाधिन केले आहे. अश्विन उर्फ बंटी कृष्णराव बोलधन (वय. 39, रा. जुना बगडगंज, धावडे मोहल्ला), किरण भास्कर धकाते (वय. 48, रा. मिनीमातानगर), संतोष प्राण कापसे (वय. 28) आणि वाहन चालक मनोज घनश्याम पुरी (30, रा. गंगाबाग, पारडी) अशी अटकेतील आरोपींची नावे आहेत. या प्रकरणात बंटीचे वडील कृष्णराव बोलधन यांना आरोपी करणे निश्चित आहे. पोलिस त्यांच्या भूमिकेचा शोध घेत आहेत.

वाहनात ठेवली होती 33 पोती

जुना बगडगंज परिसरातील बंटी बोलधनच्या रेशन दुकानातून शासकीय धान्याचा साध्या पोत्यांमध्ये भरून काळाबाजार होत असल्याची माहिती पोलिसांना मिळाली होती. माहितीच्या आधारावर डीसीपी राजमाने यांच्या मार्गदर्शनात पथकाने बंटीच्या दुकानात धाड टाकली. यावेळी त्याच्या दुकानासमोर उभ्या एमएच-49/एटी-1168 क्रमांकाच्या पिकअप वाहनात पोलिसांना धान्याची पोती दिसली. 50 किलो वजनाचे 31 साधे आणि 2 सरकारी पोते वाहनात मिळाले. पोलिसांनी वाहन चालक मनोज पुरी आणि माल भरणाऱ्या संतोष कापसेची चौकशी केली असता बंटीने त्यांना त्याचे वडील कृष्णरावच्या कळमना येथील दुकानात ते पोहोचविण्यास सांगितल्याची माहिती मिळाली. बंटीला याबाबत विचारले असता तो उडवा-उडवीचे उत्तर देत होता. यामुळे त्याच्या गोदामाची झडती घेतली असता सरकारी धान्याची 100 पोती तांदूळ आणि 71 पोती गव्हाची मिळाली. सोबतच 68 साध्या पोत्यांमध्ये गहू आणि 9 पोत्यांमध्ये तांदूळ मिळाले. माहिती मिळताच अन्न पुरवठा विभागाचे अधिकारीही घटनास्थळावर पोहोचले. जवळपास 15 टन (Ton Gains) माल पोलिसांनी जप्त केला. आरोपींवर जीवनावश्यक वस्तू अधिनियमांतर्गत गुन्हा नोंदविण्यात आला आहे. ही कारवाई पोलीस उपनिरीक्षक जितेश आरवेल्ली, पकंज गुप्ता, पोहवा विनोद गवई, आशीष अंबादे, राजेश बेंडेकर, सूरज मडावी यांनी केली.

मोठ-मोठे माफिया उतरले मैदानात

धान्याचा काळाबाजार ही काही नवीन गोष्ट नाही. अनेक दिवसांपासून शहरात शासकीय धान्याचा काळाबाजार सुरू आहे. अनेक माफियांनी त्यांच्या नातेवाईकांच्या नावावर रेशनिंगच्या धान्याचा परवाना घेऊन दुकान उघडले आहे. गरीबांसाठी असलेला हा माल त्यांना मिळण्याऐवजी साध्या पोत्यांमधून थेट राईस मिलांपर्यंत पोहोचविला जातो. काही लोक किराणा दुकान उघडून बसले आहेत. काही टोळ्या झोपडपट्ट्यांमध्ये जाऊन रेशनचे धान्य गोळा करण्याचे काम करतात. या व्यवसायात सर्वात सराईत माफिया अनेक वर्षांपासून पोलिसांना गुंगारा देत आहे. पोलिसांना टिप देऊन त्याने अनेकांचे दुकान बंद पाडले आहे. इतकेच नाहीतर धान्य परिवहनाचे कंत्राट घेणाऱ्यालाही त्याने बाजारातून हटविण्याचे काम केले. आता तो स्वत: मोठ्या प्रमाणात सरकारी धान्य थेट मिलांमध्ये पाठवतो. तेथे धान्य स्वच्छ झाल्यानंतर दक्षिणी राज्यांमध्ये जाते.

इतर महत्त्वाच्या बातम्या

Aaditya Thackeray : महाराष्ट्राचा आवाज बुलंद करणं हा गुन्हा आहे का? आदित्य ठाकरेंचा हल्लाबोल