BKC Metro Fire : आग आटोक्यात आल्यानंतर बीकेसी मेट्रो पुन्हा सुरू, मुंबई मेट्रोकडून दिलगिरी व्यक्त
BKC Metro Station Fire : बीकेसी मेट्रोच्या काम सुरू असलेल्या भागात दुपारी आग लागल्याची घटना घडली होती. त्यामध्ये कोणतीही जीवितहानी झाली नाही.
मुंबई : वांद्रे कुर्ला कॉम्प्लेक्स (BKC Metro Station) मेट्रो स्टेशनच्या परिसरात लागलेली आग आटोक्यात आल्यानंतर आता बीकेसी मेट्रो पूर्ववत झाली आहे. दुपारी एक वाजेच्या सुमारास बीकेसी मेट्रोच्या काम सुरू असलेल्या परिसरात ही आग लागली होती. त्यानंतर मेट्रो काही वेळासाठी बंद करण्यात आली होती. आता पुन्हा दुपारी 2.45 मिनिटांनी ही मेट्रो सुरू करण्यात आली आहे.
मुंबई मेट्रोने यासबंधित एक निवेदन प्रसिद्ध केलं असून त्यामध्ये म्हटलंय की, "मुंबई मेट्रो रेल्वे कॉर्पोरेशन (MMRC) कडून कळविण्यात येते की, आज, 15 नोव्हेंबर 2024 रोजी दुपारी अंदाजे 1.00 वाजता बीकेसी मेट्रो स्थानकाच्या अद्याप कार्यान्वित नसलेल्या A4 प्रवेश/निकास द्वारा बाहेर आग लागली. या प्रवेश द्वारा जवळ सध्या कामे सुरू असून हे सध्या प्रवाशांसाठी खुले करण्यात आलेले नाही. या आगीमुळे काही भागात धूर पसरला. यामुळे प्रवाशांच्या सुरक्षेसाठी बीकेसी स्थानकावरील सेवा तात्पुरत्या स्वरूपात थांबवण्यात आली होती.
📢 Train services at BKC Metro Station have been fully restored at 14.45 hrs. We sincerely regret the inconvenience caused and thank all passengers for their patience and understanding. Your safety remains our top priority. #MumbaiMetro3 #BKCUpdate
— MumbaiMetro3 (@MumbaiMetro3) November 15, 2024
मात्र, आरे-जोगेश्वरी- वांद्रे कॉलनी दरम्यानची इतर मेट्रो सेवा नेहमीप्रमाणे सुरू होती. मुंबई अग्निशमन दलाने परिस्थिती नियंत्रणात आणली असून एमएमआरसी आणि डीएमआरसीचे वरिष्ठ अधिकारी घटनास्थळी उपस्थित होते.
फायर ब्रिगेडने आग पूर्णपणे विझवल्यानंतर आणि दुपारी 2.45 वाजता त्यांची परवानगी मिळाल्यानंतर बीकेसी स्थानकावरील सेवा पूर्ववत करण्यात आल्या. या घटनेत कोणतीही दुखापत किंवा जीवितहानी झालेली नाही. प्रवाशांना झालेल्या गैरसोयीबद्दल आम्ही दिलगीर आहोत.
BKC Metro Station Fire : नेमकं काय घडलं होतं?
वांद्रे कुर्ला कॉम्प्लेक्स (BKC) मेट्रो स्टेशनचे काम सुरु असलेल्या परिसरात आज दुपारी 1 वाजून 9 मिनिटांच्या सुमारास आग लागली होती. सध्या घटनास्थळी अग्निशमन दलाकडून आग आटोक्यात आणण्याचे कार्य सुरू आहे. सुमारे 40 ते 50 फूट खोल तळघरातील लाकडी साठा आणि फर्निचर असलेल्या ठिकाणी ही आग पसरली होती. घटनास्थळी अग्निशामक दलाच्या गाड्या आणि स्थानिक पोलिसांची टीम पोहोचली. नंतर सर्वच प्रवाशांना अंडरग्राऊंड मेट्रो स्टेशनमधून बाहेर काढण्यात आलं. दरम्यान, या आगीच्या घटनेमुळे स्टेशनबाहेर मोठी वाहतूक कोंडी झाली होती. .
बीकेसी मेट्रो स्टेशन जमिनीच्या खाली असल्याने आग पसरली असती तर वित्तहानी होण्याचा मोठा धोका होता. लाकडाच्या साठ्याला आग लागल्यानंतर धुराचे प्रचंड लोट मेट्रो स्थानकाच्या परिसरात पसरले. त्यावेळी सर्व प्रवाशांना तातडीने बाहेर काढण्यात आले. ही आग विझवण्यसाठी घटनास्थळी अग्निशामन दलाच्या 12 ते 13 गाड्या दाखल झाल्याने याठिकाणी रस्ते वाहतुकीची प्रचंड कोंडी झाली होती.
ही बातमी वाचा :
महत्त्वाच्या बातम्या
