कोरोना रुग्णांना बेड मिळाला नाही, तर थेट मला फोन करा, मी बेड देईनच :  महापालिका आयुक्त इकबालसिंह चहल 

कोरोना (Corona) रुग्णांना बेड्स मिळत नसल्याच्या तक्रारी येत असताना बेड मिळाला नाही, वॉर्ड वॉर रुमकडून फोन आला नाही तर थेट मला फोन करा, मी बेड देईनच असे आश्वासन मुंबई महापालिका आयुक्त इकबालसिंह चहल (BMC commissioner Iqbal Singh Chahal) यांनी दिलं आहे. 

BMC_Vaccination

मुंबई : मुंबईत गेल्या काही दिवसांपासून कोरोनाची रुग्णसंख्या वाढत आहे. त्यामुळे कोरोना रुग्ण आणि उपलब्ध बेड्सची संख्या यांचा ताळमेळ बिघडला आहे. कोरोना रुग्णांना बेड्स मिळत नसल्याच्या तक्रारी येत असताना बेड मिळाला नाही, वॉर्ड वॉर रुमकडून फोन आला नाही तर थेट मला फोन करा, मी बेड देईनच असे आश्वासन मुंबई महापालिका आयुक्त इकबालसिंह यांनी दिलं आहे. 

पुढच्या काही दिवसांत दरदिवसाची रुग्णसंख्या 10 हजारांवर जाईल. मात्र, वाढत्या रुग्णसंख्येसाठी बेड व्यवस्थापनाची साखळी पुन्हा एकदा सक्रीय करणार असल्याचंही महापालिकी आयुक्तांनी सांगितलंय. 

महापालिका आयुक्त म्हणाले की,उच्चभ्रु लोक वशिल्याचा वापर करुन परस्पर लॅबकडून कोविड रिपोर्ट घेतात आणि खाजगी हॉस्पिटलमध्ये बेड मिळवतात. मात्र त्यामुळे बेड व्यवस्थापन साखळी तुटते. वॉर्ड वॉर रुमकडून रुग्णाची दररोज चौकशी केली जाते आणि लक्षणे असल्यास तसेच कोमॉर्बिड व्यक्तीना  सरकारी किंवा खाजगी रुग्णालय अशा त्यांच्या मागणीनुसार बेड  उपलब्ध करुन दिला जातो.

महापालिका आयुक्त म्हणाले की, जम्बो कोविड सेंटर, खाजगी रुग्णालयातील 80% बेड पुन्हा सक्रीय करणार. टप्प्याटप्प्यानं आठवड्याला बेडची संख्या वाढववत नेण्यात येणार आहे. डॅशबोर्डवर 13 हजार बेड आहेत. येत्या आठवड्यात 20 हजार बेड उपलब्ध होतील. 

लॉकडाऊनच्या विषयावर बोलताना आयुक्त म्हणाले की, नाईट कर्फ्युसारखे निर्बंध आपण लावले आहेत. 15 दिवसांच्या काळात नाईट कर्फ्युचा परिणाम होतोय का हे बघितलं जाईल आणि पुढचा निर्णय घेतला जाईल.

मुंबईत सध्या 3000 बेड रिकामे आहेत, तर 450 बेड खाजगी हॉस्पिटलमध्ये रिकामे आहेत. बंद केलेले जम्बो कोविड सेंटर पुन्हा सुरु करणार आहे. 9000 बेड जम्बो कोविड सेंटरमध्ये उपलब्ध होतील.

सर्व हॉस्पिटल्सनी ऑक्सिजनचा पुरवठा, व्हेन्टिलेटर्सची संख्या सरकारच्या नियमानुसार आहे का तपासावे. पीपीइ किट्स, मास्क, औषधं यांचा अॅडवान्समध्ये साठा करुन ठेवावा. फायर ऑडिट तात्काळ करावे. सर्व खासगी हॉस्पिटल्सनी एक नोडल अधिकारी नेमावा. त्याने दवाखान्यातील सद्यस्थितीची माहिती द्यावी. आपत्ती व्यवस्थापन कायदा 2005 आणि एपिडेमिक डिसीज अॅक्ट 1897 नुसार सर्व हॉस्पिटल्सनी व्यवस्थापन करावं, असा सूचना देण्यात आल्या आहेत. 

महत्वाच्या बातम्या :