बेळगावात 'तान्हाजी' चित्रपटाला कर्नाटक नवनिर्माण सेनेचा विरोध, शो बंद पाडण्याचा प्रयत्न

बेळगावातील ग्लोब चित्रपटगृहात प्रदर्शित झालेल्या तान्हाजी चित्रपटाला कर्नाटक नवनिर्माण सेनेने विरोध दर्शविला आहे.

बेळगाव : अजय देवगनचा 'तान्हाजी- द अनसंग वॉरिअर' हा चित्रपट काल देशभर प्रदर्शित झाला आहे. चित्रपट प्रेक्षकांच्या पंसतीस उतरानाही दिसत आहे. मात्र बेळगावातील ग्लोब चित्रपटगृहात प्रदर्शित झालेल्या तान्हाजी चित्रपटाला कर्नाटक नवनिर्माण सेनेने विरोध दर्शविला आहे. चित्रपटाचे पोस्टर कर्नाटक नवनिर्माण सेनेच्या मूठभर कार्यकर्त्यांनी खाली उतरवण्यास भाग पाडलं. काल दुपारी सिनेमाचे पोस्टर्स खाली उतरवण्याची घटना घडली आणि संध्याकाळी महाराष्ट्र एकीकरण युवा समितीच्या कार्यकर्त्यांनी तानाजी चित्रपटाचे पोस्टर पुन्हा लावून फटाके फोडून मिठाई वाटून आनंद व्यक्त केला.

काही दिवसांपूर्वी कर्नाटक नवनिर्माण सेनेच्या भीमाशंकर याने एकीकरण समिती नेत्यांबद्दल बेताल वक्तव्य केलं होतं. त्यानंतर शिवसेनेने कोल्हापुरात कन्नड चित्रपट 'श्रीमन्ननारायण'चं प्रदर्शन बंद पाडलं होतं. कोल्हापुरात शिवसेनेने कन्नड चित्रपटाचं प्रदर्शन बंद पाडल्याने आम्ही कर्नाटकात तानाजी चित्रपट प्रदर्शित होऊ देणार नाही, अशी भूमिका कर्नाटक नवनिर्माण सेनेने घेतली आहे.

पोलीस संरक्षणात दाखल झालेल्या मूठभर कार्यकर्त्यांनी तानाजी चित्रपटाला विरोध दर्शविणाऱ्या घोषणा दिल्या. नंतर पोलिसांनी त्यांना ताब्यात घेऊन पोलीस तेथून हटवलं. सायंकाळ एकीककरण समितीच्या युवा सेनेच्या कार्यकर्त्यांनी ग्लोब सिनेमागृहाकडे जमून खाली उतरवलेले पोस्टर पुन्हा वर लावले. यावेळी युवा समितीच्या कार्यकर्त्यांनी फटाके फोडून आणि उपस्थितांना मिठाई वाटली.

संबंधित बातम्या