Mumbai Local Train: रेल्वे प्रवाशांसाठी महत्त्वाची बातमी, दर अडीच मिनिटांनी लोकल ट्रेन, सीबीटीसी यंत्रणेमुळे मोठा दिलासा मिळणार
Mumbai Railway: मुंबईकर आता वेळेत कामावर पोहोचणार, लेटमार्कचं टेन्शन खल्लास होणार. सीबीटीसी प्रणालीमुळे येत्या तीन वर्षात लोकल फेऱ्यांची संख्या दुप्पट होईल. 350 एसी लोकल ट्रेन सुरु होणार. दोन लोकलमधील वेळेचे अंतर कमी होणार
मुंबई: मुंबईची लाईफलाईन समजली जाणारी लोकल ट्रेन शहरातील नागरिकांच्या जीवनाचा अविभाज्य भाग आहे. मुंबई उपनगर, ठाणे, अंबरनाथ, नवी मुंबई, बदलापूर परिसरातील बहुतांश चाकरमान्यांना आपले कार्यालय गाठण्यासाठी लोकल ट्रेनवर (Railway Train) अवलंबून राहावे लागते. त्यामुळे मुंबईकरांचे (Mumbai News) आयुष्य लोकल ट्रेनच्या तालावर धावते, असे म्हटल्यासही वावगे ठरणार नाही. मात्र, गेल्या काही वर्षांमध्ये लोकल ट्रेनचे (Mumbai Local Train) कोलमडणारे वेळापत्रक, तांत्रिक बिघाड आणि त्यामुळे प्रवाशांवर तासनतास ताटकळत राहण्याची वेळ येणे, हे चित्र सामान्य झाले आहे. परंतु, लवकरच हे चित्र बदलण्याची शक्यता आहे. कारण मुंबईतील लोकल ट्रेन आता वेळेवर धावण्याच्यादृष्टीने एक नवीन यंत्रणा सुरु होणार आहे.
केंद्रीय रेल्वेमंत्री अश्विनी वैष्णव यांनी नुकताच मुंबई दौरा केला. यावेळी त्यांनी लोकल ट्रेनसाठीच्या नव्या प्रणालीविषयी भाष्य केले. रेल्वे मार्गावरील तांत्रिक अडचणी दूर करत तिन्ही मार्गांवरील लोकल ट्रेन्सना कवच प्रणालीबरोबर कम्बाईन कम्युनिकेशन्स बेस्ड कंट्रोल ट्रेन कंट्रोल (सीबीटीसी) यंत्रणेशी जोडले जाणार आहे. त्यामुळे दोन लोकलमधील वेळेचे अंतर 180 सेकंदांवरुन 150 सेकंदांपर्यंत (अडीच मिनिटे) कमी होणार आहे. अशाप्रकारची यंत्रणा लाभणारे मुंबई हे पहिलेच शहर ठरणार आहे. सीबीटीसी प्रणालीमुळे येत्या तीन वर्षात लोकल फेऱ्यांची संख्या दुप्पट होईल, असा दावा रेल्वेमंत्री अश्विनी वैष्णव यांच्याकडून करण्यात आला.
मुंबईकरांसाठी 350 नव्या एसी लोकल
मुंबई उपनगरीय रेल्वे सेवेसाठी 350 नव्या एसी लोकल विकत घेण्यासंदर्भात रेल्वेकडून निविदा काढली जाणार आहे. मात्र, एसी ट्रेनला असणाऱ्या राजकीय विरोधामुळे ही प्रक्रिया थांबल्याचे रेल्वेमंत्री अश्विनी वैष्णव यांनी सांगितले. मात्र, एसी ट्रेनमध्ये प्रवाशांची संख्या वाढत असल्याने उपनगरी रेल्वे मार्गावर एसी ट्रेन्सची संख्या वाढवण्यात येईल.
गणेशोत्सवामुळे आजचा मेगाब्लॉक रद्द
गणेशदर्शनानिमित्त रविवारी मुंबईत मोठ्याप्रमाणावर भाविक येणार असल्याने मध्य रेल्वेने आजचा मेन लाईनवरचा नियमित मेगाब्लॉक रद्द केला आहे. तथापि, हार्बर मार्गावर मात्र सकाळी 9.40 ते सायंकाळी 4.51 या वेळेत दरम्यान मेगाब्लॉक घेण्यात येणार असल्याचे कळवण्यात आले आहे.
रविवारी ब्लॉकच्या काळात पनवेल येथून शेवटची लोकल सकाळी ९:४० वाजता छत्रपती शिवाजी महाराज टर्मिनससाठी सुटेल, तर ब्लॉकनंतरची पहिली पनवेल लोकल छत्रपती शिवाजी महाराज टर्मिनस येथून सायंकाळी ४:५१ वाजता सुटेल. ब्लॉक कालावधीत कुर्ला- पनवेलदरम्यान २० मिनिटांनी विशेष सेवा चालवल्या जातील. हार्बर मार्गावरील प्रवाशांना ब्लॉक कालावधीत मुख्य मार्ग आणि पश्चिम रेल्वेमार्गे प्रवास करण्याची मुभा देण्यात आली आहे.
आणखी वाचा
ठाण्यातील खाडी पुलांच काम पूर्ण, मुंबई-पुणे प्रवासाचा वेळ कमी होणार, विधानसभेपूर्वी रस्ता सुरु होणार
महत्त्वाच्या बातम्या
