Breaking News LIVE | राज्यात अनेक ठिकाणी अवकाळी पावसाची हजेरी, पिकांचं नुकसान

दिवसभरातील ताज्या घडामोडी, महत्त्वाचे अपडेट्स या लाईव्ह ब्लॉगमध्ये आपल्याला मिळतील. देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर महत्वाचे अपडेट लाईव्ह ब्लॉगमध्ये...

Background

 दहावी आणि बारावी परीक्षेचं संभाव्य वेळापत्रक जाहीर

 

महाराष्ट्र राज्य माध्यमिक आणि उच्च माध्यमिक बोर्डाकडून दहावी आणि बारावी परीक्षेचं संभाव्य वेळापत्रक जाहीर करण्यात आलं आहे. 29 एप्रिल ते 20 मे 2021 दरम्यान दहावी बोर्डाची परीक्षा होण्याची शक्यता आहे. तर 23 एप्रिल ते 21 मे 2021 दरम्यान बारावीची परीक्षा होणार असल्याचं या संभाव्य वेळापत्रकात बोर्डाने जाहीर केलं आहे. बोर्डाने या संदर्भात परिपत्रक जारी केलं आहे. कोरोनाव्हायरसच्या पार्श्वभूमीवर शिक्षम मंडळाच्या ठरलेल्या कालावधी परीक्षा घेता आली नाही. त्यामुळे सरकारच्या परवानगीनंतर महाराष्ट्र राज्य माध्यमिक आणि उच्च माध्यमिक शिक्षण मंडाळाने एप्रिल आणि मे महिन्यात दहावी आणि बारावीची लेखी परीक्षा आयोजित केली आहे.

राज्यात लॉकडाऊन नाही, पण नियमांची कडक अंमलबजावणी होणार : आरोग्यमंत्री

 

काळजी घेणं गरजेचं आहे. कोरोना बाधितांचा आकडा काहीसा वाढतोय. राज्यात लॉकडाऊन होणार नाही, मात्र नियमांची कडक अंमलबजावणी करण्यात येणार असल्याचं आरोग्यमंत्री राजेश टोपे यांनी सांगितलं. तसेच स्थानिक प्रशासनाला पूर्ण अधिकार देण्यात आले असून त्यांच्या स्तरावर कोरोना नियंत्रणात आणण्यासाठी ज्या उपाययोजना करणं आवश्यक आहे, त्या त्यांनी कराव्यात, अशा सूचना देण्यात आलेल्या आहेत, असंही ते म्हणाले.

राठोडांचा राजीनामा घेणार नाहीत कारण..., नारायण राणेंचा ठाकरे सरकारवर घणाघात

 

पूजा चव्हाण आत्महत्या प्रकरणात वनमंत्री संजय राठोड यांचा राजीनामा घेणार नाहीत कारण त्यांचा राजीनामा घेतला तर आधीच्या प्रकरणावर एका मंत्र्याला राजीनामा घ्यावा लागेल अशी टीका भाजपचे खासदार नारायण राणे यांनी अप्रत्यक्षपणे आदित्य ठाकरे यांचे नाव न घेता केली आहे. केंद्र सरकारने अर्थसंकल्प सादर केल्यानंतर या अर्थसंकल्पाची माहिती देण्यासाठी नारायण राणे ठाण्यात आले होते. त्यावेळी भाजप कार्यालयात घेतलेल्या पत्रकार परिषदेत त्यांनी अनेक मुद्यांना हात घातला.

 

दक्षिण आफ्रिकेने सीरम इन्स्टिट्यूटला कोरोना लसीचे 10 लाख डोस परत घेण्यास सांगितलं

 

सीरम इन्स्टिट्यूट ऑफ इंडियाकडून पाठवण्यात आलेल्या कोरोना लसीचे दहा लाख डोस दक्षिण आफ्रिकेला परत करायचे आहेत. इकॉनॉमिक टाइम्सने या संदर्भातील वृत्त प्रकाशित केलं आहे. याआधी आम्ही कोरोना लसीकरण अभियानात अॅस्ट्राजेनेकाच्या लसीचा वापर करणार नाही, असं दक्षिण आफ्रिकेने जाहीर केलं होतं. सीरम इन्स्टिट्यूट ऑफ इंडियाची ओळख कोरोना लसीचा पुरवठा करणारी प्रमुख कंपनी म्हणून निर्माण झाली आहे. ऑक्सफर्ड-अॅस्ट्राजेनेकाच्या लसीची उत्पादन पुण्यातील सीरम इन्स्टिट्यूटमध्ये होत आहे. मागील आठवड्यातच दक्षिण आफ्रिकेत सीरम इन्स्टिट्यूटमध्ये उत्पादित झालेल्या कोरोना लसीचे दहा लाख डोसची पहिली बॅच पोहोचली होती. तर पाच लाख डोसची पुढची बॅच पुढील काही आठवड्यातच तिथे पोहोचणार होती.

23:10 PM (IST)  •  17 Feb 2021

परभणी जिल्ह्यात अनेक ठिकाणी जोरदार पाऊस. परभणी, पोखर्णी, दैठणा इत्यादी भागांत मुसळधार पाऊस. अवकाळी पावसाने ज्वारी, हरभरा पिकांचे नुकसान होण्याची शक्यता. विजांच्या कडकडाटासह जोरदार पाऊस

22:55 PM (IST)  •  17 Feb 2021

पुणे : थकित कर्जाचा हप्ता भरण्यास सांगितल्यामुळे एका कर्जदाराने बजाज फायनान्सच्या मॅनेजरचा खून केला आहे. लोणी काळभोर पोलीस स्टेशनच्या हद्दीत काल (16 फेब्रुवारी) संध्याकाळच्या सुमारास हा प्रकार घडला. रवींद्र प्रकाश वळकुंडे (वय 28 वर्षे) असे खून झालेल्या फायनान्स मॅनेजरचे नाव आहे. लोणी काळभोर पोलीस स्टेशनमध्ये या प्रकरणी गुन्हा दाखल करण्यात आला असून आरोपी राहुल लक्ष्मण गाढवेला पोलिसांनी अटत केली आहे. याप्रकरणी अमोल भीमराव जोगदंड यांनी फिर्याद दिली आहे. उरळीकांचन परिसरातील एका इमारतीत बजाज फायनान्स कंपनीचे कार्यालय आहे. आरोपी राहुल गाढवे याने बजाज फायनान्समधून पर्सनल लोन घेतले होते. या खर्चाचे हफ्ते त्वरित भरावेत यासाठी मयत रवींद्र वळकुंडे यांनी आरोपीकडे तगादा लावला होता. याच कारणावरुन आरोपीने काल सायंकाळी पाचच्या सुमारास कार्यालयात येऊन रवींद्र वळकुंडे यांच्यावर कोयत्याने सपासप वार केले. यामध्ये गंभीर जखमी झाल्याने रवींद्र वळकुंडे यांचा जागीच मृत्यू झाला आहे. लोणी काळभोर पोलीस स्टेशनमध्ये या प्रकरणी खुनाचा गुन्हा दाखल करण्यात आला असून आरोपीला अटकही करण्यात आली आहे. पोलीस अधिक तपास करत आहेत.

23:03 PM (IST)  •  17 Feb 2021

कोरोनाच्या वाढत्या संसर्गाच्या पार्श्वभूमीवर वर्धा जिल्ह्यात जमावबंदीचे आदेश जारी केले आहेत. पाचपेक्षा जास्त व्यक्तींनी एकत्र न येण्याचे आदेश जिल्हाधिकाऱ्यांनी दिले आहेत. तर लग्न आणि इतर कार्यक्रमासाठी 50 व्यक्तींचं बंधन असेल. औषधांची दुकानं आणि रुग्णालयं सोडून इतर दुकानं आणि बाजारपेठा संध्याकाळी सातपर्यंत सुरु राहतील. धार्मिक स्वरुपाच्या यात्रा, उत्सव, समारंभ, महोत्सव, स्नेहसंमेलने, सामूहिक कार्यक्रम, सभा, बैठका, लग्नसमारंभ इत्यादी करीता केवळ 50 व्यक्तींना उपस्थितीचे बंधन असेल. अशा प्रकारच्या कोणत्याही कार्यक्रमासाठी संबंधित कार्यक्षेत्रातील पोलीस स्टेशनची परवानगी घेणे बंधनकारक असेल. मिरवणूक आणि रॅली काढण्यास पुढील आदेशापर्यंत प्रतिबंध असेल. सोशल डिस्टन्सिंग आणि मास्कचा वापर करणे आवश्यक आहे. बाजारपेठांमध्ये नागरिकांची गर्दी होणार नाही याबाबत उ.वि.अ. तथा इन्सिडंट कमांडंट यांनी दक्षता घेऊन आणि आवश्यक पथकाचे गठन करुन प्रतिबंधात्मक उपाययोजना करण्याचे निर्देश दिले आहेत.

23:06 PM (IST)  •  17 Feb 2021

मास्क न वापरणाऱ्यांविरुद्ध कारवाई करण्याबाबत सध्या सोशल मीडियावर एक ऑडिओ क्लिप माझ्या नावाने व्हायरल होत आहे. मात्र त्या क्लिपमधील आवाज माझा नाही- राजेश टोपे

22:37 PM (IST)  •  17 Feb 2021

तेलगावच्या शिवाजी चौकामध्ये वीज पडून नारळाच्या झाडाला आग. धारुर तालुक्यातील तेलगाव येथील शिवाजी चौकामध्ये परळी रोड वरील माऊली हॉटेल च्या जवळील एका नारळाच्या झाडावर वीज पडून त्या नारळाच्या झाडाला मोठ्या प्रमाणात आग लागलेली आहे ही घटना आता दहा वाजता घडलेली असून सध्या वातावरण ढगाळ असून विजांचा कडकडाट मोठ्या प्रमाणात येत आहे व मोठ्या प्रमाणात पावसाची शक्यता आहे.