Vice President Election 2022 : भारताचे पहिले उपराष्ट्रपती कोण? किती जणांनी भुषावले पद?

Vice President Election 2022 : उपराष्ट्रपती पदासाठी उमेदवारी अर्ज भरण्याची प्रक्रिया मंगळवारपासून सुरू झाली.

Vice President Election 2022

Vice President Election 2022 : उपराष्ट्रपती पदासाठी उमेदवारी अर्ज भरण्याची प्रक्रिया मंगळवारपासून सुरू झाली. ही प्रक्रिया 19 जुलैपर्यंत चालणार आहे.  या निवडणुकीसाठी राजकीय पक्षांनी अद्याप उमेदवार जाहीर केलेले नाहीत. उपराष्ट्रपती पदाच्या निवडणूकीबाबत संपूर्ण माहिती आणि इतिहास जाणून घेऊयात... 

भारतीय राजपत्रात प्रकाशित झालेल्या अधिसूचनेद्वारे, निवडणूक आयोगाने उपराष्ट्रपती पदाच्या निवडणुकीसाठी खालील तारखा निश्चित  केल्या आहेत. -

19 जुलै 2022 (मंगळवार), नामनिर्देशनपत्र दाखल करण्याची अंतिम तारीख;
20 जुलै 2022, (बुधवार), नामनिर्देशनपत्रांची छाननी
22 जुलै 2022, (शुक्रवार), नामनिर्देशनपत्र मागे घेण्याची अंतिम तारीख 
6 ऑगस्ट, 2022, (शनिवार), या  दिवशी आवश्यकता भासल्यास मतदान घेतले जाईल.

उमेदवारी अर्ज कुठे जमा करायचा?
खोली क्रमांक 18, तळमजला, संसद भवन, नवी दिल्ली येथील कार्यालयात किंवा ते  अपरिहार्य कारणामुळे  गैरहजर असल्यास, सहाय्यक निवडणूक अधिकारी  सहसचिव पी.सी त्रिपाठी आणि लोकसभा सचिवालयाचे संचालक राजू श्रीवास्तव यांच्याकडे सदर  कार्यालयात सकाळी 11 ते  दुपारी 3 या वेळेत   कोणत्याही दिवशी (सार्वजनिक सुट्टी व्यतिरिक्त) सादर करता येतील.  मात्र 19 जुलै 2022 नंतर सादर करता येणार नाही.

उमेदवारी अर्ज दाखल करण्याची फी किती?
प्रत्येक उमेदवाराने फक्त पंधरा हजार रुपये जमा करावेत किंवा जमा केले जाऊ शकतात .ही रक्कम निवडणूक अधिकाऱ्यांकडे  नामनिर्देशनपत्र  सादर करताना रोख स्वरूपात किंवा आधी सरकारी कोषागारात जमा केली जाऊ शकते. आणि नंतर  नामनिर्देशनपत्रासोबत  ही रक्कम जमा केल्याची पावती जोडणे आवश्यक आहे. 

निवडणूक प्रक्रिया कशी असते?
लोकसभा आणि राज्यसभेचे सदस्य उपराष्ट्रपतीपदाच्या निवडणुकीत मतदान करण्यास पात्र आहेत, ज्यामध्ये नामनिर्देशित सदस्यांचाही समावेश आहे. या निवडणुकीसाठी निर्वाचित मंडळातील संसदेच्या दोन्ही सभागृहांतील 788 सदस्यांचा समावेश आहे. 

कोण करु शकते मतदान?
राज्यसभा सदस्य - 233
राज्यसभेचे नामनिर्देशित सदस्य - 12
लोकसभा सदस्य - 543 
एकूण - 788
उपराष्ट्रपती पदाच्या निवडणूकीत भाजप प्रणित एनडीएकडे आघाडी आहे. 
 
डॉ. सर्वपल्ली राधाकृष्णन हे देशाचे पहिले उपराष्ट्रपती होते. दोन टर्म ते या पदावर राहिले. उपराष्ट्रपतींचा कार्यकाळही पाच वर्षांसाठी असतो. ही निवडणूक महत्त्वाची आहे. कारण उपराष्ट्रपती हे राज्यसभेचे अध्यक्षही असतात. आतापर्यंत झालेले उपराष्ट्रपती... 

क्रमांक	नाव	कधीपासून	केव्हापर्यंत
1	डॉ. सर्वपल्ली राधाकृष्णन	13 मे, 1952	12 मे, 1962
2	झाकिर हुसेन	13 मे, 1962	12 मे, 1967
3	व्ही व्ही गिरी	13 मे, 1967	3 मे, 1969
4	गोपाल स्वरूप पाठक	31 ऑगस्ट, 1969	30 ऑगस्ट, 1974
5	बी.डी. जत्ती	31 ऑगस्ट, 1974	30 ऑगस्ट, 1979
6	मोहम्मद हिदायत उल्लाह	31 ऑगस्ट, 1979	30 ऑगस्ट, 1984
7	आर. वेंकटरामण	31 ऑगस्ट, 1984	24 जुलै, 1987
8	शंकर दयाल शर्मा	3 सप्टेंबर, 1987	24 जुलै, 1992
9	के आर नारायणन	21 ऑगस्ट, 1992	24 जुलै, 1997
10	कृष्ण कांत	21 ऑगस्ट, 1997	27 जुलै, 2002
11	भैरोव सिंह शेखावत	19 ऑगस्ट, 2002	21 जुलै, 2007
12	हमीद अन्सारी	11 ऑगस्ट, 2007	10 ऑगस्ट, 2017
13	व्यंकय्या नायडू	11 ऑगस्ट, 2017	11 ऑगस्ट 2022

 

उपराष्ट्रपती पदाची निवडणूक, कधी झाली, कोण जिंकले, कोण हरले?

क्रमांक	वर्ष	Date of Poll	विजेता	मते	उपविजेता	मते
1	1952	12-05-1952	डॉ. सर्वपल्ली राधाकृष्णन (बिनविरोध)
2	1957	11-05-1957	डॉ. सर्वपल्ली राधाकृष्णन (बिनविरोध)
3	1962	07-05-1962	झाकिर हुसेन	568	एन.सी सामंतसिंहर	14
4	1967	06-05-1967	व्ही व्ही गिरी	483	मोहम्मद हबीब	193
5	1969	30-08-1969	गोपाल स्वरूप पाठक	400
6	1974	27-08-1974	बी.डी. जत्ती	521	एन ई होरो	141
7	1979	27-08-1979	मोहम्मद हिदायत उल्लाह (बिनविरोध)
8	1984	22-08-1984	आर. वेंकटरामण	508	बी.सी. कांबळे	207
9	1987	07-09-1987	शंकर दयाल शर्मा  (बिनविरोध)
10	1992	19-08-1992	के आर नारायणन	700	काका जोगिंदर सिंह	2
11	1997	16-08-1997	कृष्ण कांत	441	सुरजित सिंह	273
12	2002	12-08-2002	भैरोव सिंह शेखावत	454	सुशिलकुमार शिंदे	305
13	2007	10-08-2007	हमीद अन्सारी	455	नजमा ए हेप्तुल्ला	222
14	2012	07-08-2012	हमीद अन्सारी	490	जसवंत सिंह	238
15	2017	05-08-2017	व्यंकय्या नायडू	516	गोपालक्रृष्ण	244