Sindhudurg : तळकोकणात मुसळधार पाऊस, सिंधुदुर्ग जिल्ह्यात 'ऑरेंज अलर्ट' जारी
Sindhudurg : सिंधुदुर्गामध्ये गेली दोन दिवस मुसळधार पाऊस पडत असून पुढची चार दिवस हा पाऊस कायम राहणार असल्याची माहिती देण्यात आली आहे.
सिंधुदुर्ग : तळकोकणात गेली दोन दिवस मुसळधार पाऊस पडत असून 18 जुलैपर्यंत सिंधुदुर्गात मुसळधार ते अतिमुसळधार पाऊस पडणार असल्याची माहिती हवामान विभागाने दिली आहे. आणखी चार दिवस मुसळधार पाऊस पडण्याची शक्यता वर्तवण्यात आल्याने सिंधुदुर्ग जिल्ह्यात ऑरेंज अलर्ट जारी करण्यात आला आहे.
गेले तीन दिवस मुसळधार बरसणाऱ्या पावसाने मालवण तालुक्यातील मसुरे पंचक्रोशीत जनजीवन विस्कळीत झाले आहे. रमाई नदीच्या पाण्याच्या पातळीत वाढ झाली आहे. मालवण बेळणे कणकवली मार्गावरील बागायत येथे पुराचे पाणी थेट बागायत तिठा येथील बाजारपेठे नजीक पोचले होते. वडाचापाट गोळवण मार्गावर वडाचापाट येथे तर पोईप धरणावर पाणी असल्याने हा मार्ग सुद्धा वाहतुकीस बंद झाला आहे. गड नदीला सुद्धा पूर आल्याने भगवंतगड कॉजवे पाण्याखाली गेला होता. तसेच पालयेवाडी येथे रस्त्यावर पाणी आल्याने बांदिवडेत पोहोचणारे रस्ते बंद झाले आहेत. नदीचे पाणी शेतीतून प्रवाहीत होऊन वाहत असल्याने भात शेती लावणी वाहून जाण्याचा धोका निर्माण झाला आहे. पावसाचा जोर रात्री पर्यंत कायम राहिल्यास मसुरेसह वेरळ, बागायत आदी भागातील शेतीचे नुकसान होणार आहे.
कुडाळ तालुक्यातील कर्ली नदी काठच्या नागरिकांना प्रशासनाने सतर्कतेचा इशारा दिला आहे. काल रात्री प्रशासनाने आंबेडकरनगर येथील पुरामुळे बाधित झालेल्या 6 कुटुंबातील 25 व्यक्तींना सुरक्षित ठिकाणी नातेवाईकांच्या घरी स्थलांतरित केलं. कुडाळ पावशी येथील भंगसाळ पुलाजवळ रात्री साडे आठ वाजता मोजलेल्या पाणी पातळीनुसार कर्ली नदीची पातळी 9 मीटर इतकी होती. आता मात्र पाणी ओसरत आहे.
जिल्ह्यातील दोडामार्ग तालुक्यातील भेडशी काजवेवर गाडीसह अडकलेल्या आंध्र प्रदेशातील पाच युवकांची भेडशीतील युवकांनी सुखरुप सुटका केली. गोवा येथुन आंध्रप्रदेश येथे परत असताना भेडशी काँजवेवर असलेल्या पाण्याचा अंदाज न आल्याने गाडीसह ते पाचजण अडकले होते. त्यातील प्रथम तिघेजण बाहेर पडले. तर अन्य दोघे गाडीत अडकून पडले होते. ही घटना समजताच भेडशीतील युवक घटनास्थळी दाखल झाले. पर्यायी मार्गाच्या बाजूने जात त्या काजवे जवळच्या रस्त्यावर असलेल्या कंबरभर पाण्यात उतरुन जात गाडीजवळ पोचले. गाडीतून दोघांना सुखरूप बाहेर काढले. काही काळाने पाणी कमी झाल्यावर ते वाहन सुरक्षित ठिकाणी आणून ठेवले. या मदत कार्यात गुरुनाथ डांगी, महेंद्र बोंन्द्रे, गणपत काणेकर, ऋषिकेश सोलापुरकर, रामचंद्र सोलापुरकर सिद्धेश डांगी ,रेहान लतिफ, नरेश मेस्त्री, पत्रकार गोविंद शिरसाट, उपसरपंच गणपत डांगी, दोडामार्ग पोलीस ठाणे निरीक्षक आर.जी.नदाफ, सहकारी पोलीस नाईक, दीपक सुतार उपस्थित होते.
महत्वाच्या बातम्या :
महत्त्वाच्या बातम्या
ट्रेंडिंग न्यूज
