FPI : विदेशी पोर्टफोलिओ गुंतवणूकदारांनी ट्रेंड बदलला, ऑगस्टच्या पहिल्या आठवड्यात भारतीय बाजारात 12921 कोटींची गुंतवणूक, तज्ज्ञ म्हणाले...
Share Market : भारतीय शेअर बाजारात विदेशी पोर्टफोलिओ गुंतवणूकदारांनी 12921 कोटी रुपयांची गुंतवणूक ऑगस्टच्या पहिल्या आठवड्यात केली आहे.
नवी दिल्ली : विदेशी पोर्टफोलिओ गुंतवणूकदार (FPI) म्हणजेच एफपीआयनं भारतीय शेअर बाजारातील (Share Market) खरेदीचा किंवा गुंतवणुकीचा ट्रेंड सलग दुसऱ्या महिन्यात कायम ठेवला आहे. एफपीआयनं ऑगस्ट महिन्याच्या पहिल्या आठवड्यात भारतीय शेअर बाजारात 12921 कोटी रुपयांची गुंतवणूक केली आहे. आर्थिक स्थितीमधील सुधारणा, अमेरिकेतील व्याज दरातील कपातीची आशा, कच्चा तेलाच्या दरात झालेली घसरण आणि रुपया स्थिर झाल्यानं विदेशी गुंतवणूकदारांसाठी भारतीय शेअर बाजार गुंतवणुकीसाठी आकर्षक ठरतोय.
FPI कडून जुलै, ऑगस्टमध्ये गुंतवणूक
एफपीआयनं जुलै 2026 मध्ये भारतीय शेअर बाजारात 20200 कोटी रुपयांची गुंतवणूक केली होती. त्यापूर्वी चार महिन्यांमध्ये विदेशी पोर्टफोलिओ गुंतवणूकदारांनी भारतीय बाजारात विक्रीचा ट्रेंड कायम ठेवला होता. सेंट्रल डिपॉजिटरी सर्व्हिसेस(इंडिया) लिमिटेडच्या आकडेवारीनुसार एफपीआयनं जून महिन्यात 49,340 कोटी, मे महिन्यात 32,963 कोटी, एप्रिलमध्ये 60,847 कोटी आणि मार्चमध्ये विक्रमी 1.17 लाख कोटी रुपये भारतीय शेअर बाजारातून काढून घेतले होते. त्यापूर्वी फेब्रुवारी महिन्यात विदेशी पोर्टफोलिओ गुंतवणूकदारांनी भारतीय बाजारात 22615 कोटी रुपयांची गुंतवणूक केली होती.
फेब्रुवारीनंतर जुलै आणि आता ऑगस्ट महिन्यात एफपीआय भारतीय बाजारात गुंतवणूक करत असले तरी भारतीय बाजारातून काढून घेतलेली रक्कम खूप मोठी आहे. 2026 मध्ये एफपीआयनं आतापर्यंत भारतीय बाजारातून 2.41 लाख कोटी रुपये काढून घेतले आहेत. 2025 मध्ये विदेशी पोर्टफोलिओ गुंतवणूकदारांनी भारतीय बाजारातून 1.66 लाख कोटी रुपये काढून घेतले होते.
बाजार विश्लेषकांनुसार, अलीकडच्या काही महिन्यांमध्ये एफपीआयचा कल बदलला आहे, त्याची कारणं अमेरिकेत व्याज दरातील कपातीची आशा, कच्चा तेलाच्या दरात झालेली घसरण, रुपयाची स्थिरता ही आहेत. आरबीआयच्या चांगल्या जीडीपी वाढीचा आणि महागाईसंदर्भातील अंदाजामुळं गुंतवणूकदारांचा विश्वास कायम आहे.
टॅकचे संहसंस्थापक आणि सीईओ वेदांत गुप्ते यांच्या मते भारतीय शेअर्समध्ये विदेशी भागीदारी अपेक्षेनुसार कमी झाल्यानं आता विदेशी गुंतवणूक येऊ शकते. विदेशी पोर्टफोलिओ गुंतवणूकदार फक्त आयपीओच नव्हे तर शेअर बाजारात लिस्ट असलेल्या कंपन्यांमध्ये देखील गुंतवणूक वाढवत असल्याचं दसत असल्याचं वेदांत गुप्ते यांनी म्हटलं.
जिओजीत इन्वेस्टमेंटसचे मुख्य गुंतवणूक रणनीतिकार वी.के. विजयकुमार यांच्यामतानुसार एफपीआयच्या खरेदीचं महत्त्वाचं कारण ते वाहन, आरोग्य सेवा यासारख्या क्षेत्रांना प्राधान्य देत आहेत. विदेशी गुंतवणूकदारांची पंसती भारतीय डेब्ट आणि बाँड मार्केटमध्ये देखील आहे. एफपीएआयनं ऑगस्टच्या पहिल्या आठवड्यात 622 कोटींची गुंतवणूक केली आहे.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
महत्त्वाच्या बातम्या
