Maharashtra Bandh Live Updates : काही ठिकाणी कडकडीत बंद तर काही ठिकाणी संमिश्र प्रतिसाद
Maharashtra Bandh Live Updates : लखीमपूरमध्ये (Lakhimpur) शेतकऱ्यांना चिरडल्याच्या निषेधार्थ महाविकास आघाडीने आक्रमक पवित्रा घेत उद्या महाराष्ट्र बंदची हाक दिली आहे.
Background
मुंबई (Mumbai) : उत्तर प्रदेशातील लखीमपूरमध्ये शेतकऱ्यांना चिरडल्याच्या निषेधार्थ महाविकास आघाडीने उद्या महाराष्ट्र बंदची हाक दिली आहे. महाविकास आघाडीतील राष्ट्रवादी काँग्रेस, शिवसेना आणि काँग्रेसनेही सहमती दर्शवली आहे. नुकत्याच झालेल्या राज्य मंत्रिमंडळाच्या बैठकीत चर्चा झाल्यानंतर 11 ऑक्टोबरला बंद करण्यात येणार असल्याचा निर्णय घेण्यात आला आहे. दरम्यान, या बंद संदर्भात व्यापाऱ्यांच्या संमिश्र प्रतिक्रिया येत आहे.
काय म्हणाले महाविकास आघाडीचे नेते
राज्य मंत्रिमंडळाच्या बैठकीत लखीमपूर हिंसाचारावर चर्चा करण्यात आली. त्या घटनेत निधन झालेल्या व्यक्तींना मंत्रिमंडळाच्या बैठकीत श्रद्धांजली वाहण्यात आली. यादिवशी अत्यावश्यक सेवा, जीवनावश्यक सेवा सोडून इतर सर्व दिवसभर बंद राहिल अशी माहिती मंत्री जयंत पाटील यांनी मंत्रिमंडळ बैठकीनंतर यांनी दिली होती. हा बंद पक्षाच्या वतीने आहे सरकारच्या वतीने नाही, असं जयंत पाटील यांनी सांगितलं होतं. तर शेतकऱ्यांचा पाठीशी शिवसेना नेहमी राहिली आहे, त्यामुळे बंदमध्ये आम्ही सहभागी होणार आहोत, असं एकनाथ शिंदे यांनी सांगितलं होतं. शेतकरी आंदोलन चिरडताना भाजपची मानसिकता दिसून आली, जनरल डायरच्या भूमिकेत भाजप दिसून आली, असं बाळासाहेब थोरात म्हणाले होते.
शरद पवार म्हणाले...
शरद पवार यांनी काल बोलताना म्हटलं होतं की, उत्तरप्रदेशाबाबत माझ्यासह सर्वच विरोधकांनी खंबीर भूमिका घेतली, महाराष्ट्र सरकारने मंत्रीमंडळाच्या बैठकीत लखीमपूर घटनेचा निषेध केला. मी स्वत: शेतकऱ्यांवरील या हल्ल्याची तुलना जालियनवाला बाग हत्याकांडासोबत केली, त्याचा संताप व राग सत्ताधारी पक्षातील लोकांना आला आहे, त्याची प्रतिक्रीया म्हणूनच महाराष्ट्रात प्राप्तिकर विभागाचे छापासत्र आहे अशी शक्यता नाकारता येत नाही, असं पवार म्हणाले.
अजित पवार काय म्हणाले
दरम्यान अजित पवारांनी म्हटलं आहे की, आयटीनं कुठे छापे टाकावेत हा त्यांचा अधिकार आहे. काही शंका असल्यास ते छापे टाकू शकतात. माझ्याशी संबंधित असलेल्या कंपन्यांवर छापेमारी झाली आहे. मी नियमित टॅक्स भरतो. अर्थमंत्री असल्यानं आर्थिक शिस्त कशी राखायची, कुठलाही कर कसा चुकवायचा नाही, टॅक्स कसा भरायचा असतो हे आपल्याला चांगलं माहिती आहे. पण अजित पवारांचे नातेवाईक म्हणून हे छापे टाकले गेले असतील तर राज्यातील जनतेनं याचा जरूर विचार करावा, असं अजित पवार यांनी म्हटलं होतं.
बंदला आमचा संपूर्ण पाठिंबा, लखीमपूरमधील घटना सरकारी दहशतवाद नव्हता का? स्वाभिमानीचे अध्यक्ष राजू शेट्टी यांचा देवेंद्र फडणवीसांना सवाल
लखीमपुर-खीरी या ठिकाणी घडलेल्या घटनेच्या निषेधार्थ आज महाविकास आघाडी सरकारने महाराष्ट्र बंदची हाक दिली होती मात्र या बंदला विरोध करत विरोधी पक्षनेते देवेंद्र फडणवीस यांनी हा बंद सरकारी दहशतवाद असल्याची टीका महाविकास आघाडी सरकारवर केली आणि याच टीकेवर स्वाभिमानी शेतकरी संघटनेचे अध्यक्ष राजू शेट्टी यांनी उत्तर देत लखीमपूर या ठिकाणी झालेली घटना ही सरकारी दहशतवाद नव्हता का असा सवाल फडणवीस यांनी विचारला आहे तर महाविकास आघाडी सरकारचे आणि आमचे काही मतभेद असले तरी शेतकऱ्यांच्या प्रश्नावर आणि त्यांच्या न्याय हक्कासाठी हा बंद मह विकास आघाडी सरकारने पुकारला त्याला आमचा संपूर्ण पाठिंबा आहे असे देखील राजू शेट्टी म्हणाले
बुलडाण्यात बंदचं आवाहन करताना महाविकास आघाडी आणि भाजप कार्यकर्त्यांत बाचाबाची
बुलढाणा जिल्ह्यात सकाळपासून कडकडीत बंद असून जिल्ह्यातील मोठी बाजारपेठ असलेल्या वरवट येथे महाविकास आघाडीचे कार्यकर्ते बाजारपेठ बंद ठेवण्याचं आवाहन करत असताना भाजप कार्यकर्ता असलेल्या एका दुकानदाराने आपलं दुकान बंद करण्यास विरोध दर्शविल्याने महाविकास आघाडीतील कार्यक्रर्ते आक्रमक झाले. त्यांनी बळजबरीने दुकान बंद केलं व दुकानदाराला आत कोंडून ठेवलं. पोलीस आल्यावर पोलिसांनी हस्तक्षेप केल्यावर प्रचंड घोषणाबाजी देत महाविकास आघाडीतील कार्यकर्ते व भाजप कार्यकर्त्यांमध्ये बाचाबाची झाली.
महत्त्वाच्या बातम्या
