Mumbai Corona Update : दोन वर्षानंतर नव्या कोरोनाबाधितांची संख्या शंभरच्या आत, मुंबईकरांसह पालिका प्रशासनाला मोठा दिलासा!

Corona Update : मुंबईमध्ये आज बऱ्याच काळानंतर सर्वाधिक कमी रुग्ण आढळले आहेत. मागील 24 तासांत केवळ 96 नवे रुग्ण आढळले असून 188 जण कोरोनामुक्त झाले आहेत.

Mumbai Corona

Mumbai Corona Update : मुंबईत (Mumbai) आज नवे 96 रुग्णच आढळले आहेत. मागील जवळपास दोन वर्षानंतर रुग्णसंख्या 100 हून कमी आढळली आहे. दरम्यान ही मुंबईकरांसाठी अत्यंत दिलासादायक गोष्ट असून मुंबई अनलॉकच्या सुरु असलेल्या चर्चांच्या दृष्टीनेही ही महत्त्वाची गोष्ट आहे. रुग्ण दुपटीचा कालावधीही 3 हजारांपार गेला असून रुग्णालयातही अत्यंत कमी जणांना दाखल करण्यात आलं आहे. 

मुंबई महानगरपालिकेने (Mumbai BMC) दिलेल्या माहितीनुसार, मुंबईत 96 नवे कोरोना रुग्ण आढळले आहेत. तर 188 जण कोरोनामुक्त झाले आहेत. त्यामुळे मुंबईतील रिकव्हरी रेट 98 टक्के इतका झाला आहे. नव्याने आढळलेल्या कोरोना रुग्णांमुळे मुंबईतील सक्रिय रुग्णसंख्या 1 हजार 415 इतकी झाली आहे. आज नव्याने सापडलेल्या 96 रुग्णांपैकी 17 रुग्णांनाच रुग्णालयात दाखल करण्यात आल्याने पालिकेकडील 36 हजार 308 बेड्सपैकी केवळ 807 बेड वापरात आहेत. याशिवाय मुंबईतील साप्ताहिक कोरोना रुग्णवाढीचा दर ही 0.02% टक्के इतका झाला आहे.

मुंबई अनलॉक होणार?

राज्यभरात कोरोनाचे रुग्ण (Coronavirus)  कमी होऊ लागल्याने राज्य पुन्हा एकदा अनलॉकच्या दिशेने वाटचाल करू लागले आहे. त्यामुळे येत्या दोन दिवसांत अनेक निर्बंध शिथिल करण्यासंदर्भात राज्य सरकारचे प्रयत्न सुरू आहेत. याचा आढावा घेण्यासाठी मुख्य सचिव आणि आपत्ती व्यवस्थापन विभागाच्या अधिकारी यांच्यामध्ये बैठका पार पडल्या आहेत. यावर आता लवकरच मुख्यमंत्री अंतिम निर्णय घेणार आहेत

हे ही वाचा :

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोड पाहा लाईव्ह - ABP Majha