एसीबीचं धाडसत्र जोरात; 35 हजार लाच घेताना वैद्यकीय अधिकाऱ्याला रंगेहात अटक, सापळा रचून बेड्या

एबीसी पथकाने मुंबईतील मंत्रालयात जाऊन अधिकाऱ्यास लाच घेताना रंगेहात अटक केलेल्या कारवाईची राज्यभर चर्चा झाली.

Palghar bribe case doctor arrest by ACB

Source : Abp

पालघर : राज्यात एसीबी (ACB) पथकाडून धडक मोहिम सुरू असून आजच मुंबईतील एका पोलीस अधिकाऱ्यास अटक केली आहे. त्यामुळे, पुन्हा एकदा पोलीस प्रशासनातही कर्मचाऱ्यांचे धाबे दणाणले असून पालघर जिल्ह्यातही लाचलुचपत प्रतिबंधक पथकाने अधिकाऱ्यास लाच (Bribe) घेताना रंगेहात अटक केली. पालघर जिल्ह्याच्या डहाणू तालुक्यातील लाचलुचपत प्रतिबंधक विभागाने (ACB) मोठी कारवाई करत प्राथमिक आरोग्य केंद्रातील एका वैद्यकीय अधिकाऱ्यास लाच स्वीकारताना बेड्या ठोकल्या. त्याच्याकडून, 35 हजार रुपयांची रोकडही जप्त करण्यात आली. 

एबीसी पथकाने मुंबईतील मंत्रालयात जाऊन अधिकाऱ्यास लाच घेताना रंगेहात अटक केलेल्या कारवाईची राज्यभर चर्चा झाली. त्यानंतर, अनेक ठिकाणी एसीबीने छापे टाकत लाचखोर अधिकारी, व कर्मचाऱ्यांना अटक केली आहे. त्यातच, आता पालघर जिल्ह्यातही वैद्यकीय विभागात अशीच कारवाई करण्यात आली. मिळालेल्या माहितीनुसार, डहाणू तालुक्यातील गंजाड अंतर्गत उपकेंद्र आंबेसरी येथील प्राथमिक आरोग्य केंद्रातील वैद्यकीय अधिकारी डॉ. विजय माणिक सांगळे (वय 34) यांस 35,000 रुपयांची लाच स्वीकारताना पकडण्यात आले. तक्रारदार (वय 40) यांचे इको वाहनाचे बिल मंजूर करून देण्यासाठी आरोपी डॉक्टरांनी वारंवार पैशांची मागणी केली होती. अखेर तक्रारदाराने याबाबत लाचलुचपत प्रतिबंधक विभाग, पालघर यांच्याकडे तक्रार दाखल केली. तक्रारीची पडताळणी केल्यानंतर 17 मार्च 2026 रोजी सापळा रचण्यात आला. या कारवाईत आरोपी डॉ. सांगळे यांना तक्रारदाराकडून 35,000 रुपयांची लाच स्वीकारताना रंगेहात पकडण्यात आले.

दरम्यान, याप्रकरणी डहाणू पोलीस ठाण्यात भ्रष्टाचार प्रतिबंधक कायदा 1988 (सुधारित 2018) अंतर्गत गुन्हा दाखल करण्याची प्रक्रिया सुरू आहे. या कारवाईत पोलीस उपअधीक्षक यांच्या मार्गदर्शनाखाली लाचलुचपत प्रतिबंधक विभागाच्या पथकाने सहभाग घेतला.

बीडमधील तहसीलदार निलंबित

लाच घेतल्याप्रकरणी अटक करण्यात आलेले परळीचे तहसीलदार व्यंकटेश मुंडे यांच्यावर निलंबनाची कारवाई करण्यात आली आहे. भ्रष्टाचार प्रतिबंधक कायद्याअंतर्गत दाखल झालेल्या गुन्ह्यानंतर त्यांचे निलंबन करण्यात आले असून पुढील आदेश येईपर्यंत निलंबित असणार आहेत. छत्रपती संभाजी नगरचे विभागीय आयुक्त जितेंद्र पापळकर यांनी निलंबनाच्या आदेशावर स्वाक्षरी केली आहे. एका प्रकरणात सॉल्वन्सी प्रमाणपत्र देण्यासाठी मुंडे यांनी पन्नास हजार रुपयांची लाच मागितली होती. याच प्रकरणात व्यंकटेश मुंडे यांच्यावर परळी शहर पोलीस ठाण्यात गुन्हा दाखल करण्यात आला होता आणि त्यांना अंबाजोगाईतील न्यायालयात हजर करण्यात आले होते. 

हेही वाचा