Corona Test | राज्यातील सर्व वैद्यकीय महाविद्यालयांमध्ये कोविड-19 तपासणी प्रयोगशाळा सुरू होणार

कोरोनाचा प्रार्दुभाव रोखण्यासाठी जास्तीत जास्त जणांची कोरोना टेस्ट होणे गरजेच आहे. त्यासाठी आता राज्यातील सर्व वैद्यकीय महाविद्यालयांमध्ये कोरोनाची टेस्ट करण्यासाठी प्रयोगशाळा सुरु करण्यात येणार असल्याचा माहिती वैद्यकीय शिक्षणमंत्री अमित देशमुख यांनी दिले

मुंबई : कोविड-19 विषाणूचा वाढता प्रादुर्भाव लक्षात घेतात महाराष्ट्रातील वैद्यकीय शिक्षण व संशोधन संचालनालयाअंतर्गत येणारी सर्व शासकीय वैद्यकीय महाविद्यालय व रुग्णालये, सर्व खाजगी वैद्यकीय महाविद्यालये त्याचप्रमाणे अभिनव विद्यापीठाअंतर्गत येणाऱ्या वैद्यकीय महाविद्यालयांमध्ये कोविड-19 तपासणी प्रयोगशाळा सुरू करण्याचे निर्देश वैद्यकीय शिक्षणमंत्री अमित देशमुख यांनी दिले आहेत.

वैद्यकीय शिक्षण संचालनालयाअंतर्गत येणाऱ्या आणि आतापर्यंत कोविड-19 प्रयोगशाळा नसणाऱ्या कोल्हापूर, जळगाव, बारामती, यवतमाळ,अकोला, गोंदिया, चंद्रपूर, लातूर, नांदेड व अंबाजोगाई येथील शासकीय वैद्यकीय महाविद्यालयांमध्ये कोविड-19 तपासणी प्रयोगशाळा सुरू करण्यात याव्यात त्याचप्रमाणे सर्व खाजगी आणि अभिनव विद्यापीठांतर्गत येणाऱ्या महाविद्यालयांमध्ये अशा तपासणी प्रयोगशाळा सुरू करण्याबाबत चाचपणी करण्यात यावी अशा सूचना वैद्यकीय शिक्षणमंत्र्यांनी वैद्यकीय शिक्षण सचिव डॉ.संजय मुखर्जी यांना दिल्या होत्या त्यानुसार हा निर्णय घेण्यात आला आहे.

सर्व वैद्यकीय महाविद्यालयांनी याबाबतचे प्रस्ताव आजच इंडियन काऊन्सिल ऑफ मेडिकल रिसर्च नवी दिल्ली यांच्याकडे पाठवावेत अशा सूचना वैद्यकीय शिक्षण संचालक डॉ. तात्याराव लहाने यांनी पत्राद्वारे सर्व महाविद्यालयांना दिल्या आहेत. सर्व वैद्यकीय महाविद्यालयांमध्ये प्रयोगशाळा सुरु करण्याच्या प्रस्तावास मुख्यमंत्री उद्धव ठाकरे यांनी पाठिंबा दर्शवला असून हे प्रस्ताव केंद्र शासनाकडून तातडीने मान्य करून घेण्यात येतील असंही वैद्यकीय शिक्षण मंत्री अमित देशमुख यांनी म्हटले आहे.

संबंधित बातम्या

Corona Around the World | जगभरात कोरोना व्हायरसची सध्याची परिस्थिती काय आहे?