Beed: महादेव मुंडे प्रकरणाचा तपास तात्काळ SIT किंवा CID द्या अन्यथा...पत्नी ज्ञानेश्वरी मुंडेंचा प्रशासनाला इशारा

14 महिने उलटले तरी तपास होत नसल्याचा धक्कादायक खुलासा केल्यानंतर या प्रकरणाचा तपास परळी पोलिसांकडून काढून अंबाजोगाई पोलीस ठाण्याकडे सोपवला गेला

Mahadeo Munde

Source : ABPLIVE AI

Beed:एकीकडी मस्साजोगचे सरपंच संतोष देशमुख यांच्या हत्येला 60 दिवस पूर्ण झाले असून या प्रकरणात अजूनही एक आरोपी फरार आहे. हत्येतील पुरावे नष्ट करण्याचे षडयंत्र रचले जात असल्याचा आरोप होत असून दुसरीकडे महादेव मुंडे (Mahadeo Munde) प्रकरणावरून 14 महिने उलटले तरी तपास होत नसल्याचा धक्कादायक खुलासा केल्यानंतर या प्रकरणाचा तपास परळी पोलिसांकडून काढून अंबाजोगाई पोलीस ठाण्याकडे सोपवला गेला.आता या प्रकरणाचा तपास एसआयटी, सीआयडी मार्फत करावा अन्यथा आम्ही कुटुंबीय बीड पोलीस अधीक्षक कार्यालयासमोर आमरण उपोषण करणार असल्याचा इशारा महादेव मुंडे यांच्या पत्नी ज्ञानेश्वरी मुंडे यांनी पोलीस प्रशासनाला दिलाय. (Beed)

महादेव मुंडे यांच्या खून प्रकरणाचा तपास अंबाजोगाईचे पोलीस उपाधीक्षक अनिल चोरमले यांच्याकडे देण्यात आला होता आम्ही त्यांना भेटलो होतो. मात्र आता त्यांच्याकडून आम्हाला न्यायची अपेक्षा नाही. आम्ही बीड पोलीस अधीक्षकांची भेट घेणार असून त्यानंतर त्यांना 3 दिवसाची मुदत देऊन पोलीस अधीक्षक कार्यालयासमोर आंदोलन करणार असल्याचे त्यांनी यावेळी सांगितले.

तात्काळ SIT किंवा CID तपास द्या अन्यथा..

'आमची एवढीच मागणी आहे एसपी साहेबांना, या प्रकरणात तात्काळ एसआयपी आणि सीआयडी द्या. नाहीतर आम्ही पोलीस अधीक्षक कार्यालयासमोर आमरण उपोषण करू. याआधीही आम्ही SP साहेबांना भेटलो होतो. तेंव्हा तपास अंबाजोगाई पोलीस उपअधीक्षक अनिल चोरमले यांच्याकडे सोपवण्यात आला नव्हता.  त्यांच्याकडे कोणत्याच गोष्टीचा फॉलोअप मिळाला नाही. त्यामुळे या प्रकरणात आम्हाला एसआयटी आणि सीआयडी तपास हवा आहे.' असे महादेव मुंडे यांच्या पत्नी ज्ञानेश्वरी मुंडेंनी बीड पोलीस अधीक्षकांकडे मागणी केली.

नक्की प्रकरण काय?

परळी तहसील कार्यालयासमोर संध्याकाळी 7.30 ते 8 वाजेदरम्यान भररस्त्यात महादेव मुंडे यांचा खून झाला, मात्र 14 महिने उलटूनही आरोपींचा शोध लागलेला नाही. चार तपास अधिकारी बदलले, दोन एसपींची बदली झाली, पण सत्य अजूनही गुलदस्त्यात आहे.महादेव मुंडेंच्या पत्नी ज्ञानेश्वरी मुंडे गेल्या दीड वर्षांपासून पोलिस ठाण्याचे उंबरे झिजवत आहेत, पण आरोपी अजूनही मोकाट फिरत आहेत. बीडमध्ये पोलिस अधिकारीच गुन्हेगारांना पाठीशी घालत आहेत का? असा संतप्त सवाल आता उपस्थित केला जात आहे.या प्रकरणात वाल्मिक कराडच्या मुलाचे नाव घेतले जात आहे, पण तपास मात्र ठप्प आहे. भाजप नेते सुरेश धस यांनीही पोलिसांवर राजकीय दबावाखाली काम करत असल्याचा आरोप केला आहे.

हेही वाचा: