एक्स्प्लोर

खासदार डॉ. जयसिद्धेश्वर शिवाचार्य यांच्या जात पडताळणीबाबतचा निकाल 3 ते 4 दिवसात येण्याची शक्यता

सोलापूर लोकसभा मतदार संघातील भाजपचे खासदार डॉ. जयसिद्धेश्वर शिवाचार्य यांच्या जात प्रमाणपत्रावरील तक्रारीची अंतिम सुनावणी आज पार पडली. सोलापूर जिल्हा जात पडताळणी समितीतर्फे 3 ते 4 दिवसात या प्रकरणाचा निकाल जाहीर करण्यात येणार आहे.

Written By : आफताब शेख, एबीपी माझा | Updated at : 15 Feb 2020 03:16 PM (IST)

MP Dr. Jayasiddheshwar Shivacharya's caste verification controversy खासदार डॉ. जयसिद्धेश्वर शिवाचार्य यांच्या जात पडताळणीबाबतचा निकाल 3 ते 4 दिवसात येण्याची शक्यता

सोलापूर : सोलापूर लोकसभा मतदार संघातील भाजपचे खासदार डॉ. जयसिद्धेश्वर शिवाचार्य यांच्या जात प्रमाणपत्रावरील तक्रारीची अंतिम सुनावणी आज पार पडली. सोलापूर जिल्हा जात पडताळणी समितीतर्फे 3 ते 4 दिवसात या प्रकरणाचा निकाल जाहीर करण्यात येणार आहे. खासदार डॉ. जयसिद्धेश्वर शिवाचार्य यांनी लोकसभा निवडणुकीत बेडा जंगम जातीचा दाखला सादर केला होता. मात्र हा दाखला बोगस असल्याची तक्रार प्रमोद गायकवाड, मिलिंद मुळे, विनायक कंडकुरे यांनी केली होती. त्यावर सोलापूर जिल्हा जात पडताळणी कार्यालयात आज अंतिम सुनावणी पार पडली. डॉ. जयसिद्धेश्वर शिवाचार्य यांनी आपण सादर केलेला दाखला वैध असल्याचे सांगत सन 1344 व 1347 फसली सालातील मोडी लिपीतील नमुना पुराव्यासाठी सादर केला होता.

सदर प्रकरणी तपासणीसाठी दक्षता समितीने तपासणी करुन आपला अहवाल सादर केला. या अहवालात खासदार डॉ. जयसिद्धेश्वर शिवाचार्य यांनी पुराव्यासाठी दाखल केलेला नमुनी संशयास्पद असल्याचे स्पष्ट करण्यात आले. तर दक्षता समिती तक्रारदाराच्या दबावात काम करत असून त्रयस्त दक्षता समितीमार्फत चौकशी करण्यात यावी असा अर्ज डॉ. जयसिद्धेश्वर शिवाचार्य यांचे वकील अॅड. संतोष नाव्हकर यांनी केला. मात्र जिल्हा जात पडताळणीने हा अर्ज फेटाळून लावत सुनावणी पुर्ण झाल्याचे कळविले.

दक्षता समितीचा अहवाल आम्हाला मान्य नसून याविरोधात आम्ही उच्च न्यायलयाचा दरवाजा ठोठवणार असल्याचे अॅड. संतोष नाव्हकर यांनी सांगितले. दरम्यान खासदार डॉ. जयसिद्धेश्वर यांनी खोटा दाखला सादर करुन जनतेची फसवणूक केल्याचा आरोप करत त्यांच्यावर फसवणुकीचा गुन्हा दाखल करण्यात यावा, अशी मागणी तक्रारदारांनी केली आहे. तर अॅड. संतोष नाव्हकर यांनी देखील खोटी कागदपत्र सादर करुन दिशाभूल केल्याप्रकरणी त्यांचे वकीलपत्र रद्द करण्याची मागणी तक्रारदार प्रमोद गायकवाड यांनी केली.

दरम्यान, सोलापूर लोकसभा मतदारसंघ हा अनुसूचित जातीसाठी राखीव होता. खासदार डॉ. जयसिद्धेश्वर शिवाचार्य यांनी बेडा जंगम जातीचा दाखला सादर करत निवडणूक लढविली होती. मात्र जयसिद्धेश्वर शिवाचार्य यांचे मूळ प्रमाणपत्र हिंदू लिंगायत असून त्यांनी बोगस जातीचा दाखला मिळवला असून त्याचे पुरावे आमच्याकडे असल्याचा आरोप याचिकाकर्त्यांनी केला आहे.

About the author आफताब शेख, एबीपी माझा

आफताब शेख हे एबीपी माझा वृत्त वाहिनीत सिनिअर करस्पॉन्डट म्हणून कार्यरत आहेत. मागील 9 वर्षांपासून एबीपी माझाच्या माध्यमातून कार्यरत असून आपल्या संवेदनशील आणि निष्पक्ष पत्रकारितेने त्यांनी स्वतंत्र ओळख निर्माण केली आहे. 3 जुलै 2017 रोजी मुंबई येथील एबीपी माझाच्या मुख्य कार्यालयातून त्यांनी पत्रकारितेच्या प्रवासाला सुरुवात केली. फेब्रुवारी 2019 पासून ते सोलापूर येथे सिनिअर करस्पॉन्डन्ट म्हणून कार्यरत आहेत. सध्या ते सोलापूर श्रमिक पत्रकार संघाचे सरचिटणीस म्हणूनही जबाबदारी सांभाळत आहेत.

सोलापूरच्या राजकीय घडामोडींपासून सामाजिक, शैक्षणिक, प्रशासकीय, औद्योगिक, मनोरंजन, क्रीडा आणि व्यावसायिक क्षेत्रांतील महत्त्वाच्या विषयांना त्यांनी एबीपी माझाच्या माध्यमातून राज्यस्तरीय व्यासपीठ मिळवून दिले आहे. ‘कामगारांचे शहर‘ म्हणून ओळखल्या जाणाऱ्या सोलापूरमधील कामगारांचे प्रश्न, सर्वसामान्य नागरिकांच्या समस्या आणि उपेक्षित घटकांचा आवाज शासनदरबारी पोहोचवण्याचा त्यांचा सातत्यपूर्ण प्रयत्न राहिला आहे. बहुभाषिक आणि समृद्ध सांस्कृतिक वारसा लाभलेल्या सोलापूरचा इतिहास, परंपरा आणि वर्तमानही त्यांनी आपल्या वार्तांकनातून प्रभावीपणे मांडले आहे. कोरोना काळात कोविड वॉर्डमध्ये प्रत्यक्ष जाऊन रुग्णांच्या व्यथा आणि आरोग्य व्यवस्थेतील वास्तव समोर आणला तर महापूर-दुष्काळातील रिपोर्ट्समधून त्यांनी आपल्या संवेदनशील पत्रकारितेचा प्रत्यय दिला. सोलापूरसह मुंबई, पुणे, धाराशिव, लातूर, बीड, नांदेड आणि छत्रपती संभाजीनगर जिल्ह्यांतही त्यांनी वार्तांकन केले आहे.

त्यांनी सोलापूरच्या दयानंद कला व शास्त्र महाविद्यालयातून कला शाखेची पदवी, तर मुंबई विद्यापीठातून मास्टर ऑफ मास कम्युनिकेशन अँड जर्नलिझम ही पदव्युत्तर पदवी प्राप्त केली आहे. पत्रकारितेसोबतच सामाजिक कार्याचीही त्यांना विशेष आवड आहे. महाविद्यालयीन जीवनातील सामाजिक योगदानासाठी 2016 मध्ये तत्कालीन राष्ट्रपती प्रणव मुखर्जी यांच्या हस्ते त्यांना इंदिरा गांधी राष्ट्रीय सेवा योजना पुरस्काराने (Indira Gandhi NSS Award-2016) सन्मानित करण्यात आले. याशिवाय, पत्रकारितेतील योगदानासाठी त्यांना विविध संस्था आणि संघटनांकडून अनेक पुरस्कारांनी गौरविण्यात आले आहे.

Published at : 15 Feb 2020 03:16 PM (IST)

Tags :

Caste Verification MP Dr. Jayasiddheshwar Shivacharya Loksabha Election