मनमाडमध्ये ट्रक-कारचा अपघात, एकाच कुटुंबातील सहा जणांचा मृत्यू

येवला-मनमाड मार्गावरील अनकाई बारी भागात आयशर ट्रक आणि अर्टिगा कार यांची समोरासमोर धडक होऊन हा भीषण अपघात झाला.

मनमाड : मनमाडमध्ये कार आणि ट्रकचा भीषण अपघात झाल्याची घटना समोर आली आहे. या अपघातामध्ये एकाच कुटुंबातील सहा जणांना प्राण गमवावे लागले. अपघातानंतर येवला-मनमाड मार्गावरील वाहतूक काही काळ ठप्प झाली होती. येवला-मनमाड मार्गावरील अनकाई बारी भागात हा भीषण अपघात झाला. आयशर ट्रक आणि अर्टिगा कार यांची समोरासमोर धडक झाली. हा अपघात आज (बुधवार) पहाटे पाच वाजताच्या सुमारास घडला. अपघातात अर्टिगा कारचा अक्षरशः चक्काचूर झाला. या अपघातामध्ये एकाच कुटुंबातील सहा जणांचा दुर्दैवी मृत्यू झाल्याने परिसरावर शोककळा पसरली आहे. मृतांमध्ये तीन महिला, दोन पुरुष आणि एका लहान मुलाचा समावेश आहे. अपघातात मृत्युमुखी पडलेले कुटुंब हे अहमदनगर जिल्ह्यातील कोपरगावचे रहिवासी आहेत. अपघाताची माहिती मिळताच घटनास्थळी परिसरातील नागरिकांनी तात्काळ मदतकार्य सुरु केले. मात्र अपघात इतका भीषण होता, की मदत मिळण्यापूर्वीच कारमधील लोकांचा दुर्दैवी मृत्यू झाला होता. त्यानंतर पोलिसही घटनास्थळी दाखल झाले.