Pune : लाल महालातील लावणीच्या व्हिडीओवरुन वाद; संभाजी ब्रिगेडचा तीव्र आक्षेप, जितेंद्र आव्हाडांचा ट्विट करत विरोध

Pune News : पुण्यातील लाल महालात लावणीचा व्हिडीओ चांगलाच व्हायरल झाला, यावर आता राजकीय, सामाजिक आणि सिनेसृष्टीतून विविध प्रतिक्रिया येऊ लागल्या आहेत.

pune lal mahal lavani video viral

Pune News : पुण्यातील ऐतिहासिक लाल महालात (Lal Mahal) छत्रपती शिवाजी महाराजांनी स्वराज्यावर चालून आलेल्या शायस्तेखानाची बोटं तोडली, त्याच लाल महालात लावणीची शुटिंग झाली, आणि बघता बघता याचा व्हिडीओही चांगलाच व्हायरल झाला, यावर आता राजकीय, सामाजिक आणि सिनेसृष्टीतून विविध प्रतिक्रिया येऊ लागल्या आहेत. तर संभाजी ब्रिगेडने मात्र तीव्र आक्षेप नोंदवला असून संबंधितांवर कडक कारवाई करण्याची मागणी केली आहे, दरम्यान, राज्याचे गृहनिर्माण मंत्री जितेंद्र आव्हाड यांनी या प्रकाराचा विरोध केलाय. तर पुणे पोलिसांना आवाहन केले आहे.

लालमहालातील लावणीचा व्हिडीओ व्हायरल, अनेक संघटना आक्रमक, सर्वस्तरातून विरोध

सध्या सगळीकडे ट्रेडिंग असलेल्या चंद्रा गाण्यावर संबंधित तरुणी डान्स करताना दिसून येत आहे. व्हायरल झालेल्या व्हिडीओमध्ये दिग्दर्शक प्रसाद ओक यांच्या चंद्रमुखी चित्रपटातील चंद्रा या गाण्यावर एक तरुणी पुण्यातील लाल महालातील मध्यवर्ती ठिकाणी थिरकताना दिसत आहे. संबंधित तरुणी लावणीवर बेभान होऊन अदाकारी करताना दिसत आहे. पुण्यातील ऐतिहासिक लाल महाल मध्ये लावणीचा व्हिडीओ शुट केल्यामुळे याचा विरोध म्हणून अनेक संघटना आता आक्रमक झाल्या आहेत. दरम्यान, लाल महालात महापालिकेचे सुरक्षा रक्षकही तैनात असतात. मात्र तरीही संबंधित कलाकार आणि तरुणांनी सुरक्षारक्षकाला हाताशी धरुन लाल महालात लावणीचं शुटिंग केल्याचा आरोप केला जातोय. कुलदीप बापट यांनी या संबंधित गाण्याचं शूटिंग केलंय तर डान्सर वैष्णवी पाटील यांनी लावणी केल्याचं समोर आलंय. इंस्टाग्रामवर रिल्स शेअर करण्यासाठी चक्क लाल महालमध्ये ही लावणी करण्यात आली.

जितेंद्र आव्हाडांचा ट्विट, लाल महाल ही वास्तू नाच-गाण्यांचे चित्रीकरण करण्याची जागा नव्हे
या सर्व प्रकारावर जितेंद्र आव्हाड यांनी ट्विट करत याचा विरोध केला आहे. तसेच नागरिकांना आव्हानही केले आहे. ते म्हणाले, "पुण्यातला शिवाजी महाराजांचा लाल महाल ही वास्तू नाच गाण्यांचे चित्रीकरण करण्याची जागा नव्हे, यापुढे होता कामा नाही, कोणी केले असेल तर ते चित्रीकरण वापरू नका" 

 

पुण्यातला शिवाजी महाराजांचा लाल महाल हि वास्तू नाच गाण्यांचे चित्रीकरण करण्याची जागा नव्हे ...ह्यापुढे होता कामा नाही.. कोणी केले असेल तर वापरू नका @PuneCityPolice

— Dr.Jitendra Awhad (@Awhadspeaks) May 21, 2022

संभाजी ब्रिगेडचा तीव्र आक्षेप, पुणे पोलिसांना विनंती

पुण्यातील लाल महालात तरुणी लावणीवर बेभान होऊन अदाकारी करताना व्हिडीओमधून दिसत आहे. यावर संभाजी ब्रिगेडकडून तीव्र आक्षेप करण्यात येत आहे, महाराष्ट्राच्या स्मृतीस्थळावर बिभत्स पद्धतीने गाणं वाजवलं जातं, नृत्य केले जाते. मला पुण्याच्या पोलिस आयुक्तांना विनंती करायचीय, तुम्ही जातीने लक्ष घालून फरासखाना पोलिस स्टेशनच्या अधिकाऱ्यांना तातडीने संबंधितांवर गुन्हे दाखल करण्याचे आदेश द्या, अशी मागणी संभाजी ब्रिगेडच्या संतोष शिंदे यांनी केली आहे.