Maratha Reservation : छत्रपती शाहू महाराज आणि अजित पवार यांच्यात तासभर चर्चा, भेटीनंतर शाहू महाराज म्हणाले...
उपमुख्यमंत्री अजित पवार यांनी आज कोल्हापुरात श्रीमंत छत्रपती शाहू महाराज यांची भेट घेतली. या भेटीमुळे राजकीय चर्चांना उधाण आलं होतं. मराठा आरक्षणाच्या पार्श्वभूमीवर ही भेट अत्यंत महत्त्वाची ठरली आहे.
कोल्हापूर : एकिकडे खासदार संभाजीराजे छत्रपती यांनी मराठा आरक्षणाच्या मुद्द्यावरुन आंदोलनाची हाक दिलेली असतानाच उपमुख्यमंत्री अजित पवार यांनी कोल्हापुरात श्रीमंत छत्रपती शाहू महाराजांची भेट घेतली आहे. मराठा आरक्षणाच्या मुद्द्यावर सगळ्यांचं लक्ष वेधणारी ही भेट ठरली. मराठा आरक्षणासाठी संभाजीराजे छत्रपती यांनी सरकारविरोधात आक्रमक पवित्रा घेत आंदोलन पुकारलं आहे. त्यामुळे शाहू महाराज आणि अजित पवार यांच्यामध्ये काय चर्चा होते, याकडे संपूर्ण मराठा समाजाचं लक्ष लागलं होतं. अशातच या भेटीनंतर श्रीमंत छत्रपती शाहू महाराजांनी माध्यमांशी बातचित करत या भेटीदरम्यान झालेल्या चर्चेसंदर्भात माहिती दिली. मराठा समाजाला आरक्षण मिळेपर्यंत कोणत्या सुविधा देता येतील याबाबत भेटीदरम्यान चर्चा झाल्याची माहिती श्रीमंत छत्रपती शाहू महाराजांनी दिली.
श्रीमंत छत्रपती शाहू महाराज बोलताना म्हणाले की, "एकंदरीत सर्वच मुद्द्यांवर चर्चा झाली. यासंदर्भात उपमुख्यमंत्री अजित पवार स्वतःच माहिती देतील." अजित पवारांशी चर्चा करताना काय मार्गदर्शन केलं या प्रश्नावर बोलताना श्रीमंत छत्रपती शाहू महाराज म्हणाले की, "मार्गदर्शन हेच केलं की, मराठा समाजासाठी जेवढं काही करणं शक्य आहे. तेवढं त्यांनी करावं. हे अजित पवारांनी मान्य केलं आहे." पुढे बोलताना ते म्हणाले की, "सुप्रीम कोर्टानं मराठा आरक्षणावर निकाल दिला आहे. सुप्रीम कोर्टाचा निकाल पुन्हा एकदा अभ्यासला पाहिजे. समजून घेतला पाहिजे आणि जेवढं शक्य असेल ते सगळं केलं पाहिजे." तसेच संभाजीराजेंनी 16 जूनपासून आंदोलनाची हाक दिली आहे. यासंदर्भात काही चर्चा झाली का? असं विचारल्यावर या आंदोलनाबाबत कोणतीही चर्चा झालेली नाही, असं श्रीमंत छत्रपती शाहू महाराजांनी सांगितलं.
उपमुख्यमंत्री अजित पवार कोल्हापुरात छत्रपती शाहू महाराजांच्या भेटीला
राज्याचे उपमुख्यमंत्री अजित पवार आज कोल्हापूर दौऱ्यावर आहेत. या दौऱ्यात सकाळीच अजित पवार यांनी श्रीमंत छत्रपती शाहू महाराज यांची न्यू पॅलेज इथे भेट घेतली. या भेटीदरम्यान संभाजीराजे यांचे बंधू आणि माजी आमदार मालोजीराजे छत्रपती देखील उपस्थित होते. मराठा आरक्षणाच्या मुद्द्यावर सगळ्यांचं लक्ष वेधणारी ही भेट ठरली. मराठा आरक्षणासाठी संभाजीराजे छत्रपती यांनी सरकारविरोधात आक्रमक पवित्रा घेत आंदोलन पुकारलं आहे. त्यामुळे शाहू महाराज आणि अजित पवार यांच्यामध्ये काय चर्चा होते याकडे संपूर्ण मराठा समाजाचं लक्ष लागलं आहे.
16 जूनपासून कोल्हापुरातून मराठा आंदोलनाची सुरुवात
खासदार संभाजीराजे छत्रपती यांनी मराठा आरक्षणासाठी आंदोलनाची हाक दिली आहे. 6 जून रोजी रायगडवरील शिवराज्याभिषेक सोहळा संपन्न झाल्यावर संभाजीराजेंनी मराठा आरक्षणावर आपली भूमिका मांडली. येत्या 16 जूनपासून कोल्हापुरातील राजर्षि शाहू महाराजांच्या समाधीपासून मराठा आरक्षण आंदोलनाला सुरुवात होईल असं संभाजीराजे म्हणाले. "राजसदरेवरुन बोलतोय, तुम्ही समाजाचा खेळ केला तर आम्ही गप्प बसणार नाही. मी संयमी आहे, आजपर्यंत सहन केलं पण आता गप्प बसणार नाही, काय होईल ते होईल असं सांगत संभाजीराजे छत्रपतींनी मराठा समाजाला आंदोलनाची हाक दिली आहे.
राज्य सरकारचा मराठा आरक्षणाचा कायदा रद्द
राज्य सरकारने केलेला मराठा आरक्षणाचा कायदा सर्वोच्च न्यायालयाने रद्द केला. गायकवाड समितीचा अहवाल अस्वीकारार्ह असल्याचं न्यायालयाने म्हटलं. मुंबई उच्च न्यायालयाने हे आरक्षण वैध असल्याचा दिलेला निर्वाळा सर्वोच्च न्यायालयाच्या पाच न्यायमूर्तींच्या खंडपीठाने रद्द ठरवला. राज्यातील मराठा समाज सामाजिक आणि शैक्षणिकदृष्ट्या मागास नसल्याचं निरीक्षण सर्वोच्च न्यायालयाने नोंदवलं आहे. मराठा समाजाला आरक्षण देताना 2018 साली करण्यात आलेल्या घटनादुरुस्तीनुसार, कलम 342 अ समाविष्ट करण्यात आलं होतं, त्यानुसार मराठा समाजाला आरक्षण देताना योग्य पद्धतीचा अवलंब करण्यात आला नसल्याचा युक्तीवाद न्यायालयाने खोडून काढला. मुंबई उच्च न्यायालयाने वैध ठरवलेल्या मराठा आरक्षणाला आव्हान देणाऱ्या याचिका योग्य असल्याचं ठरवत मराठा आरक्षणाची तरतूद फेटाळून लावली आहे. आता राज्य सरकार या सर्वातून काय मार्ग काढतं ते पाहणं औत्सुक्याचं आहे.
महत्त्वाच्या इतर बातम्या :
महत्त्वाच्या बातम्या
