Hasan Mushrif: दोन बायका असतील तर नेमकं काय करायचं? कोणाला मिळणार योजनेचा लाभ ? हसन मुश्रीफांनी दिलं उत्तर म्हणाले 'आवडत्या...'

Hasan Mushrif: लाडकी बहिण योजनेनंतर, लाडका भाऊ, लाडका दाजी, लाडकी सून अशा अनेक योजना अशा चर्चा आणि टीका सातत्याने आपल्याला पहायला मिळतात.

Hasan Mushrif

Source : PTI

Hasan Mushrif:  राज्याच्या राजकारणासह प्रत्येक ठिकाणी लाडकी बहिण योजनेची (Ladki Bahin Yojana) चर्चा सुरू आहे. लाडकी बहिण योजनेनंतर, लाडका भाऊ, लाडका दाजी, लाडकी सून अशा अनेक योजना अशा चर्चा आणि टीका सातत्याने आपल्याला पहायला मिळतात. लाडकी बहिण योजनेनंतर आता अनेक प्रश्न नागरीक विचारत असल्याचं राष्ट्रवादी काँग्रेसचे नेते (अजित पवार गट) हसन मुश्रीफ यांनी म्हटलं आहे. 

यावेळी बोलताना हसन मुश्रीफ (Ladki Bahin Yojana) म्हणाले, "आता दोन बायका असतील तर नेमकं काय करायचं? असा सवाल काही लोक विचारत आहेत, पण त्यांनी आवडत्या बायकोला या योजनांचा फायदा मिळवून द्यावा, असंही ते पुढे म्हणालेत.

त्याचबरोबर आगामी विधानसभा निवडणुकीत कोल्हापूर जिल्ह्यातील चार जागा द्या आम्ही सर्व जागा निवडून आणू असा विश्वास देखील त्यांनी यावेळी व्यक्त केला आहे. तर अजित पवारांच्या चर्चेत आलेल्या गुलाबी जॅकेटवरती मुश्रीफ (Ladki Bahin Yojana)  म्हणाले, "गुलाबी जॅकेट घालून, बदललेल्या अजितदादा आपल्यासमोर आले आहेत. गुलाबी जॅकेट का? हे मला काही अजित दादांनी सांगितले नाही.पण बदललेला रंग  उद्याच्या निवडणुकीत राष्ट्रवादी काँग्रेस पक्ष सर्वात मोठा पक्ष म्हणून नावा रुपास येईल याचा विश्वास मला आहे, असंही त्यांनी यावेळी म्हटलं आहे. 

योजनेचा लाभ घेण्यासाठी आवश्यक कागदपत्रे कोणती?

मुख्यमंत्री लाडकी बहीण योजनेचा लभ घेण्यासाठी सुरुवातीला आधिवास प्रमाणपत्र आवश्यक असल्याचे नमूद करण्यात आले होते. मात्र, आता लाभार्थी महिलेकडे आधिवास प्रमाणपत्र उपलब्ध नसेल तरीही चालणार आहे. त्याऐवजी  महिलेकडे 15 वर्षापूर्वीचे रेशन कार्ड किंवा मतदार ओळखपत्र किंवा शाळा सोडल्याचे प्रमाणपत्र किंवा जन्म दाखला या चारी पैकी कोणतेहे ओळखपत्र/प्रमाणपत्र असल्यास ते ग्राह्य धरले जाणार आहे. परराज्यात जन्म झालेल्या महिलांनी महाराष्ट्रातील आधिवास असणाऱ्या पुरुषाबरोबर विवाह केला असेल तर अशा बाबतीत त्यांच्या पतीचा जन्मा दाखला किंवा शाळा सोडल्याचा आवश्यक आहे. 

...तर उत्पन्नाचा दाखला लागणार नाही

दरम्यान, सुरुवातीला कुटुंबाचे उत्पन्न अडीच लाख रुपयांच्या आत असेल तरच या योजनेचा लाभ घेता येणार असल्याची सांगितले होते. मात्र, आता यामध्ये बदल करण्यात आला आहे. मात्र, जर तुमच्याकडे हा दाखल नसेल तर ज्या कुटुंबाकडे पिवळे किंवा केशरी रेशनकार्ज उपलब्ध आहे, त्यांना उत्पन्नाच्या दाखला या प्रमाणपत्रातून सूट देण्यात आली आहे. 

योजनेची मुदत आणि वयात केली वाढ, नियमात केले 'हे' बदल

सदर योजनेत अर्ज करण्याची मुदत ही 1 जुलै, 2024 ते 15 जुलै 2024 पर्यंत ठेवण्यात आली होती. या मर्यादेत सुधारणा करण्यात येत असून आता सदर मुदत 2 महिने ठेवण्यात आली आहे. आता या योजनेचा लाभ घेण्यासाठी 31 ऑगस्ट 2024 पर्यंत लाभार्थी महिलांना अर्ज करता येणार आहे. तसेच दिनांक 31 ऑगस्ट 2024 पर्यंत अर्ज करण्यात आलेल्या लाभार्थी महिलांना 1 जुलै 2024 पासून दर महिन्याला 1500 रुपये आर्थिक लाभ देण्यात येणार आहे. तसेच या योजने अंतर्गत आता 21 ते 65 वर्षातील महिलांना प्रत्येक महीन्याला 1500 रुपये देण्यात येणार असल्याची घोषणा करण्यात आलीय. सुरुवातीला यामध्ये 21 ते 60 वर्षापर्यंतची अट घालण्यात आली होती. आता यामध्ये 5 वर्षांनी मुदत वाढवण्यात आली आहे. तसेच कुटुंबातील सदस्यांची संयुक्तपणे पाच एकरपेक्षा जास्त शेतजमीन असेल त्यांना या योजनेचा लाभ घेता येणार नव्हता. परंतु, ही जमिनीची अटही आता शिथिल करण्यात आली आहे. जमिनीच्या मालकीची अट काढण्यात आली आहे.

या योजनेचा लाभ घेण्यासाठी कसा कराल अर्ज?

अर्ज करण्याची प्रक्रिया योजनेचे अर्ज पोर्टल/मोबाइल अॅपद्वारे/सेतु सुविधा केंद्राव्दारे ऑनलाईन भरले जातील.
पात्र महिलांना योजनेसाठी ऑनलाईन अर्ज करावा लागणार आहे.
अर्ज मंजूर झाल्यावर आधार लिंक केलेल्या बँक खात्यात रक्कम हस्तांतरीत केली जाईल