Manpada Police Station : विनयभंगाचा आरोप असलेल्या आरोपीचा पोलीस ठाण्यातच मृत्यू
आरोपीला फिट आल्याने मानपाडा पोलीस ठाण्यातच त्याचा मृत्यू झाल्याची घटना घडली आहे. दत्तात्रय वारके असे मृत्यू झालेल्या आरोपीचे नाव आहे.
Manpada Police Station : डोंबिवलीच्या मानपाडा पोलीस ठाण्यात एका आरोपीचा मृत्यू झाल्याची घटना घडली आहे. आरोपीला फिट आल्याने त्याचा मृत्यू झाल्याची माहिती पोलिसांनी दिली. दत्तात्रय वारके असे मृत्यू झालेल्या आरोपीचे नाव आहे. एका महिलेच्या छेडछाड प्रकरणी दत्तात्रय वारके याला अटक करण्यात आली होती. सध्या तो न्यायालयीन कोठडीत मानपाडा पोलीस ठाण्याच्या आयसोलेशन रूममध्ये होता.
दत्तात्रय वारके याच्याविरोधात डोंबिवलीतील मानपाडा पोलीस ठाण्यात 5 फेब्रुवारीला एका महिलेसोबत फोनवर अश्लील संभाषण केल्याप्रकरणी गुन्हा दाखल झाला होता. दत्तात्रय हा एका बिल्डरकडे कामाला होता. 2013 साली त्याने घर विकत देण्यासाठी एका महिलेकडून पाच लाख रुपये घेतले होते. मात्र, या महिलेला तो घरही देत नव्हता आणि पैसे पण परत करत नव्हता. यासंदर्भात महिलेने वारंवार दत्तात्रयकडे तगादा लावला होता. मात्र, दत्तात्रय काही ऐकण्याच्या मनस्थितीत नव्हता. दत्तात्रयने फोनवर महिलेसोबत अश्लिल वर्तन केले. याबाबत सदर महिलेने मानपाडा पोलीस ठाण्यात तक्रार दिली होती.
यासंदर्भात महिलेने मानव अधिकारसह इतर ठिकाणी सुद्धा तक्रारी दिल्या होत्या. मानपाडा पोलीस ठाण्यात दत्तात्रय विरोधात महिलेकडून करण्यात आलेल्या तक्रारीवर पोलिसांनी 26 फेब्रुवारीला जळगावहून आरोपीला अटक केली होती. कल्याण कोर्टात हजर केले असता, कोर्टाने त्याला न्यायालयीन कोठडीत पाठवले होते. आरोपीला न्यायालयीन कोठडीत पाठवण्याच्या आधी कोव्हिड रिपोर्ट बंधनकारक आहे. त्यासाठी मानपाडा पोलिसांनी दत्तात्रयला पोलीस स्टेशनच्या आयसोलेशन रूममध्ये ठेवले होते. त्याची कोवीड चाचणी केली होती. पोलीस रिपोर्टच्या प्रतीक्षेत होते मात्र, आज पहाटे त्याला फीट आल्याने तो बेशुद्ध पडला. पोलिसांनी त्याला रुग्णालयात दाखल केले मात्र, उपचारा दरम्यान दत्तात्रयचा दुर्दैवी मृत्यू झाला.
दत्तात्रयचे कुटुंब भुसावळमध्ये राहते. दुर्दैवी बाब म्हणजे कालच त्याच्या भावाचा अपघात झाला आहे. फीट आल्याने दत्तात्रयचा मृत्यू झाल्याची माहिती मानपाडा पोलिसांनी दिली आहे. पुढील तपास सुरू आहे. त्याचा मृतदेह जे जे रुग्णालयात शवविच्छेदनासाठी पाठवला असून, डॉकटरांच्या पॅनलखाली त्याचे शवविच्छेदन होणार असल्याचे पोलिसांनी सांगितले.
महत्त्वाच्या बातम्या:
महत्त्वाच्या बातम्या
ट्रेंडिंग न्यूज
